Real Madrid është pranë rinovimit të kontratës me portierin Thibaut Courtois. Sipas gazetarit italian Fabrizio Romano, palët kanë arritur një marrëveshje verbale paraprake për zgjatjen e bashkëpunimit, duke konfirmuar dëshirën e klubit madrilen për të mbajtur në skuadër një nga lojtarët më të rëndësishëm të tij.
Kontrata aktuale e portierit belg me “Los Blancos” përfundon në qershor të vitit 2027, por pritet që marrëveshja e re të nënshkruhet në periudhën e ardhshme. Ky rinovim do të garantonte vazhdimësinë e Courtois në Madrid edhe gjatë sezonit 2027/2028.
34-vjeçari u transferua te Real Madrid në verën e vitit 2018 nga Chelsea dhe, që prej atëherë, është shndërruar në një prej shtyllave kryesore të skuadrës në repartin e portës. Me paraqitjet e tij, belgu ka fituar një rol të rëndësishëm në projektin sportiv të klubit madrilen.
Gjatë këtij sezoni, Courtois ka luajtur në nëntë ndeshje në të gjitha kompeticionet me fanellën e Real Madridit, duke pësuar po aq gola.