Trajneri i Argjentinës, Lionel Scaloni, ka deklaruar se skuadra e tij është e gatshme për përballjen e madhe me Anglinë në gjysmëfinalen e Kupës së Botës 2026, duke pranuar se “Tre Luanët” kanë në përbërje dy nga futbollistët më të mirë në botë.
Në konferencën për shtyp para ndeshjes, tekniku kampion i botës u ndal te rreziku që paraqesin Harry Kane dhe Jude Bellingham.
“Do të përballemi me lojtarë të mëdhenj, dy nga më të mirët në botë. Do të bëjmë gjithçka për t’i neutralizuar. Edhe ne kemi armët tona dhe do të përpiqemi t’i pengojmë të zhvillojnë lojën e tyre”, u shpreh Scaloni.
I pyetur nëse Argjentina ka mbërritur në gjysmëfinale në gjendjen ideale fizike dhe psikologjike, trajneri argjentinas tha se fokusi i vetëm është fitorja.
“Nuk e bëj këtë pyetje. Nëse një muaj e gjysmë më parë dikush do të më thoshte se do të ishim në gjysmëfinale, do ta pranoja menjëherë. Tani nuk më intereson nëse jemi të lodhur apo jo. Nuk merremi me këtë, por vetëm me faktin që do ta luajmë këtë gjysmëfinale për ta fituar”, deklaroi ai.
Scaloni u pyet edhe për rivalitetin historik mes Argjentinës dhe Anglisë, që lidhet me përballjen e famshme të Botërorit 1986, të zhvilluar pak vite pas Luftës së Falklandeve (Malvinas).
“Duhet të mos i ngatërrojmë gjërat. Ishte një periudhë shumë e dhimbshme e historisë sonë dhe nuk mund ta ndryshojmë. Edhe sot ndodhin ngjarje të ngjashme në pjesë të tjera të botës. Ne kujtojmë ata që vuajtën, por nuk duhet t’i përziejmë këto me futbollin. Çfarë përgjegjësie kanë futbollistët për atë që ndodhi? Do të ishte gabim ta shihnim kështu. Ky është futboll, asgjë më shumë”, theksoi ai.
Trajneri argjentinas kujtoi edhe golin legjendar të Diego Armando Maradonës kundër Anglisë në çerekfinalen e Botërorit 1986, kur “El Pibe de Oro” dribloi pothuajse të gjithë ekipin kundërshtar përpara se të shënonte.
“Ai gol do të mbetet përgjithmonë në zemrat tona. Ishte thjesht i mrekullueshëm. Kushdo që e do futbollin do ta kujtojë gjithmonë si një nga golat më të bukur. Ishte rastësi që u shënua ndaj Anglisë, sepse po të ishte kundër çdo skuadre tjetër, do të ishte po aq i jashtëzakonshëm”, përfundoi Scaloni.