Taulant Seferi po kalon një moment fantastik në kampionatin turk. Sulmuesi i Kombëtares shqiptare vazhdon të jetë protagonist me golat e tij dhe këtë herë ka realizuar një dopietë në fitoren e thellë 4-0 të Kayserisporit ndaj Istanbulsporit.
Futbollisti nga Kumanova e nisi spektaklin në minutën e 25-të. Pas një aksioni të skuadrës së tij, topi i kthyer nga portieri i Istanbulsporit u përplas me një mbrojtës vendas dhe përfundoi në këmbët e Seferit. Sulmuesi kuqezi nuk gaboi përballë portës, duke e dërguar topin në rrjetë dhe duke i dhënë avantazhin Kayserisporit.
Por Seferi nuk u mjaftua me një gol. Në minutën e 83-të, ai shënoi edhe një herë, duke vulosur fitoren 4-0 të skuadrës së tij dhe duke kompletuar dopietën personale.
Dy golat ndaj Istanbulsporit e çojnë Seferin në kuotën e 7 golave këtë sezon, një statistikë që e vendos atë përpara një tjetër sulmuesi të Kombëtares shqiptare. Rey Manaj, i cili aktivizohet te Sivasspori, numëron aktualisht 6 gola.
Forma e Seferit vjen në një moment të rëndësishëm, teksa Kombëtarja shqiptare përgatitet për ndeshjet e radhës.