Ky sezon mund të quhet i mallkuar për Thomas Strakoshën në Seria A. Portieri i Kombëtares sonë pasi u infektua me Covid-19 në fillim të sezonit nuk mund që të rifitonte më vendin e titullarit edhe për shkak të një dëmtimi që pësoi më pas. “Gardiani” i njohur është në listën e 5 dështimeve më të mëdha të sezonit në Seria A, sipas faqes “calciodangelo.com”. Pjesë e këtij vlerësimi negativ janë edhe Kulusevski, Pezzella, Nainggolan dhe Dybala.
“Zhgënjimi më i madh në portë është Thomas Strakosha. Portieri i Lazios është harruar si në ekip ashtu edhe në merkato, duke u bërë portier i dytë pas Reinës. Në fillim të sezonit ishte titullar i padiskutueshëm, me portierin spanjoll 38-vjeçar që bënte rezervën, por situata u përmbys.
Për shkaqe fizike dhe më pas për zgjedhje teknike, shqiptari ka qenë gjithmonë në pankinë, duke bërë që Reina të ngjitet në hierarki. Strakosha ka luajtur vetëm në 6 ndeshje në kampionat, në të cilat ka pësuar 12 gola. Një nga portierët më të mirë të sezonit të kaluar tani ka humbur, edhe në listën e vlerësimeve”, shkruan portali italian.
Strakosha pritet që të largohet gjatë kësaj vere për të nisur një aventurë të re në Premier League ose në Bundesligë, ku interesimi është i madh. /R.Lika-Koha Jone/