Sylvinho ka rikthyer emocionet e një prej periudhave më të rëndësishme të karrierës së tij. Ish-trajneri i Kombëtares shqiptare ishte i pranishëm në “Camp Nou” për të ndjekur ndeshjen mes Barcelonës dhe Al Ahly, të vlefshme për trofeun “Gamper”.
Për brazilianin, vizita në stadiumin katalanas kishte një domethënie të veçantë, pasi aty kaloi disa prej viteve më të suksesshme të karrierës si futbollist. Rikthimi në shtëpinë e Barcelonës i solli kujtime të shumta dhe Sylvinho zgjodhi t’i ndajë emocionet me ndjekësit e tij në rrjetet sociale.
Ish-mbrojtësi brazilian shprehu mirënjohjen për klubin që i dha mundësinë të shkruante një pjesë të rëndësishme të historisë së tij sportive. Në mesazhin e tij, ai veçoi edhe drejtuesin sportiv të Barcelonës, Deco, me të cilin ka ndarë më herët dhomën e zhveshjes si bashkëlojtar.
“U ktheva në Camp Nou. Është e vështirë të shpjegoj me fjalë se çfarë do të thotë ky vend për mua. Këtu kam përjetuar disa nga ditët më të lumtura të karrierës sime”, shkroi Sylvinho.
Ai falënderoi presidentin, drejtuesit dhe të gjithë njerëzit e klubit për pritjen, ndërsa për Decon pati një dedikim të veçantë, duke e cilësuar si një mik të përhershëm.
“Faleminderit Barcelonës dhe gjithë njerëzve të saj për mikpritjen. Një falënderim i veçantë për Decon, mikun tim të përhershëm”, përfundoi braziliani.
