Kroacia u eliminua në mënyrën më dramatike nga Kupa e Botës 2026, pasi goli i barazimit në minutën e 103-të ndaj Portugalisë u anulua falë një teknologjie të re që shumë tifozë nuk e njihnin.
Mbrojtësi Josko Gvardiol mendoi se kishte realizuar golin e 2-2, duke i dhënë shpresë Kroacisë për ta çuar ndeshjen në kohën shtesë. Fillimisht festa shpërtheu në kampin kroat, por ndërhyrja e sistemit VAR ndryshoi gjithçka. Arbitri norvegjez Espen Eskås u thirr të rishikonte aksionin në monitor dhe, pas analizës, vendosi ta anulonte golin për pozicion jashtë loje.
Pamjet televizive krijuan përshtypjen se Igor Matanović nuk e kishte prekur topin në përpjekje për ta devijuar drejt shokut të tij. Nëse ai nuk do ta kishte prekur, atëherë pas devijimit nga Renato Veiga, Mario Pašalić do të konsiderohej në pozicion të rregullt përpara se të asistonte Gvardiolin.
Megjithatë, teknologjia e integruar në topin zyrtar “adidas Trionda”, i përdorur në Kupën e Botës 2026, tregoi të kundërtën. Sistemi i njohur si “Snicko”, i cili regjistron kontaktet me topin përmes sensorëve të vendosur brenda tij, evidentoi një sinjal të qartë në momentin kur Matanović e preku lehtë topin.
Kjo prekje minimale ndryshoi të gjithë interpretimin e fazës, pasi Matanović rezultonte në pozicion jashtë loje në momentin e kontaktit. Si pasojë, edhe aksioni pasues u konsiderua i pavlefshëm dhe goli i Gvardiolit u anulua.
Vendimi i VAR-it vulosi fitoren e Portugalisë dhe kualifikimin e saj në fazën tjetër të turneut, ndërsa Kroacia dhe kapiteni Luka Modrić i dhanë lamtumirën Kupës së Botës në mënyrën më të dhimbshme.
Teknologjia “Snicko”, e cila është e ngjashme me sistemin e përdorur prej vitesh në kriket për të konfirmuar nëse topi ka prekur shkopin e lojtarit, bëri debutimin e saj në futboll përmes topit inteligjent të Kupës së Botës 2026 dhe rezultoi vendimtare në një nga momentet më dramatike të turneut.
