Manchester United ka vendosur zyrtarisht që të mos lejojë qëndrimin e Alexis Sanchez dhe Chris Smalling, respektivisht te Interi e Roma, edhe gjatë muajit gusht, pasi dëshiron të shmangë përballjen me ta si kundërshtarë, në rast se shorti do i gjejë përballë në Europa League.
Të dy futbollistët kanë qenë pjesë e klubeve italiane në huazim këtë sezon, ndërsa me ndërprerjen e futbollit për shkak të pandemisë, drejtuesit e “djajve të kuq” kanë pranuar huazimin deri në fund të muajit korrik, që përkon edhe me përfundimin e ndeshjeve të kampionatit.
Në muajin gusht Interi e Roma do të jenë të angazhuar në Europa League, ashtu si edhe Manchester United, ndaj drejtuesit e klubit anglez kanë refuzuar zgjatjen e huazimit edhe për këtë periudhë.
Kështu e vetmja mundësi që Interi e Roma të kenë në dispozicion Sanchez e Smalling edhe për muajin gusht, është që të arrijnë marrëveshje për blerjen përfundimtare të tyre më herët se data 31 korrik.