Guglielmo Vicario është prezantuar si portieri i ri i Juventusit. Gardiani italian, i lindur në vitin 1996, nuk e ka fshehur emocionin për transferimin te klubi bardhezi, veçanërisht për faktin se do të marrë një rol që për vite me radhë ka qenë i lidhur me idhullin e tij të madh, Gianluigi Buffon.
Në fjalët e para si lojtar i Juventusit, Vicario e ka përshkruar transferimin si realizimin e një ëndrre të fëmijërisë. Ai ka theksuar se që kur ishte i vogël kishte ëndërruar të përfaqësonte Juventusin dhe se ky moment për të është një pikë kulmore në karrierë.
“Është një emocion i jashtëzakonshëm, sepse është ëndrra e një jete. Që kur isha fëmijë e kam ëndërruar këtë moment. Të përfaqësosh Juventusin është maksimumi që mund të kërkosh”, është shprehur Vicario.
Një pjesë e veçantë e prezantimit ishte lidhur me Gianluigi Buffon. Vicario nuk ka ngurruar ta cilësojë ish-portierin bardhezi si idhullin e tij të madh, duke kujtuar se është rritur duke ndjekur pritjet dhe sukseset e tij me Juventusin.
Madje, Vicario ka treguar edhe më herët në rrjetet sociale se fanella e Buffonit ndodhet në dhomën e tij të gjumit, një detaj që tregon lidhjen e veçantë që ka pasur gjithmonë me legjendën italiane.
Portieri i ri i Juventusit shpreson që një ditë të mund të frymëzojë gjeneratat e reja në të njëjtën mënyrë siç Buffon frymëzoi atë.
“Dua të sjell eksperiencë dhe të krijoj një familje”
Vicario ka folur edhe për atë që dëshiron t’i japë skuadrës së re. Ai vjen pas një eksperience jashtë Italisë dhe synon të sjellë në Torino eksperiencën e fituar gjatë karrierës, por edhe qetësinë dhe komunikimin me shokët e skuadrës.
“Dua të sjell eksperiencë, qetësi dhe komunikim. Synimi im është të krijojmë një grup të bashkuar, një familje të vërtetë juventine, që të na çojë drejt rezultateve të mëdha”, ka deklaruar ai.
Vicario beson se ka mbërritur te Juventus në një moment të duhur të karrierës, me eksperiencë të mjaftueshme dhe me njohuri të fituara edhe jashtë kampionatit italian.
Në fund, portieri ka folur edhe për pritjen që i është bërë nga tifozët bardhezi. Ai e ka cilësuar si emocionuese dhe ka pranuar se mezi pret të zbresë në fushë në Allianz Stadium.
“Kam nevojë për mbështetjen, ngrohtësinë dhe pasionin e tyre. Mezi pres t’i takoj në Allianz Stadium”, është shprehur Vicario, duke e mbyllur mesazhin e tij me thirrjen: “Forza Juventus!”