Koha kalon, por klasi i Zinedine Zidane duket se mbetet i paprekur. Në stërvitjen e tij të parë në drejtimin e kombëtares franceze, të zhvilluar të hënën në Clairefontaine, trajneri i ri i “Les Bleus” u ka treguar menjëherë lojtarëve se talenti i tij teknik nuk është zbehur.
I shoqëruar nga stafi i tij, ku bën pjesë edhe ish-portieri Fabien Barthez si trajner i portierëve, Zidane mori pjesë aktivisht në seancën stërvitore në kuadër të përgatitjeve për ndeshjet e ardhshme të Nations League.
Gjatë një ushtrimi të fokusuar te goditjet në portë, fituesi i Topit të Artë në vitin 1998 u shndërrua në një asistues të vërtetë. I pozicionuar pas portës, Zidane u shërbeu lojtarëve topa me saktësi, ndërsa nuk munguan as këshillat teknike dhe inkurajimet. Ai veçoi veçanërisht paraqitjet e Michael Olise dhe Esteban Lepaul.
Pjesëmarrja e tij në fushë solli kujtime nga periudha e tij si trajner i Real Madridit, kur Zidane shpesh përfshihej në lojërat stërvitore me futbollistët.
“U argëtuam shumë. Ishte kryesisht një stërvitje përshtatjeje. Kur ishim fëmijë, të gjithë ishim tifozë të tij dhe është bukur të mësosh prej tij”, tha Dayot Upamecano.
Mbrojtësi francez shtoi me humor: “Është e vështirë të imitosh kontrollin e topit të Zidane”.
Edhe Maxence Lacroix mbeti i impresionuar: “Duhet të kesh besim te cilësitë e tua. Në çdo rast, ai nuk ka humbur asgjë”.