Milani ka konfirmuar shkarkimin zyrtar të Zvonimir Boban, i cili ishte rikthyer në klubin kuqezi që prej 9 muajsh. Në njoftim thuhet se Milani falënderon Bobanin për punën e bërë, ndërsa konfirmohet mbështetje totale për Stefano Piolin dhe stafin e tij, të paktën deri në fund të sezonit, teksa do të jenë pikërisht rezultatet ato që do të vendosin për më tej.
“Klubi i Milanit ka njoftuar z. Zvonimir Boban për zgjidhjen e menjëhershme të kontratës së bashkëpunimit mes palëve. Ne falënderojmë Boban për punën e bërë gjatë këtyre 9 muajve dhe i urojmë më të mirën në karrierën e tij. Gjithashtu klubi shpreh mbështetjen e plotë ndaj trajnerit Pioli dhe stafit të tij, dhe sheh me optimizëm drejt fazës më vendimtare të sezonit”, thuhej në komunikatë.
Boban ishte njohur me vendimin për shkarkimin e tij që para dy ditësh gjatë një takimi me administratorin e deleguar Ivan Gazidis, pasi ky i fundit nuk ishte pajtuar me disa deklarata të kroatit në lidhje me mënyrën sesi po menaxhohej klubi.
