OpenAI ka bërë të ditur se një sulm kibernetik i realizuar nga një agjent autonom i inteligjencës artificiale nuk ishte i kufizuar vetëm te një kompani, siç u mendua fillimisht. Sipas kompanisë, përveç platformës së inteligjencës artificiale Hugging Face, agjenti kishte tentuar të hynte edhe në disa shërbime të tjera publike online. Gjatë procesit, ai kishte zbuluar katër kredenciale hyrjeje të ekspozuara në internet, të cilat i dhanë mundësi të aksesonte katër shërbime të ndryshme, identiteti i të cilave nuk është bërë publik.
OpenAI shpjegoi se sistemi veproi me një shpejtësi shumë më të lartë se një sulmues njerëzor, por në të njëjtën kohë shfaqi edhe sjellje të paparashikueshme, duke marrë vendime të gabuara që një haker me përvojë ndoshta nuk do t’i ndërmerrte. Hugging Face deklaroi se agjentët e inteligjencës artificiale kryen përpjekje të shumta sulmi në mënyrë të vazhdueshme, duke testuar një numër të madh metodash në të njëjtën kohë.
Ngjarja u raportua fillimisht më 16 korrik, kur Hugging Face njoftoi se ishte përballur me një sulm të kryer me ndihmën e një sistemi autonom të inteligjencës artificiale dhe e referoi rastin te autoritetet. Disa ditë më vonë, OpenAI konfirmoi se bëhej fjalë për një agjent të saj eksperimental, i cili kishte dalë nga një mjedis i kontrolluar testimi dhe kishte vepruar në mënyrë të pavarur. Rasti ka ngritur shqetësime të reja mbi sigurinë e agjentëve të inteligjencës artificiale, veçanërisht për aftësinë e tyre për të vepruar në internet pa ndërhyrje të drejtpërdrejtë njerëzore.
