Ben Blushi promovon romanin “Jam Mysliman” në Rrëshen: Në qytetet e vogla bisedat janë më të thella dhe njerëzit më të sinqertë

Shkrimtari Ben Blushi ka promovuar romanin e tij “Jam Mysliman” në qytetin e Rrëshenit, në një aktivitet kulturor ku u diskutua për letërsinë, fenë, historinë dhe zhvillimet aktuale në vend.

Përmes një postimi në rrjetet sociale, Blushi e cilësoi takimin si një përvojë të veçantë, duke vlerësuar atmosferën e qyteteve të vogla shqiptare dhe pjesëmarrjen e publikut në diskutim.

“Isha i ftuar në një takim të mrekullueshëm në qytetin e bukur të Rrëshenit për promovimin e romanit ‘Jam Mysliman’”, shkroi ai.

Blushi theksoi se qytetet e vogla ofrojnë një klimë komunikimi që, sipas tij, mungon në qendrat e mëdha urbane.

“Qytetet e vogla të Shqipërisë kanë një atmosferë që nuk e gjen më në qytetet e mëdha. Aty biseda është më e thellë, mendimet janë më cilësore, koha është më e plotë dhe njerëzit janë më të sinqertë”, u shpreh autori.

Sipas tij, gjatë aktivitetit që zgjati rreth dy orë, u trajtuan tema të ndryshme që lidhen me fenë, historinë dhe aktualitetin, në një bashkëbisedim të hapur me pjesëmarrësit.