Berisha përballë “precedentit Hajdari” në çështjen ÇEZ

Nga Mero Baze

Kryeministri i vendit Edi Rama ka më në fund një qëndrim të tij ndaj çështjes së ÇEZ. Duke e konsideruar zhurmën e ngritur nga opozita një betejë politike të saj për të çoroditur opinionin, ai heziton të pranojë kërkesën e Berishës, mbështetur më pas dhe nga Meta për një hetim ndërkombëtar të çështjes, duke theksuar se Shqipëria ka ligjet e veta dhe mund të hetojë vet gjithçka.

Qëndrimi i kryeministrit Rama është në një gjatësi vale me qëndrimin e qeverisë së SHBA-së, e cila u shpreh përmes ambasadës në Tiranë kundër një angazhimi amerikan në këtë çështje, ndërsa Bashkimi Evropian sot, përmes zëdhënëses së tij mbështeti qëndrimin e qeverisë Rama për mbylljen e konfliktit me ÇEZ dhe theksoi se kjo i shërbeu marrjes së statusit të Shqipërisë si vend kandidat për anëtar i Bashkimit Evropian.

Këto qëndrime krijojnë kornizën e qëndrimit zyrtar të qeverisë shqiptare për këtë çështje. Qëndrimi i Partisë Demokratike për hetim ndërkombëtar ndërkohë është i ndarë në dy ngjyra. Një qëndrim është ai i linjës zyrtare të Bashës, i cili ka kërkuar hetim vetëm për veprimtarinë e një kompanie,  DIA-s dhe hetim qeverisë Rama përse mbylli marrëveshjen me ÇEZ me negociata ndërkombëtare.

Kjo e dyta me qëndrimet e sotme të Bruskelit dhe të Uashingtonit më parë, bie, pasi dhe Bashkimi Evropian është dakord që ajo çështje të mbyllej ashtu. Si e tillë, për ta nuk përbën as objekt hetimi dhe as ndonjë gabim. E vetmja çështje që i mbetet për hetim ndërkombëtar PD-së është çështja e DIA-s. Për ta ka një hetim ndërkombëtar në Çeki dhe një hetim në Shqipëri. Kështu që kauza e hetimit ndërkombëtar të paraqitur zyrtarisht nga PD-ja aktualisht ka rënë.

E vetmja gjë që mbahet në këmbë, është vendosmëria e Berishës për të mos u hetuar ÇEZ dhe duke shpikur nevojën e hetimit ndërkombëtar. Meta, i cili është pro Berishës në këtë çështje është më shumë si sfidant i tij, sesa si kërkues i domosdoshëm i hetimit ndërkombëtar. Ai e pranoi kërkesën e Berishës, pasi Berisha e bëri atë si sfidë kundër tij, me qëllim që të diferenconte qëndrimet e tij nga qeveria dhe Meta e bëri këtë me lehtësi. Por kur Meta kërkoi hetim të thelluar ndërkombëtar për çdo aspekt të privatizimit të ÇEZ deri tek largimi i tij nga Shqipëria, Berisha nxorri në skenë, variantin e projektligjit Basha-Berisha, i cili kufizonte hetimin vetëm tek Meta dhe Rama, me qëllim dështimin e tij.

Me qëndrimin e ri të qeverisë shqiptare shanset e hetimit ndërkombëtar, janë zvogëluar dhe shanset e hetimit kombëtar janë rritur. Berisha e nisi këtë si lojë për t’i hapur varrin qeverisë, por duket se po shkon vet me këmbët e tij drejtë varrit që ka tentuar të hapë. Tani beteja nuk është më për hetimin ndërkombëtar, por si të bëjmë të besueshëm dhe efiçent hetimin kombëtar.

E gjitha çfarë mund të bëhet, nëse Berisha e ka seriozisht hetimin e ÇEZ është t’i kërkohet SHBA-së dhe BE-së të dërgojnë disa ekspert ose prokurorë të mbikqyrin nga afër procesin me qëllim që ai të mos kompromentohet dhe të mos degradojë. Berisha mund të përballet në këtë rast me precedentin e krijuar për hetimin e vrasjes së Azem Hajdarit. Njëlloj si në rastin e hetimit të Azem Hadjarit, mund të thirret një ose disa prokurorë të huaj të mbikqyrin çështjen nga afër dhe të japin ekspertizën e tyre. Kjo do t’ia rritë besueshmërinë procesit dhe do të provojë sa seriozisht e dëshiron Berisha hetimin ndërkombëtar. Ai s’mund të kërkoj për vete, më shumë sesa pranoi për vrasjen e Azem Hajdarit, ku ra dakord me prokuroren norvegjeze që hartoi raportin e saj për vrasjen.

Shansi, që afera e ÇEZ të hetohet nga prokuria shqiptare dhe me mbikqyrje të ekspertëve ndërkombëtar, është jo vetëm një rast i mirë për të testuar sa seriozisht e kishte Berisha këtë betejë, por dhe rasti i parë, kur drejtësia do të fillojë të merret me të seriozisht. Në mos i shërbeftë për të shkuar në burg, mund t’i shërbejë për tu mësuar sesi të shkojë para prokurorëve për çështje të tjera që mund të hapen më pas.

TEMA