Çfarë fituan shqiptarët nga marrëveshja në Maqedoni?

Nga Kim Mehmeti

“Pra, flini të qetë, sepse shpëtoi Maqedonia: pas bisedimeve të lodhshme mes katër partive parlamentare, u arrit Marrëveshje mes opozitës maqedonase, LSDM-së dhe DPMNE-së! Shqiptarët pyesin se cili ishte roli i BDI-së dhe i PDSH-së në këto bisedime dhe çka fituan shqiptarët e këtushëm nga kjo Marrëveshje ?! BDI-ja dhe PDSH-ja bënë punën për të cilën paguhen dhe që e kanë bërë me vite: i ndihmuan punëdhënësit e tyre – pra qarqet kriminele policore e politike të DPMNE-së – që ‘shumetnikisht’ t’i përballin sulmet e opozitës njëetnike!

Me çka del se edhe nga shqiptarët e këtushëm kërkohet t’i harrojnë të gjitha të këqijat që ua bëri regjimi DPMNE-BDI dhe, të vazhdojnë të bëjnë atë që kanë bërë gjer më tani: të votojnë për BDI-në apo PDSH-në dhe kështu, me dorën e tyre, t’i zgjedhin vasalët shqiptarë, ata që do ia japin legjitimitetin shqiptar sunduesit maqedonas, me çka, cilitdo regjimi, do ia mbulojnë edhe veprimet antishqiptare!

Por duhet pranuar se kjo Marrëveshje, e ka një të mirë: ngaqë ka të bëjë me mosmarrëveshjet brenda etnitetit dhe kampit politik maqedonas, ka gjasa ajo suksesshëm të përmbyllet! Pra nuk është nga marrëveshjet e dala pas ndonjë mosmarrëveshjeje shqiptaro-maqedonase, nga ato që kanë të bëjnë për të mirën e shqiptarëve të Maqedonisë, nga ato që kanë për qëllim blerje kohë dhe pengimin e kalbëzimit të mëtejmë të Maqedonisë, Marrëveshje për të cilat ke përshtypjen se nënshkruhen vetëm që të kemi me çka të merremi ne shqiptarët e këtushëm, ne që ‘kryelartë’ dhe pa kërkuar përgjegjësi apo shpjegim as nga pushtetarët shqiptarë, përballëm ‘Sopot’ e ‘Brodec’, ‘Enciklopedi’ e ‘Shkup 2014’, Likuidimin e Harun Aliut me shokët, si dhe ‘Monstër’ e Kumanovë.

Pra kjo Marrëveshje nuk është, siç ishte, për shembull, Marrëveshja e Ohrit, që u nënshkrua në vitin 2002, që duhej të realizohej deri në vitin 2004, e për të cilën ke përshtypje se ende askush nuk ka arritur ta lexojë deri në fund, e lë më ta realizojë!”