Diplomacia e Ping Pongut

Fjalori diplomatik

Nga Dr. Jorgji Kote

Lindi plot 44 vjet më parë, pas një turi ndeshjesh miqësore ping pongu ndërmjet ekipeve kombëtare të SHBA-së dhe Kinës. “ U pagëzua” me këtë emër jo rastësisht, por për vetë rrethanat historike në të cilat u zhvilluan këto ndeshje; mbi të gjitha, se ping pongu, si sporti më karakteristik i Kinës pati ndikimin e tij të madh publik dhe kulturor në hapjen e epokës së re në marrëdhëniet SHBA – Kinë.

Gjatë asaj periudhe vijonin intensivisht demarshet diplomatike zyrtare për afrimin dhe vendosjen e marrëdhënieve ndërmjet SHBA-së dhe Kinës. Kjo nuk ishte e lehtë, sepse për 22 vite rresht këto dy vende dhe popuj ishin armiq të betuar dhe të papajtueshëm me njeri tjetrin.

Pikërisht në ato momente, ekipi kombëtar amerikan i pingpongut ndodhej në Nagoya të Japonisë, në Kampionatin e 31 Botëror të Ping Pongut. Me atë rast, lidershipit më të lartë kinez të asaj kohe i dërgua kërkesa për vizë për ekipin amerikan për të fluturuar nga Tokio në Pekin, duke propozuar zhvillimin e 3 – 4 ndeshjeve miqësore me ekipin kombëtar kinez, si dy ndër ekipet më të mira të botës. Fillimisht ky propozim nuk u pranua, por më vonë, Mao Ce Duni ndërroi mëndje. Për këtë ai “ ngarkoi” pingponistin e famshëm kinez; kampionin e botës, Zhuang Zedong; duke folur për këtë të fundit, Mao Ce Duni deklaronte se veç “ ping pongut, Zhuangu luan mjaft mirë edhe në fushën e politikës së jashtme” Nga ekipi amerikan me këtë detyrë historike u ngarkua kapiteni i ekipit, kampioni i botës Glen Cowan.

Më 10 prill 1971, ekipi amerikan, me 9 lojtarë, i shoqëruar edhe nga 4 zyrtarë dhe dy bashkëshorte, zhvilloi ndeshjen e parë të pingpongut në historinë e këtyre dy vendeve, sipas parullës “miqësia e para, gara e dyta” Këto ndeshje ndikuan tejet mase jo vetëm në çtensionimin e situatës dhe marrëdhënieve, por dhe në krijimin e një imazhi të pëlqyeshëm për të dy vendet. Kjo i dedikohet edhe mbresave pozitive publike që dhanë lojtarët e të dy vendeve. Për më tepër kur dihet se fjala dhe mesazhet e sportistëve të shquar kanë peshë shumë të madhe. Bashkë me atë mision madhor historik, lojtarët- diplomatë kinezë dhe amerikanë shkruan edhe historinë e diplomacisë së ping pongut, si pjesë përbërëse e asaj të kulturës. Ky tur emblematik i dha një shtysë të fuqishme demarsheve të mëtejshme zyrtare, që disa muaj më vonë çuan në vizitën epokale të ish-Presidentit Nikson dhe takimin e tij me Mao ce Dunin që bëri xhiron e botës.

Diplomacia e ping pongut i dha botës mesazhin bindës se kishte dhe ka në çdo situatë mënyra shumë më tërheqëse, joshëse dhe të buta për afrimin e popujve dhe për kapërcimin e pengesave të Luftës së Ftohtë. 35 vite më vonë, në 9 Qershor 2006, kjo ndeshje u përsërit me të njëjtët lojtarë në Librarinë “Nixon” në SHBA. Vetë ping pingu u “shpërblye” për këtë rol historik, duke u bërë pjesë e garave në Olimpiadat botërore.

Në numrin tjetër të  rubrikës “Fjalori Diplomatik” do të lexoni Diplomacia “shuttle” ose e “ec e jakeve”