Nga Zak Topuzi
Sot çdo vend i botës konkurron për të tërhequr investime, kapital, teknologji dhe ekspertizë të huaj. Debati nuk duhet të jetë nëse investimi është i huaj apo vendas, por nëse ai respekton ligjin, mjedisin, interesin publik dhe krijon vlerë afatgjatë për ekonominë.
Historia na tregon se investimet serioze mbeten dhe i shërbejnë vendit për dekada, pavarësisht se kush i ndërton. Në kohën e Mbretit Zog, shumë prej ndërtesave më përfaqësuese të Tiranës u projektuan dhe u ndërtuan me kontribut të huaj: godina e Bankës, ministritë, komplekset administrative dhe një pjesë e identitetit urban që sot e konsiderojmë trashëgimi të vyer. Ato janë ende aty, zbukurojnë kryeqytetin dhe i shërbejnë Shqipërisë, duke mbuluar katrahurën që i kemi bërë këto 35 vjet.
Shqipëria ka nevojë për më shumë investime cilësore, jo për më shumë frikë nga investimet e huaja. Kritika duhet të ekzistojë, sigurisht, dhe transparenca duhet të kërkohet, por zhvillimi nuk ndërtohet me refuzime në parim. Ai ndërtohet me vizion, standarde dhe aftësinë për të përfituar nga kapitali që vjen për të investuar në vend.
Një muaj më parë, përmes Dhomës së Tregtisë së Tiranës, një studio ligjore amerikane dha leksion për biznesmenët shqiptarë se si mund të hapësh një korporatë në SHBA, si mund të investosh atje dhe se si është më mirë të kesh rezidencën në Delaware (shteti i parë në SHBA dhe më i vogli, pa taksa), i cili stimulon investimet e huaja nga çdo anë e globit! Pse të jemi më nacionalistë ne?!
Mjaft me refuzime sa herë që vjen një investim i huaj! Gati 75% e investimeve të huaja në Shqipëri për vitin 2025 në imobiliare janë nga shqiptarë me leje qëndrimi në botë. Ja pra, vilat në bregdet apo apartamentet në vend nuk i kanë blerë të huajt, por shqiptarët e diasporës! Qetësohuni tani, ju që i quani “tradhtarë” të vdekur!