Ku u mori helikopterin e drogës majori Sokol Feka?

Autoritetet spanjolle po kërkojnë informacion në Shqipëri në lidhje me origjinën e helikopterit  rrëzuar në Malaga e që pilotohej nga majori Sokol Feka. Hetimet e deritanishme nuk e kanë zbuluar ende origjinën e mjetit që u përdor për të transportuar 1 ton hashash nga Maroku në Spanjë. Dyshohet se ai është marrë me qera në Spanjë, por hetuesit nuk kanë arritur të gjejnë se kujt kompanie i përket. Për shkak se helikopteri pilotohej nga një shqiptar, oficer i lartë i ushtrisë, pala spanjolle do t’i drejtohet zyrtarisht Shqipërisë për të kërkuar informacion. Kjo edhe për faktin se Shqipëria disponon të tillë helikopterë, BO 105. Nuk është ende e qartë nëse mjeti është siguruar nga Feka apo nga personi tjetër që gjendej në bord dhe humbi jetën gjithashtu.