Kryeministri Edi Rama është takuar sot me veteranët e luftës me rastin e 5 majit, ditës së dëshmorëve. Në takim shefi i qeverisë ka shprehur respekt për ata që ‘morën armët për të luftuar kundër nazizmit e fashizmit’.
Reagimi, me sa duket, ka ardhur pas një shkrimi të Brizida Gjikondit, mbesa e Teki Kolanecit, komandant partizan gjatë luftës, e cila alarmohej se pse Institutit i Krimeve dhe Pasojave të Komunizmit, një ent shtetëror, botonte libra ku nxihej lufta dhe cilësoheshin krimnelë njerëzit e saj (ndër ta edhe gjyshi i saj).
Me sa duket, formalisht, kryeministri ka marrë sot një qëndrim të ashpër ndaj ISKPK që drejtohet nga Agron Tufa, pasi duket se mendimet e tij janë të njëjta me ato të shkrimtarti Tufa. Mjafton të shfletosh librin ‘Refleksione’ që Rama, atëherë intelektual, ka botuar në bashkëautorësi me Ardian Klosin, ku e quan luftën partizane ‘luftë civile’ me shtysë të emisarëve jugosllavë.
Edi Rama shkruante:
«Duhet pranuar më në funde: hapur që lufta kundër okupatorit degjeneroi në një luftë të përgjakshme civile… shkaktare e së cilës ishte Partia Komuniste Shqiptare e drejtuar nga emisarët jugosllavë».
(Edi Rama dhe Ardian Klosi, “Refleksione“, Shtëpia botuese «Albania», Tiranë 1992, f. 180-181)
Më tutje, në këtë manifest, Edi Rama shkruan: «Histeria e luftës për pushtet që kishte projektuar gjenerali Enver Hoxha dhe marrja e pushtetit me dhunë që ka qenë thelbi i çdo lëvizjeje komuniste, është shkaku i vetëm që ajo luftë kundër okupatorit degjeneroi në luftë civile. Pra çështja e pushtetit është argumenti që zbulon edhe shkakun e tradhtisë që komunistët i bënë demokracisë dhe kombit shqiptar. Prandaj dhe nuk kanë asnjë kuptim thirrjet për harresë dhe për mbyllje dosjesh, kur nuk janë zgjidhur problemet kardinale si Lufta Civile, terrori ndaj inteligjencës e ndaj klerit menjëherë pas luftës dhe në faza të mëvonshme, terrori ndaj rezistencës së organizuar antikomuniste deri në periudhën 1952-1953, qëndrimi ndaj emigracionit politik. Rishikimi i dokumentacionit për këto nyje të rëndësishme të historisë sonë do t’i kthente Shqipërisë figurat e demokratëve, do t’i kthente në jetën normale njerëzit e ndershëm dhe do t’u tregonte vendin inkuizitorëve, që na e bënë atdheun të pabanueshëm dhe që sot bashkojnë zërin e tyre hipokrit me koret e përbotshme për demokraci».
(Edi Rama dhe Ardian Klosi, “Refleksione“, Shtëpia botuese “Albania“, Tiranë 1992, f. 181).
Politiko.al