Në qoftë se PD-ja do t’i kishte marrë votat e 2013-ës…

Në qoftë se PD-ja do t’i kishte marrë në 25 qershor 660 mijë votat e djathta të 2013-ës, të shpërndara në qarqe njësoj si atëherë, do të kishte siguruar 54 mandate (e jo 43), PS-ja do të merrte vetëm 65 mandate (e jo 74), LSI-ja do të merrte 17 mandate (e jo 19), ndërsa PDIU-ja do të merrte po 3 mandate.

Nga Eduard Zaloshnja

Në garën e 25 qershorit, PD-ja i përfshiu kryetarët e partive aleate në listat e saj të deputetëve. Si rezultat, ata u bënë thirrje përkrahësve të tyre të votonin për PD-në, si sigla e vetme që do të përfaqësonte opozitën. Në këto kushte, ishte më se e natyrshme që PD-ja të synonte të merrte të paktën aq vota sa kishin marrë para katër vjetësh të gjitha partitë opozitare së bashku.

Në 2013-ën, koalicioni i PD-së mori 680 mijë vota, por prej tij u largua PDIU-ja, ndërkohë që u afrua PBDNJ-ja. Me pak fjalë, 25 partitë opozitare që u përfaqësuan me siglën e PD-së në 25 qershor, kishin marrë 660 mijë vota para katër vjetësh (Në fakt, po kaq vota kishin marrë edhe kandidtatët opozitarë për kryebashkiakë para dy vjetësh).

Por në 25 qershor, PD-ja mori 200 e ca mijë vota më pak se sa 660-mijëshi i mëparshëm, ndërkohë që PS-ja, LSI-ja PSD-ja e të tjera parti të majta morën 1 milion vota (si në 2013-ën).

Në qoftë se PD-ja do t’i kishte marrë në 25 qershor 660 mijë votat e djathta të 2013-ës, të shpërndara në qarqe njësoj si atëherë, do të kishte siguruar 54 mandate (e jo 43), PS-ja do të merrte vetëm 65 mandate (e jo 74), LSI-ja do të merrte 17 mandate (e jo 19), ndërsa PDIU-ja do të merrte po 3 mandate.