Një shoqëri që përfundon të lëmosha e shtetit nuk është më e lirë!

Nga Ylli Manjani –
“Nëm pak bukë!

Të mendohesh thellë, më e mira që mund t’i bësh, është ta helmosh. Se helmi është ilaçi i fukarallëkut.

E di që feja dhe ligji më helmojnë mua, po të bëj një vepër të tillë. Se njeriu s’ka të drejtë t’ia marrë jetën njeriut. Po a ka vallë njeriu të drejtë t’ia shtojë vuajtjet tjetrit? Se lypësi me lekun tim s’bën tjetër veçse shton ymrin, domethënë jetën, domethënë fukarallëkun. Mëshira private nuk e zgjidh kurrë problemin shoqëror.” –

pjesë nga tregimi Lypësi i të vërtetit Rilindas NONDA BULKA
***

Aktuale?!
Në çdo kohë kështu është!

Askush, aq më pak një shoqëri mund të jetojë me lëmoshë.

Si të varfrit ashtu dhe të pasurit sot presin ndihmë, e cila pavarësisht emrit që i vëmë subvension, mbështetje, pagë lufte apo qese me ndihma, LËMOSHË është!

Shoqëria kur katandiset tek lëmosha e shtetit,nuk ka sesi të jetë më e lirë. Dhe një shoqëri jo e lirë meriton atë që thotë Nonda, helmin. ???

Nuk jetohet në liri si në jetimore. Megjithë dashamirsinë e “më të mirit nga të këqinjtë”, Atij pra, babait të kombit, prap nuk jetohet me lëmoshë!

Në shoqërinë e lëmoshës kombit i dalin për zot shumë baballarë, por nëna e kombit pjell veç të varfër, njerëz jo të lirë.

Bëmë, ç’bëmë u hodhëm e u pordhëm këto 30 vitet e fundit e nisëm me idenë e ekonomisë së tregut e përfunduam në ekonominë e lëmoshës.

Kjo nuk shkon më! Nuk mban më edhe po të duam ta mbajmë. Se as lëmoshë sdo ketë më, shumë shpejt…

Jo vetëm kjo krizë, por e gjithë mbijetesa e në vijim mirqënia zgjidhen vetëm me PUNË në një EKONOMI të LIRË e KONKURUESE.

Lëmosha vetëm zgjat të krizën. Ajo e shtetit zgjat sundimin. Lëmosha e shtetit të padrejtë thellon pabarazinë.

Koncepti i sotëm ekonomik po kalon në faliment total. Pa dyshim të merituar, sepse i ramë si n’top t’karadakut të gjitha burimeve, mbi të gjitha atyre njerëzore.

Më të zotët i përzumë të punojnë për shoqëri të tjera. Kush mbeti jeton me kontributin e tyre dhe me mëshirën e shtetit. Pra as i lirë e as i ngopur.

Prandaj duhet RISTART i punës dhe i ekonomisë së tregut të lirë.

Tregu i lirë është magjia, jo lëmosha.

#ristartpërditëmëtëmira#