Përparim Kabo: Pse po e mbyll RTSH apo t’ju bësh nder televizioneve konkurente private!?

Nga Përparim Kabo

Ndaj një realiteti pesimist, së fundmi dëgjuam nga Kryeministri i vendit, zoti Edi Rama, se ai nuk mund t’i japë fonde Televizionit Shqiptar, i cili qenka në një gjendje shumë të rëndë, dhe se ka urdhëruar mbylljen e RTSH-së përkohësisht, ose përfundimisht. “Unë – u shpreh ai – që nga viti 1990 nuk e ndjek RTSH-në.”
Kjo më kujtoi kryetarin Mao, i cili thoshte: “Unë nuk e lexoj Zhemin Zhibao-n”.

Zoti Kryeministër, kur ju nuk e ndiqni RTSH-në, nga e dini se kjo media kombëtare duhet mbyllur? Më tej dhatë edhe argumentin se, ndryshe nga mediat e tjera, RTSH-ja e ka të siguruar buxhetin. Ju u shprehët: “Unë nuk merrem me mediat.” Faktet tregojnë të kundërtën.

Ju i keni quajtur mediat private “kazan”, emisionet e mbrëmjes ku thirren fjalë pa përgjegjësi i keni quajtur “banaqe”, gazetarin e keni kapur për veshi. Me RTSH-në jeni marrë edhe më shumë. Sa kohë që jeni Kryeministër, keni paracaktuar drejtorin e përgjithshëm dhe keni zgjedhur Këshillin Drejtues, ku kryetari zgjidhej për qokë. Keni marrë një person nga Top Channel dhe e keni bërë drejtor në RTSH. Tani thoni se duhet mbyllur, sepse “nuk është kërkund”.

Le t’i marrim gjërat me qetësi, hap pas hapi.

Shumica e shqiptarëve të varfër nuk kanë para të blejnë karta, dekodera apo antena parabolike për të parë Digitalb-in apo Tring-un. Ata shohin RTSH-në, dëgjojnë Radio Tiranën dhe Televizionin Shqiptar.

Vetëm në TVSH ka një emision për fëmijët me traditë, dikur me Zija Grapshin dhe Marika Kallamatën, e vitet e fundit me Keti Gjonçën. Shqiptarët kanë 65 vite që ndjekin emisionin “Trupi dhe Shëndeti”, i cili zuri fill me Hamdi Sylçebeun në emisionin radiofonik “Këshilla mjekësore për nënën dhe fëmijën”, dhe vijoi me mjekun pasionant Flamur Topi.

“Teatri në Mikrofon” na rriti. “Nga njëra ndeshje në tjetrën”, transmetimet radiofonike me Anton Mazrekun, Ismet Bellovën, Ahmet Shqarrin, Aleko Gjergon, Ymer Sterniqin etj. Vetëm RTSH transmeton ndeshjet e kampionateve të lojërave me dorë, mundjes, ngritjes së peshave, çiklizmit, shahut dhe alpinizmit.

Emisioni “Hapësirë e blertë” i gazetarit pasionant Marash Mirashi ishte një mrekulli për natyrën shqiptare dhe agrobiznesin; nuk e di kush e mbylli. Dokumentarët historikë, dokumentarët për personalitetet e artit, kulturës, shkencës dhe sportit janë pasuri kombëtare.

RTSH transmeton kampionatin e Superligës së futbollit shqiptar pa pagesë shtesë, dhe jo siç veproi para disa vitesh Supersporti. Ndeshjet e ekipit kombëtar duhet t’i transmetojë RTSH-ja, ashtu siç bën në Itali RAI 1. Çfarë parash kërkon federata? Pak para merr nga UEFA dhe FIFA. Jo, tani duhet t’i shohim te Klan-i.

RTSH ka xhiruar filma nga më të bukurit, si p.sh. “Udha e Shkronjave” etj. Orkestra Simfonike e RTSH-së zhvillon koncerte çdo të premte me artistë shqiptarë dhe të huaj; i regjistron koncertet dhe i transmeton. Kohët e fundit, ju jeni shprehur, zoti Kryeministër, se atë që bëtë me orkestrën e Operas për rritje page do ta bënit edhe me Orkestrën Simfonike të RTSH-së.

Në fund të vitit zhvillohet Festivali i Këngës; njerëzit e presin me emocion dhe nostalgji. Edhe kjo ngjarje e kulturës kombëtare duhet fshirë? Po pse? Vetëm RTSH ka një emision për arsimin, “Auditor Arsim”, që drejtohet me pasion nga Edlira Birko. Televizionet private as që merren me arsimin. Atje gëlojnë telenovelat e huaja, emisionet vulgare dhe banaliteti i bojatisur.

Çdo media, edhe ajo private, kryen funksion publik, sa kohë që informon publikun dhe mban marrëveshjen me të vërtetën. Por media publike, siç është RTSH-ja, ka mision ruajtjen e identitetit kombëtar dhe të kujtesës institucionale. Kanali RTSH Kuvend transmeton punimet e Kuvendit të Shqipërisë dhe fjalimet e personaliteteve që e kanë vizituar vendin. Nëse mbyllet RTSH-ja, e gjithë kjo pasuri, kjo kujtesë audiovizive, fshihet dhe humbet.

Zoti Kryeministër, nëse në RTSH është abuzuar me të famshmet projekte, siç edhe ka ndodhur, le të shkojë KLSH-ja dhe Prokuroria. Nëse ka organikë të fryrë, të zvogëlohet. Nëse ka gazetarë pa vlera profesionale, të largohen. Nëse ka hapësira që nuk shfrytëzohen, të jepen me qira. Por, zoti Kryeministër, RTSH ka një pasuri të pazëvendësueshme: kujtesën e popullit. Siç thonë hebrenjtë e hershëm: “Kujtesa ka gjithmonë të drejtë.”