Presidenti serb, Vuçiç kërkon të rrisë pushtetin e tij mbi sistemin gjyqësor
Deklarata e Sekretarit e Shtetit në Ministrinë e Drejtësisë, Radomir Iliç, që Kushtetuta e Serbisë duhet të ndryshohet në mënyrë që gjyqësori të kontrollohet nga jashtë, “në mënyrë që (Aleksandar) Vuçiç të ketë mundësinë të zgjedhë gjykatës dhe prokurorë” ka provokuar një reagim të fortë publik.
Iliç tha, ndër të tjera, se gjyqësori dhe gjykatat janë bërë “një degë e papërgjegjshme e qeverisë” dhe “një sistem i mbyllur që kujdeset vetëm për veten”, duke përmendur shembullin e Francës, ku gjyqtarët dhe prokurorët emërohen nga Presidenti.
Ekspertët besojnë se ideja që qëndron pas këtij sugjerimi, që presidenti Vuçiç “rregullon” gjyqtarët dhe prokurorët edhe pse ai tashmë po ndërhyn në punën e tyre, zbulon se Sekretari i Shtetit nuk është aspak i njohur me modelin francez që ai përmend, sepse, në Francë, Presidenti i emëron gjyqtarët dhe prokurorët, por ata zgjidhen nga një ekip ekspertësh.
Vuçiç mohoi që ai donte të kontrollonte gjyqësprin në Serbi, duke shtuar se kjo ide ishte “krijuar nga ata që nuk dinë çfarë të bëjnë”.
Dragana Boljeviç, presidente e Shoqatës së Gjykatësve Serbë, thotë se deklarata e Radomir Iliç është një tregues tjetër se politikanët serbë nuk duan të ndajnë pushtetin e tyre.
“Sugjerimi i tij për të caktuar gjyqtarë dhe prokurorë të emëruar nga Presidenti i Serbisë nuk është gjë tjetër veçse dëshira për të pasur një privilegj shtesë, jo për të përmirësuar gjyqësorin. Një gjykatës i disiplinuar, i cili dëgjon Vuçiçin, është gjykatësi i vetëm i mirë sipas qeverisë aktuale. Politikanët tanë nuk mund të pranojnë që Kushtetuta ka shpallur ndarjen e pushteteve, shtetin e së drejtës dhe pavarësinë e gjyqësorit, “thotë Boljeviç, duke shtuar se nuk është e vërtetë që Presidenti i Francës zgjedh gjyqtarët, por përkundrazi ata zgjidhen nga Këshilli i Lartë i Magjistraturës dhe Presidenti vetëm i emëron ata.
“Të drejtat e tij janë disi më të gjera në përzgjedhjen e prokurorëve, por Franca aktualisht po punon për të ndryshuar Kushtetutën dhe për të kufizuar ato të drejta. Në çdo rast, në të gjithë botën, një ekip ekspertësh zgjedh gjyqtarët dhe prokurorët dhe dallimi i vetëm qëndron nëse ata do të emërohen nga një Ministër, një President ose një Monark, “thekson Boljeviç.
Presidenti i shoqatës së avokatëve në Beograd, Vladimir Gajiç, thotë se deklarata e sekretarit të shtetit është një hyrje në propozimin për të vendosur funksionin e Presidentit të Republikës të përjetshëm.
“Vuçiç nuk dëshiron asnjë votë e lirë në gjyqësor. Megjithëse ka gati 20 gjyqtarë, prokurorë dhe avokatë në Serbi që flasin hapur për diktaturën e tij në Serbi, Vuçiç nuk mund t’i durojë këto sulme. Ai dëshiron kontroll të plotë të gjyqësorit. Është parim i mafias. Vuçiç është e kundërta e shoqërisë serbe, si një reflektim në pasqyrë. Kjo është arsyeja pse ne jemi ku jemi, duke qenë ndoshta shoqëria më e dobët në Evropë, ‘thekson Gajiç.
Prokurori i Përgjithshëm Goran Iliç thotë se është i hutuar nga deklarata e Sekretarit të Shtetit sepse politika tashmë luan një rol të madh në sistemin gjyqësor dhe Sekretari i Shtetit dëshiron ta rrisë ndikimin e politikës në gjyqësor, jo ta zvogëlojë.
Përshtati: Lindita Kokoli, Koha Jonë
