Saranda e bukur dhe e qetë, tani si Palermo në vitet ‘80!

Nga Mentor Kikia

Një tjetër krim trondit qytetin e Sarandës. Një 44-vjeçar vritet në mes të ditës, në mes të qytetit. Vrasësit largohen me motor, me kokore të zeza.

Nëna e viktimës arrin në vendngjarje, shikon trupin e të birit dhe fillon të qajë me ligje e vaj.

Më rrëqethi vajtimi i nënës së tij, ndërsa i drejtohej djalit të pajetë.

Mediat raportojnë se krimi mund të lidhet me një plagosje, me një atentat, me një rrëmbim, me një shpërthim me tritol, apo me një tjetër ngjarje të ngjashme… Por, në të vërtetë, ende nuk dihet me saktësi se kush dhe përse e vrau 44-vjeçarin në mes të rrugës.

Saranda, qyteti më i qetë në Shqipëri, ku dikur as dyert nuk ishte nevoja t’i mbyllje, është bërë Palermo e viteve ’80-’90.

Kriminalizimi i ekonomisë, vënia e qytetit nën kontrollin e të fortëve, dështimi apo inkriminimi edhe i vetë policisë, e kanë kthyer këtë qytezë të bukur e të qetë në një xhungël, ku hotelet dhe klubet e natës, në shumë raste, kanë më shumë roje sesa kamarierë.

Çfarë dhimbjeje për Sarandën që nuk është më siç ka qenë …