Sokol Balla: Koalicioni bie në Dibër

“Të mërkurën Meta dhe Rama duhet të ndajnë se çfarë do të bëjnë me Dibrën. Gara lokale për kryebashkiak atje do të jetë një mision i vështirë, jo thjesht për shkak të videoskandalit, sesa faktit se”…

Nga Sokol Balla

Nuk është hera e parë që e majta testohet në Dibër. Zgjedhjet e qershorit 2009 u ndanë në Dibër. Rezultati katër me dy në favor të PD, përcaktoi shifrat 70 me 66 në favor të demokratëve në rang kombëtar, çka më pas i hapi rrugën negociatave me LSI dhe katër mandateve të saj, pasi matematikisht u bë e pamundur një negociatë me PS.

Shtatë vjet më vonë, pas shkarkimit të kryebashkiakut Xhelili, është përsëri Dibra që do të testojë koalicionin e majtë. Gara e parakohshme elektorale për qytetin, është tashmë një dënim i parashkruar për të majtët, të cilët ose duhet ta rifitojnë qytetin, ose duhet të përgatiten të futen sërish të ndarë në zgjedhjet e përgjithshme të 2017.

Rasti Xhelili është veçse i fundit në përplasjet e brendshme PS-LSI. thashethemnajat se videoskandali i kryetarit të bashkisë është përgatitur apo përdorur politkisht nga partia e Metës, mund të jenë pjesërisht të vërteta tek pjesa e fundit: Shukri Xhelili nuk ishte personi më i dashur për LSI. Ose më saktë ai simbolizonte përplasjen mes dy partive të koalicionit. Ai fitoi në sekondë të fundit në Lokalet e 2015, pasi PD vetë u përça në katër copa dhe katër kandidatë. Dhe sepse LSI ka qejf të mendojë se në këtë situatë optimale votat e saj i dhanë atij një mandat kryebashkiaku që as mund tëmendohej më parë. Por nuk e mendonin kështu deputetët socialistë të qarkut, të cilët, sipas ankesave që vijnë nga deputetët e LSI, i mbyllën dyert e bashkisë më të madhe të qarkut për mbështetësit e Metës. Konspiracioni shkoi kaq larg, saqë dy tre muaj më parë, kur u duk se për kryetarin e qarkut PS po mbyllte pazarin me PDIU, LSI bashkoi forcat dhe votat me PD dhe zgjodhi në krye të këtij këshilli një demokrat. Deputeti i LSI i qarkut nuk ju fsheh kamerave atë ditë, duke dhënë idenë se nëse përplasja bëhej në Dibër, urdhërat tashmë, vinin nga Tirana.

Tirana duket se ka sot në dorë, fatet e Dibrës, por në fakt është e kundërta. Koalicioni i majtë, duket i drobitur sërish nga fërkimet e brendshme. “Balili dhe Xhelili” kanë rindezur alarmin e kuq, se edhe nën ndikimin e një fushate të paprecedentë bombarduese dhe agresive të polit Berisha dhe kryeqytetarëve të tij dixhitalë, po çojnë sërish drejt përplasjes Ramën dhe Metën. Kjo ka bërë që takimi i tyre i kësaj jave të mërkurën të jetë thuajse po aq i rëndësishëm, sa darka e tyre tek Shtëpia e Koços në mars 2013, kur ata çimentuan rilidhjen e tyre dhe Rilindjen e së majtës. Në një tjetër ogur jo aq të mirë, Koço sot nuk është më garant i akordit. I përjashtuar nga Kuvendi dhe i tradhëtuar nga të gjithë, ai nuk kurseu të premten as ish mikun e tij Ilir Meta, kur erdhi puna tek anatemimi që iu bë nga PD, si sponsor politik i Klemend Balilit.

Të mërkurën Meta dhe Rama duhet të ndajnë se çfarë do të bëjnë me Dibrën. Gara lokale për kryebashkiak atje do të jetë një mision i vështirë, jo thjesht për shkak të videoskandalit, sesa faktit se

Shukri Xhelili edhe pa të, simbolizonte përçarjen mes të majtëve dhe një fitore aksidentale për shkak të çarjes lokale të vetë PD. Kjo çarje meqë ra fjala, ekziston akoma dhe e provoi vetë Edi Paloka kur ishte atje të shtunën. Por tashmë edhe kjo çarje nuk është më argument për një fitore të së majtës. Deputetët e majtë lokalë dhe dy krerët e tyre në Tiranë tani duhet të ndajnë mendjen: ose të punojnë të fitojnë Dibrën me një kandidaturë të mirë dhe të ndershme, ose pas humbjes së saj, të ulen dhe të bëjnë një divorc të qetë për 2017. Në rast se e majta nuk nxjerr rezultat pozitiv në zgjedhjet e parakohshme lokale për kryetar bashkie, është e kotë të fshihen pas brekëve të Shukriut. Së paku në këtë rast, nuk do ishte faji i tij. Por i brekëve të rëna të koalicionit në Tiranë. “Javanews”