Berisha: Pse i thashë “JO” Ilir Metës për President

Në një intervistë për gazetaren Mirela Milori të ABC sepse ish-kryeministri Sali Berisha ka zbardhur për herë të parë dy kërkesa të bëra nga kreu i LSI-së Ilir Meta gjatë kohës që ata  bashkëqeverisën në vitet 2009-2013. Berisha thotë se Meta i kishte kërkuar në fillim drejtimin e Kuvendit dhe më pas ka patur ambicie për t’u bërë President. Në këtë intervistë të gjatë Berisha flet edhe për shumë çështje të tjera si themelimi i PD, opozita e Bashës, qeverisja e Ramës, hapja e dosjeve, korrupsioni, etj.

Pyetje:  Mirëmbrëma z. Berisha. 24 vite më parë është themeluar Partia Demokratike. Në momente të tilla historike protagonistë apo personazhe të caktuara duan të rrëfejnë historinë e atij momenti. Unë mendoj se ju jeni një personazh apo personalitet që mund të rrëfeni më shumë se kushdo, se çfarë ndodhi 24 vite më parë. Si u themelua Partia Demokratike?

Berisha:  Ndodhi një mrekulli. Realisht një mrekulli e papritur. Në gjendjen thellësisht të izoluar, por edhe me shumë pak shpresë që gjendej Shqipëria asokohe, në tërësi mendohej se Shqipëria do të mbetej si “Kuba” e Adriatikut dhe në Shqipëri nuk do të ndodhnin ndryshimet që ndodhën në vendet e tjera. Kështu që, lëvizja studentore, ndonëse në një terren që mezi e priste, ishte në këtë drejtim vendimtare. Unë jam rikthyer me qindra herë atyre orëve dhe ditëve që ndryshuan historinë e  vendit dhe çfarë gjej kur rikthehem prapa. Në mendjen time gjithnjë e më shumë përforcohet mendimi se ajo që ndodhi mund të ndodhte vetëm nga studentët dhe në Shqipërinë e asaj kohe, askush tjetër nuk mund të realizonte  gjunjëzimin e diktaturës përveç atyre. Ndër të tjera si dëshmitarë i atyre ditëve, studentët kishin një kurajë dhe guxim, të jashtëzakonshëm. Natyrisht kishin një listë kërkesash dhe në listën e kërkesave të tyre ishte pluralizmi politik. Por mbi të gjitha ata kishin një guxim dhe kurajë të papërballueshme dhe në këtë kontekst, së bashku me çfarë përfaqësonin ata studentë, ishin në këtë mrekulli, energjia e saj dhe të pazëvendësueshmit e saj. Natyrisht duhet të pranoj këtu se vetëm studentët nuk do t’ia dilnin. Më shumë them se nuk do t’ia dilnin. Pse? Sepse në rast se keni ndjekur intervistat e Ramiz Alisë, Ramiz Alia ishte kundër. Nuk them se Ramiz Alia ishte gjakësor si Enver Hoxha, por ishte absolutisht diktator, i cili sundoi si Hoxha. Për këtë jam i sigurt dhe ai këtë e thotë në interviste, ‘se unë nuk kam qenë për pluralizëm’ dhe këtë e ka thënë vite pasi është shpallur pluralizmi në Shqipëri.  Çfarë e gjunjëzoi Ramiz Alinë dhe nuk e ndërmori as mbylljen e universiteteve dhe futjen e ushtrisë në universitete. Ishte klasa punëtore. Ajo e cila ishte konsideruar për mbi 40 vite si Leva e fuqishme e partisë. Ardhja në Qytetin Studenti të demonstruesve  të pafund nga Kombinati Poligrafik, dhe keni parasysh që ndërmarrjen poligrafike konsideroheshin ndërmarrje strategjike, ideologjike etj, etj.  Bashkimi i tyre me studentet e bëri diktaturën absolutisht të pashpresë. Natyrisht një rol të padiskutueshëm patën intelektualët ato ditë, por përsëri nëse i shkëpusim dhe i marrim si një grup i veçantë, diktatura brenda dy orëve ata i bënte të heshtur duke i degdisur, internuar, arrestuar dhe nuk kishte një mundësi. Kështu që kjo ishte një mrekulli e vërtetë, një mrekulli studentore. Por dua të njoh, gjykoj unë, mund të jem edhe i gabuar, se përcaktuese në gjunjëzimin përfundimtar dhe ne vendimin që mori plenumi ishin gjithashtu bashkimi me studentët pasivisht i ndërmarrjeve të Tiranës. 

Pyetje:  Mund të na kujtoni një moment nga nata dhe firma që ju u zgjodhët kryetar i Partisë Demokratike?

Berisha:  Momenti më i pashlyer në jetën time është kur unë shkova dhe u ulëm bashkë me Besnik Mustafajn, u ulëm me Azemin, dhe 4-5 të rinj të tjerë, në një klub të Qytetit Studenti. Tani, në fakt ata më kishin kërkuara mua. Unë i kisha takuar përpara një grup të madh dhe Azemin, kur studentët i rrahën barbarisht aty ku sot është rezidenca e ambasadorit italian. Ka qenë muze dhe ata po demonstronin. Forcat e ndërhyrjes së shpejtë të pajisur me mjete dhune, përfshirë lopatat i vërsulën me tërbim kundër tyre, i rrahën dhe i copëtuan. I denoncova aty. Ju thash se unë para gjithë botës do t'i denoncoj për këtë barbari, sepse ju i keqtrajtuat, por , – jo thanë ata, na gjuajnë me gurë. Në fakt nuk gjuajtën as me gurë dhe me asgjë.  Ata thjeshtë  po hidhni parulla, “Poshtë Dinastia”, “Poshtë Diktatura”.  Rreth muzgut shkoj dhe i takoj me Besnikun. Na nxjerrin një letër me kërkesa dhe shikoj aty pluralizmin. Tani, – ju them unë, – hiqini të gjitha dhe këtë të mbajmë. Më pas e merr Besniku dhe po bisedonte me disa të tjerë. Studentë tmerrësisht të vendosur. Të vendosur për çdo çmim dhe për çdo gjë.  Dhe i gjithë përqendrimi i tyre ishte se mos po devijohet qoftë edhe gjëja më e vogël për arsye frike. E vetmja gjë që ju kam thënë është se ne duhet të ecim në rrugën tonë në pluralizmin. Pastaj ka pasur shumë momente. Kur themeluam Partinë. Arben Imami, Eduard Selami dhe këta të tjerët pasi u kthyen nga takimi me Ramiz Alinë, u bë një miting foli Arben Imami dhe i njoftoi për rezultatin e takimit, përshëndeta edhe unë dhe thotë Arbeni çfarë do të bëjmë tani. I them partinë menjëherë. Thotë ai: –  pse me kaq ngut.  I them: – nesër nuk dihet sesi mund t’ju kthehet mendja.  Kjo ka qenë momenti ku jemi futur në një ambient në Qytetin Studenti, kemi ftuar të gjithë ato që menduam se duhet të ftonim. Mbeti ndonjë pa ftuar po njëlloj ishte dhe themeluam partinë. Këto janë disa nga momentet më të veçanta.

Pyetje:  Në fakt që kur është themeluar Partia Demokratike, gjatë 24 viteve ju keni qenë një emër që keni shenjur politikën  por jo vetëm të Partisë Demokratike dhe në fakt edhe pas 24 vitesh edhe në këtë Partinë e re Demokratike  përsëri jeni ju ai që shënjoni duke u nisur nga kryesia e re, emrat e rinj që promovohen në PD . Cili është opinioni juaj. A kanë bazë këto deklarata?

Berisha:  Nga dita e vendimit për të ndjekur lëvizjen studentore dhe për të qenë aktiv në këtë lëvizje, më duket se një ditë para themelimit të partisë, më thotë Besnik Mustafai, i cili për hir të së vërtetës duhet të them ka qenë ditë e natë me mua që nga momenti i parë nuk u nda me. Më thotë, – Sali ne tani e bëmë detyrën tonë, ne pluralizmin kemi dashur dhe kaq.  Jo i them. Pse jo, – më thotë ai. I them, – e para Besnik, ne do të qëndrojmë sepse unë një vendim e kam marrë dhe unë mund t’i ndihmoj këto. Unë jam gjakftohte.. sepse procesi mund të prishej nga dhuna, pala tjetër ishte e gatshme për dhunë dhe i kishte të gjithë mjetet e dhunës. Unë isha gjakftohte dhe nuk mund të merrja vendime me nxitim  dhe me gjaknxehtësi dhe në këtë aspekt në një mënyrë mund ti ndihmoja studentët.  Së dyti i them është çështja e Kosovës. Do të qëndroj sepse ajo duhet të marrë tani një dimension tjetër.

Pra në fakt në thelb unë kam hyrë me një kontratë. Një kontratë me Shqipërinë, të cilën… Mirela po të lexosh disa shkrime të botuara në vitin 90 në tërësi ato përmbajnë një platformë politike jo të detajuar, por shumë të qartë dhe ajo ishte platforma politike për të cilën unë ëndërroja Shqipërinë.  Nga e kisha marrë platformën? Që të gjitha nga vendet e Europës ish komuniste që po binin njëra pas tjetrës ose që po luftonin. P.sh. njeriu që më ka frymëzuar më shumë në jetën time politike, nuk ka qenë një politikan në atë kohë, nuk ka qenë një disident, ndonëse se i kisha analizuar të gjithë. Andrei Saharov. Po pse Saharov? Sepse Saharov ishte një shkencëtar, i cili më impresiononte pozitivisht sepse ky kishte braktisur studimet për fiziken bërthamore dhe merrej tani me të drejtat e njeriut. Unë asokohe, duke u frymëzuar prej atij, arrij në përfundimin se të drejtat e njeriut janë një e vërtetë më e madhe sesa ato që studioja unë. Saharov nga ana tjetër i kërkon, Komitetit Qendror të Bashkimit Sovjetik të heqë nenin e Kushtetutës i cili i jepte forcën hegjemone Partisë Komuniste të Bashkimit Sovjetik. Të njëjtën gjë i kërkova Ramiz Alisë unë dhe ai ishte thelbi, sepse me atë nen pluralizmi ishte burokratik dhe jo politik. Pluralizmi burokratik ekzistonte, por ai nen e shuante si realitet. Pra unë u bashkova me lëvizjen me një platformë të qartë por jo me një platformë për Partinë Demokratike, por për Shqipërinë. Pra një kontratë në të vërtetë me Shqipërinë, një kontratë me kombin sepse kombi ishte i ndarë. Nuk mund të thoja një kontratë në Shqipëri. Pra për kombin me Kosovën, sepse kjo ishte pjesa e pushtuar. 24 vjet unë u përpoqa të bëj më të mirën në zbatimin e këtyre kontratave. Në një moment shqiptarët nuk votuan më kontratën me mua dhe unë as i qortoj dhe as që jam zemërthyer, përkundrazi, vura në veprim atë vendim që kisha në shpirt që nga ’91. Në rast se do të humbas zgjedhjet qartë dhe haptas, unë do ti them  mirupafshim. Këtë bëra. Dhe nuk kam asnjë keqardhje. Sepse çdo kontratë në një moment të caktuar mbyllet. Kontrata nuk janë të përjetshme.

Pyetje:  Ndikimi juaj në PD e re. Ka zëra që thonë se edhe kryesia është zgjedhur sipas diktimit tuaj?

Berisha:  Absolutisht jo. Ta them me sinqeritet dhe me bindje, absolute jo. Problemi është këtu. Kryetari i  ri ka sjellë një risi që ju ka shpëtuar mediave, pro një risi me shumë rëndësi  në strukturën e partisë. Një njeri – një mandat. Në periudhën time kishte, një njeri kishte tre mandate ndonëse Partia pëlqen gjithmonë një njeri një mandat. Z. Basha iu përmbajt në maksimum këtij parimi, kështu që parimi një njeri – një mandat dikton shumë gjëra. Ka edhe anë jo-pozitive. Mund të ketë njeri që i bën dy mandate, por kur teprohet është shumë negativ, ndaj dhe në tërësi është një parim i drejtë. U shpëtoi mediave ky konstatim. Çfarë solli ky parim. Ky solli një zhgënjim në lidershipin e PD nga baza deri në qendër dhe unë them se kjo është pozitive. Së dyti, kryetari konceptoi ndërtimin e një kryesie që nuk  ka ekzistuar më parë. Cila është? Një kryesi strikte funksionale. Ti ke këtë funksion dhe do të jesh anëtar kryesie. Departamente kemi pasur gjithmonë, por asnjëherë si kemi pasur drejtorët e departamenteve anëtarë kryesie. Ky është një model i ri, por në opozitë, gjykoj se do të japë fryte shumë të mira. Pse? Sepse ti sot ke vërtetë departamente shumë të mira paralele të qeverisë. Unë nuk po i quaj qeveri hije  por e vërteta është se në një formë ose në një tjetër këta janë një kabinet në hije. Të paktën për opozitarizëm dhe program. Nëse ju  kujtohet  dhe ka qenë një risi KOP-i. Unë krahasoj KOP-in  me këtë kryesi, është eprore kjo kryesi ndaj KOP-it që ndërtova unë në fund të vitit 2004. Pse? Së pari mbi 35 prej tyre janë njerëz politik dhe teknokratë janë njerëz të fushës, janë profesorë, kanë qenë këshilltarë të kryeministrit, të ministrave. A ka disa prej tyre që nuk kanë qenë? Po ka dhe kjo është gjëja më normale. Më kujtohet mua, para 4-5 vitesh, 40% e kryesisë është ripërtërirë. 45% e Këshillit Kombëtar është ripërtërirë. Dhe kur ti ripërtërin vetëkuptohet se do të marrësh njerëz  që pasqyrojnë disa veti pozitive dhe jo tërësisht.  Unë gjykoj se vërtet kjo është një kryesi absolutisht shumë e mirë, ndërtohet për here të parë në këtë mënyrë.

Pyetje:  Përshemull reagimin e të vjetërve?

Berisha:  Kur një parti humbet zgjedhjet në qëndrim të civilizuar kryetari jep dorëheqjen. Por askush nuk mund të thotë se vetëm ky e kishte gjithë përgjegjësinë, pavarësisht se kryetari e thotë.  Dhe çfarë ndodh tjetër. Japin dorëheqjen ata që janë më afër kryetarit dhe këtë e kanë bërë, kane dhënë dorëheqjen të dy nënkryetarët. Astriti që në fillim, Jozefina po atë ditë, por për të mos krijuar traumatizime tek anëtarësia i kërkova ta shtynte. Kështu që ata të dy kanë dhënë dorëheqje të parevokueshme.  Sekretari i Përgjithshëm edhe ai është pjesë e ekipit pa diskutim. Sekretari i Përgjithshëm nuk dha dorëheqjen dhe bëri shumë mirë, sepse pastaj partia ngelej plotësisht në një situatë realisht kaotike, por ai ishte pjesë e ekipit tim. Tani dua të bëj një dallim. Nëse këta dhanë dorëheqje të parevokueshme nuk do të thotë se këta nuk kanë të drejtë të kenë ambicie të tjera në të ardhmen. Por ky kryetar ka të drejtë për ata dhe për mua të ketë nënkryetarët me të cilët do të punojë, të ketë Sekretarin e Përgjithshëm dhe të tjerë, pra të ketë ekipin e tij. Në këtë drejtim për këta të dy e kam fjalën unë nuk di se u shmang me ndonjë qëllim të caktuar, ata shmangën veten e tyre.

Pyetje:  Një koment për drejtimin e kryetarit të ri?

Berisha:  Unë mendoj se Lulzim Basha ka krijuar fizionominë e vete në drejtimin e Partisë Demokratike. Çka është shumë e rëndësishme. Tani, nuk është kjo tamam opozita që unë bëja kur kam qenë në opozitë. A do të thotë kjo të replikojmë opozitën e asaj kohe? Jo nuk do të thotë, pasi times goes on. Lulzim Basha ka krijuar fizionominë edhe të opozitarit, por edhe të drejtimit të Partisë Demokratike. Lulzim Basha nga ana tjetër ka cilësi, do të thosha shumë pozitive. Njëra prej të cilave eshte se Lulzim Basha nuk ka energji negative dhe mund ta vëzhgoni në këtë drejtim, kjo është shumë pozitive. Në qoftë se kondraparti i tij gjeneron vetëm energji negative në mënyrë absolute nuk mund të më sjellë kush një shembull që ky gjeneroi negativitet ndaj këtij apo ndaj atij. Sigurisht që ky ka ndjenjat e tij. Së treti; ka një meritë shumë të veçantë. Ai mori partinë, një parti pas humbjes, një parti të traumatizuar dhe ia doli ndonëse jo me një ritëm shumë të shpejtë, por ia doli ta kompletojë procesin me shumë risira brenda, por për mua risia më e madhe ishte se PD finalizoi zgjedhjet e lidershipit në të gjitha nivelet e bashkuar dhe e pandarë, çka nuk është shumë e thjeshtë, është e vështirë. Dhe ky e bëri. Mendoj se fakti që shqiptarët sot njohin PD si parti shumice dhe këtë e tregoi 22 nëntori qartësisht është kjo eshte merite e drejtimit që zoti Basha po i bën partisë.

Pyetje:  A ka ndonjë moment të drejtimit të z. Basha që ju thoni sikur të isha unë do ta kisha bërë ndryshe?

Berisha:  Them me veten time?

Pyetje:  Po…

Berisha: Pa diskutim. Normal. Nuk ka diskutim që ka. Por nga ana tjetër mendoj se.. Cili është qëndrimi im. Qëndrimi im është se unë bëj gjithçka që PD të vijë sa më parë në pushtet. Unë mendoj së kjo rrugë që po ndiqet e sjellë në pushtete PD.

Pyetje:  Ka një element, të cilin mediat nuk e ka shmangur, keni bere 4-5 mitingje brenda ditës dhe ju nuk ju ka ikur zëri kurrë,  z. Basha si do ta mësoni që të mos i ikë zëri në miting?

Berisha: Jo, edhe mua më ka ikur zëri. Ajo është e drejtë dhe ai duhet të gjejë teknikën e mbrojtjes së zëri dhe jam i bindur se do ta realizojë këtë. Ndodh kjo. Ai ka pasur shume aktivitete por tani ka breshëri aktivitetesh dhe një nga çështjet kryesore është të ruash zërin.

Pyetje: Ju do t’ia jepni të gjitha këto formulat tuaja apo janë thjeshtë formula "Made in Berisha", të cilat nuk mund të aplikohen dot?

Berisha:  Në fakt janë të thjeshta por a mund të aplikohen apo jo kjo varet nga të tjetër.

Pyetje: Zoti Berisha para tre ditësh u larguat nga selia OSBE nga një aktivitet në kuadër të të drejtave të njeriut ku i thatë ambasadorit arsyen e largimit në momenti kur po fliste kryeministri Rama.

Berisha:  Unë kam shumë respekt për OSBE, per perfaqesimin dhe rolin që ka luajtur ajo në Shqipëri. U befasova kur pashë se iu dha fjala Edi Ramës që është edhe dhunuesi më kryesor sot ne Shqipëri i të drejtave të njeriut. Mirela, në qoftë se behet një vizitë në paraburgime, në komisariate dhe në burgjet e Shqipërisë, situata është absolutisht më e tmerrshmja që mund të jetë. Dhe pse gjithë kjo. Sepse ky njeri bërtet nga mëngjesi deri në darkë, burg-burg, hekura-hekura.  Mirëpo ata janë njerëz. Dhe pse e gjithë kjo? Sepse ky, atë që çdo vend i lirë i botës e ka kundërvajtje administrative, dhe jam pa qëllim pikërisht për të mos ardhur në këtë situatë, ky e ka shndërruar në kundravajtje penale. Dhe nëse ti bën ligje edhe pse ti hedh bishtin e cigares në rrugë, ti mund ti vësh hekurat, ti shkon në nje diktaturë të mirëfilltë dhe sot ka të dhëna nga Qendra Ndërkombëtare që dëshmojnë se Shqipëria ka më shumë të paraburgosur se Siria dhe Iraku. Që dëshmojnë se situata është edhe me e tmerrshme, që flenë nga 2 e 3 ne një shtrat, apo që flenë me turne, kjo është torturë, hyn në grupin e torturave psikologjike dhe fizike. Ose merr tjetër rast. Ku ka ndodhur te çohet fëmija 5 vjeç ne komisariat. Po sigurisht që nuk i vunë hekurat policët, po vete fakti që e morën në komisariat dhe nuk e çuan aty ku thotë ligji në qendrat sociale, tregon një dominim total të shtetit policor dhe Edi Rama i papërgjegjshëm, i pavetëdijshëm me këtë që bën e quajti reagimin e opozitës, një reagim monstruoz. Monstruoz ishte akti i dërgimit të vajzës 5 vjeçare në komisariat duke shoqëruar nënë e vete. A e kupton ai se çfarë terrori shpirtëror kishte kjo vajzë kur nëna i shkonte në polici.

Pyetje: Por kryeministri Rama thotë se do të vendoset shteti ligjor, dhe do të heqë atë kulturë pandëshkueshmërie që e gjeti nga qeverisja juaj?

Berisha:  Të falënderoj shumë për këtë pyetje. Nëse ka njeri që po mbjell vetëm pandëshkueshmërinë është vetëm Edi Rama. Ka një dallim thelbësor midis shtetit ligjor dhe shtetit policor. Cili është shteti ligjor? Shteti ligjor është shteti i procedurave ligjore, i institucioneve. Çfarë bën zotëria! Zotëria për të kaluar në shtet policor i ngarkon të gjitha detyrat e inspektorateve të tjera, ia ngarkon Policisë së Shtetit. Në Elbasan kanë marrë një grua të moshuar 88 vjeçare. Në Shkodër në grua tjetër 78 vjeçare. Pra zëvendëson policinë dhe inspektoratet të ndërtimit apo të elektrikut, sepse kudo ekzistojnë këto, me Policinë e Shtetit. Dhe tani do të fillojë me ujin. Ky ka në platformën e qeverisë postulatin; ‘Një shtet një polici’. Është postulati, është parimi tipik i shteteve policore. Çfarë ndodh? Si po e përdor ky këtë Polici. Ky këtë Polici po e përdor në mënyrën me selektive. Mburret se ka prishur 6 mijë lokale dhe shtëpi banimi, mburret. Po çfarë janë ato që janë prishur? Që të gjitha në tërësinë e vet janë investime për bukën e gojës. Se një njeri që ha bukën aty, në një kthinë, në një kioskë apo dyqan, ai rri gjithë ditën në këmbë, ai vuan për kafshatën, por jeton. Ka prish 6 mijë. Pse nuk prish këtu në park? Po ndryshon kufijtë e parkut për të mos prishur dy vilat që ndërton ndërtuesi i sarajeve të tij në Dajt. Pse nuk prish pallatin në rërë? Ka pallat në Durrës 25 metra nga buza e ujit, me fotografi, leje e dhënë nga Vangjushi. Pse nuk prish pallatin Vangjushit tek zona e Shkëmbit të Kavajës? Pse nuk prish pistën e  Vangjushit tek Currilat e futur deri në 200 metra, pse nuk prish resortin e Koço Kokëdhimes 25 metra nga buza e ujit në Qiparo? Pra nëse do të ishte shtet ligjor, se shteti ligjor ka barazinë para ligjit dhe në radhë të parë. Pse nuk prish pallatin tek Zogu i Zi, ku ka një pallat katër katesh ngjitur me pallatin tjetër, në kundërshtim me të gjitha rregullat? Sepse ky është i Sadri Abazit dhe nuk mund të preket. Të shkoni më tutje. Jane katër pallate pa leje me vendim prishje të Sadri Abazit, nuk i preken. Edi Rama po bën shtetin policor. Çfarë ndodhi në Vilur. Skandali i Vilurit ka marr dhënë. Tre polici të tre shteteve, një karvan trafiku droge, krye-trafikanti iu shpëtoi të tre policive sepse hyri në veturën e deputetit të PS me të cilin Edi Rama kapardisej të nesërmen në Shkodër. Ky nuk është shteti ligjor, ky është vetëm shteti policor. 

Cili është puniteti dhe impuniteti. E tha në mënyrën më të qartë në Konferencën Kombëtare për Korrupsionin. E ka deklaruar edhe here të tjera por aty e tha shqip; "Nuk është gjueti shtrigash lufta ndaj korrupsionit" tha. Se nuk e kishte shkruar vete ne FB që të ndëshkohet ministri Imami, kjo s’ka rëndësi, këtë e kishte shkruar dikush tjetër.  Edhe 15 gjermanë tha, dhe pati fat të madh ambasadori që nuk tha diplomatë, po të vijnë në Shqipëri dhe të rrinë tre muaj bëhen shqiptarë të korruptuar tha. Ky është impuniteti. Çfarë do të thotë me ketë ky. Ky ju thotë vidhni sa të mundeni se nuk e keni fajin ju që vidhni por e ka fajin sistemi që ekziston. Ky është inkurajim i madh. Pse e thotë këtë? Sepse ai është kryesori në korrupsionin në Shqipëri. Po ju tregoj një rast dhe e mbyllin me këtë.  Një kompani e madhe në industrinë e Shqipërisë ka pasur një kontratë me këta në portin e Durrësit. Ia anuluan kontratën. E anulojnë kontratën dhe hynë në pazare. Për ta shndërruar kontratën duhen 3.5 milion euro. Po tha, po jua jap. Pastaj kërceu në 5 million euro. Erdhi tek Rama dhe ju tha se po më kërkojnë 5 milion. Shko i tha merru me ta se unë nuk merrem me ta.  Se një milion e gjysmë i kërkojnë për Ramën.  Shko merri një intervistë kryeregjistruesit të Shqipërisë, Muhos. Do të të tregojë sesi djemtë e Arta Dades, atij dhe regjistruesit të Durrësit me revole në kokë e detyruan të firmosë për Hotel Vollgën në një kohë kur ka nje vendim gjykatë që atë pronë ia njeh dikujt tjetër.  Për hir të së vërtetës i Durrësit nuk e bëri. Edi Rama i di të gjitha këto. Por Edi Rama ka nxjerr teorinë se nuk keni faj ju, nuk ka faj Liza që krijon shembullin më të shëmtuar të 23 viteve në Shqipëri dhe ndoshta edhe në Europë, se unë kisha dëgjuar dhe sigurisht ka ndodhur që të të kërkojnë para për vendin e punës por nuk kisha dëgjuar kurrë të të kërkojnë para për të mbajtur vendin e punës, të paguash për të mbajtur vendin e punës, kete nuk e kisha dëgjuar. Nuk kisha degjuar ndonjehere te ndertohej rrjet prostitucioni. Janë 73 arsimtare të përfshira në rrjetin e Lizës së Edi Ramës, apo Mimozës që iu merrte 6 mijë euro. Edi Rama po mbjell me shpejtësi të madhe impunitetin dhe po zhvillon doktrinën e impunitetit dhe mos harro se tha se edhe 15 gjermanë po të vijnë dhe te vendosin tenderat ku janë me shqiptarët, për tre muaj bëhen shqiptarë.

Pyetje Ai i referohet qeverisjes që latë ju, sipas tij sistemi është instaluar nga ju?

Berisha: Qeverisja që lashë unë kishte korrupsion, por kishte një luftë absolutisht të vendosur ndaj korrupsionit. Nuk them se nuk kishte korrupsion. Edi Rama çfarë bëri. Nëse skandalet e mëdha të korrupsionit gjatë qeverisjes sime dolën me LSI, por Ilir Meta dorëzoi detyrat, nuk u bë më as ministër, as president siç deshte, dhe asgjë tjetër. Kryetar partie ngeli. Edi Rama dorëzoi dosjet e tij në Berlin, dorëzoi dosjet e tij në Bruksel,  dorëzoi dosjet e tij kudo. Atëherë çfarë bëri Edi Rama? E vendosi kryetar parlamenti Ilir Metën. Meta kërkoi para kater vitesh kryetar parlamenti. Mori një Jo nga unë. Pra, pasi ka dorëzuar dosjet dhe i kërkoi arrestimin tij e mban si skllav për të marrë çdo vendim që do. Kështu që të mendojë ky se do të besohet në luftën kundër korrupsionit. Po pse e thotë atë? Se ai ka Metën, ai ka veten.  Ai vetë është një gjobëvënës i pamëshirë.

Pyetje: Grupi parlamentar i PD ndodhet në një moment, ka reagime nga ndërkombëtaret dhe nga pjesëtarë të grupit parlamentarë për të rihyrë në parlament. Cili është mendimi juaj?

Berisha:  Së pari dua të siguroj çdo shqiptar se qenia jonë jashtë parlamentit është një sakrificë që bëhet në interesin e parlamentarizmit dhe vlerave të tij. Së dyti, atyre të cilët që normalisht gjykojnë ndryshe apo nuk janë dakord me këtë gjë, ju kujtoj vetëm një gjë. Ky është bojkoti i parë në histori jo vetëm në Shqipëri por edhe që di unë, i cili është i justifikuar nga qendra e djathtë Europiane. Partitë e Qendrës së Djathtë europiane janë parti për definicion institucionale dhe të shtetit ligjor. Këto parti kanë miratuar gjashtë javë më parë një rezolute e cila nuk ekziston kurrë në arkivat e tyre me fjalët më të ashpra që mund të behet. Përfaqësuesi i qeverisë amerikanë në OSBE në Vjenë ka bërë një nga deklaratat më domethënëse të bëra ndonjëherë për këtë vend. Dhuna ndaj opozitës në parlament dhe moszbatimi i vendimit të Gjykatës Kushtetuese. Parlamenti Europian ka vlerësuar këtë situatë dhe do të bëhen negociata. Unë jam skeptik dhe më vjen keq që e them këtë. Jam skeptik, sepse unë jam i bindur se Edi Rama nuk e do kurrë opozitën në parlament. Nuk e do opozitën në parlament sepse ai nuk duron dot. Dhe nëse juve ju kujtohet para se të bënte këto, ai më tha mua se nuk të dëgjoj dot do të iki kur flet ti. Ik. Unë nuk flas se është ai aty. Unë flas për qytetarët. Pra ne po mbrojmë parlamentarizmin. Sepse nëse ne shkojmë në parlament dhe goditemi sikur u godit Strazimiri, atëherë ne kemi një alternativë tjetër të shkojmë në parlament të armatosur, të shkojmë të armatosur dhe i pari që të ngrejë dorë ti kundërpërgjigjemi dhe kjo do të thotë kasaphanë dhe jo parlament dhe një forcë politike e qytetëruar se bën dot kurrë këtë dhe ne jemi forcë politike e qendrës së djathtë. Se në mënyrë absolute ajo mund të behet të vendosë ekuilibre armësh aty.  Sepse këtë inponon ai. Po kjo nuk shkon.  Ky nuk është më parlament. Së dyti, nëse opozitës i shkelet vendimi i Gjykatës Kushtetuese të bazuar në Kushtetutë çfarë mund të pretendojë opozita se mund të përfaqësojë? Dakord, more vendim që të mos ngresh komisione sepse kemi të drejtë të shkojmë në Gjykatë Kushtetuese por pasi flet gjykata ti kurrë nuk mund të imagjinosh të bllokosh siç bllokove opozitën. Çfarë parlamentarizmi është ky. Vetëm parlamentarizëm nuk është. Detyra më madhore e opozitës është të restaurojë, të riktheje parlamentarizmin në Shqipëri me çdo kusht.

Pyetje: Mund të këtë ketë rrjedhje  nga grupi parlamentarë i PD?

Berisha: Në një betejë, beteja është betejë dhe beteja duhet bërë në interesin më të mirë. Kjo parti solli pluralizmin, solli parlamentarizmin pluralist, kjo parti nuk mund të pranojë kurrë pseudoparlamentarizëm, duhet të qëndrojë si parti konstruktive. Ka paraqitur tek partnerët e saj një sërë kërkesash absolutisht që të gjitha, pa asnjë lloj tendencioziteti, veçse parlamentarizëm. Natyrisht në ato kërkesa mund të përfshiheshin shumë të tjera, por ka sjelle ato të cilat i konsideron të rëndësishëm që parlamenti shqiptar të funksionojë.  Si pranoi Edi Rama. Detyra e PD është rikthimi i parlamentit demokratik në Shqipëri pastaj duhet të përdorë të gjitha mjetet kundër një diktaturë dhe kjo është një beteje që PD është e gatshme ta bëjë.

Pyetje: Mendoni se ka elementë pozitiv gjatë këtij viti qeverisjeje të zotit Rama në opinionin tuaj?

Berisha: Problemi është ky. Shtrohet gjithmonë një pyetje nëse ka patur apo jo ndonjë gjë pozitive diktatura. Pra, a mund të ketë ndonjë gjë pozitive shteti policor? Po qe se është shtet policor ai është për t’u përmbysur. Ka një postulat, i cili thotë se kur kryeministri është i korruptuar atëherë korrupsioni shndërrohet në sistem. Po qe se kleptokracia instalohet nga baza deri në krye, atëherë ai është për t’u përmbysur.  Unë nuk mund të them se bëri gabim për atë çka i tha Vuçiçit. Jo, bëri mirë që ia tha, ndonëse shkoi në një vizitë shumë të papërgatitur, një vizitë e cila për mendimin tim po të përgatitej më mirë mund të ndryshonte diçka ose mund të mos ndryshonte asgjë por të paktën përgatitja duheshe bërë. E kam mbështetur absolutisht ndërhyrjen e Policisë në Lazarat për të bllokuar kanabisin, kam dënuar terrorin mbi popullatën, por nuk ka diskutim që ne jemi kundër mbjelljes së drogës. Por zhytja e ekonomisë në recesion është krimi më i madh që ka bërë ky.

Pyetje: Ka gjetur arkën e shtetit bosh thotë zoti Rama..

Berisha: Absolutisht ka gjetur arkën e shtetit më të shëndetshme 3 herë më shumë se sa e ka sot. Kemi dorëzuar arkën e shtetit me një borxh publik 61.9%. sot ka sjellë një borxh publik 74%. Kemi dorëzuar ekonominë shqiptare me një rritje, dhe në vit elektoral, rreth 2%, sot e ka -1%. Kemi dorëzuar ekonominë e këtij vendi me një papunësi 12.8% sot e ka 18.6% dhe sipas të dhënave të tjera rreth 40%. Kemi dorëzuar, me një borxh, po e pranoj, 160 milionë sipas tyre ndërsa sipas nesh 120 milionë euro, sipas Deloitte and Touche ka sot një borxh 250 milionë euro të krijuar ndaj biznesit. I dëgjoja dje a pardje. Në rast se ju kujtohet bërtisnin borxhi borxhi -borxhi, po ai nuk ishte borxh. Ato quhen te prapambetura. Në të gjithë terminologjinë financiare botërore ato nuk janë borxh, janë prapambetje. Dhe tani u kujtua se prapambetjet e biznesit ndaj shtetit janë 800 milionë euro. Kjo nuk do të thotë se janë borxh, ato janë prapambetje. Kanë procedurat dhe teknikat e tyre. Ti merresh me zgjidhjen e tyre por nuk i quan borxh. Kështu që, ky që premtoi rrogën e 13-të ka bërë që sot shqiptarët të marrin 4% më pak se një vit më parë. Ky që premtoi uljen e taksave për 97% të shqiptarëve, ka rritur taksat për 100% të shqiptarëve. ky ka një problem të madh në aparatin e tij mendor, është tabula rasa në konceptet ekonomike. Nuk po rritet çmimi i naftës thotë. Ore po ka konjukturë botërore nafta apo jo në radhë të parë. Fuçia e naftës nga 15 dollarë ka rënë në 17 dollarë dhe po shkon drejt rënies por në vende të tjera ku nuk ka monopole qeveritare ai ka rënë. Nuk them se ka rënë 50% apo 40% por ka rënë 20-25-18% e me rradhë. Në Shqipëri nuk ka rënë fare. Kam statistikat zyrtare për çmimin e naftës. 181 lekë është. Pra vendi po rrokulliset në rrafshin ekonomik. Po përgjysmohen investimet e huaja në Shqipëri. Atëherë më thuaj se cilat janë lajmet, çfarë të mirash ti gjej unë kësaj qeverie? Tritoli dhe krimi bëjnë ligjin, Policia nuk merret më me krimin, Policia nuk merret më me tritolin, krimi dhe tritoli merren me territorin.

Pyetje: Zoti Berisha mua më kanë thënë njerëz që ju s’keni bërë asnjë ditë pushim gjatë periudhës që ju keni qenë kryetar i PD, gjatë viteve tuaja aktive. Tani që ju nuk jeni më, le të themi me letra të paktën, kryetar i PD…

Berisha: Jo absolutisht unë ju them që nuk jam. Ju mund të thoni si të doni, ajo është tjetër punë, por …

Pyetje: Ka ditë pushimi në punën tuaj?

Berisha: Jo, unë pushoj duke punuar. Ekzakt. P,sh, për mua pushim është nëse unë lexoj diçka që mua më pëlqen. Por natyrisht nuk mund të them se rri gjithë ditën duke lexuar diçka që më pëlqen. Ndaj edhe një pjesë kohe edhe për punë. Nuk ka qenë ndryshe edhe kur kam qenë mjek. Pak a shumë ky kam qenë në tërësinë time..

Pyetje: Edhe tani që jeni paksa në hije le të themi…

Berisha: Tani të vetmen gjë që kam është që gjej kohë më shumë për fëmijët, për nipat e mbesat, për ata përpiqem të jem më disponibël.

Pyetje: Zoti Berisha ju jeni ish president i vendit, ish kryeministër i Shqipërisë, ish kryetar i Partisë Demokratike, deputet i PD, nëse do t’i ktheheshit këtyre 20 viteve do të ndryshonit ndonjë nga vendimmarrjet tuaja gjatë këtij harku kohor?

Berisha: Jo një po disa, dhe po të më thuash tani të bëj listën unë duhet të kërkoj kohë tani që ta bëj. Pa diskutim, të gabosh është njerëzore. Por një gjë kam meqë po më pyet. Gjithnjë, çdo vendim jam përpjekur ta mendoj sa më shumë. Jam përpjekur para çdo vendimi të imagjinoj se çfarë pasojash mund të ketë. Dhe megjithatë të siguroj se ka patur vendime që nuk duheshin marrë. Qartësisht!

Pyetje: Mund të shkëpusni një?

Berisha: Thashë që do listë, por listën tani herë tjetër. Po marr një rast psh. Në vitin 92 ne bëmë dy ligje. Për ligjin e lustracionit  morëm pikë për pikë ligjin çek. E kishte bërë presidenti Havel dhe ai ishte një autoritet dhe ne morën, e përkthyem, e vumë dhe e zbatuam. Krahas tij ne bëmë një ligj tjetër dhe qemë të parët në Europën ish komuniste. Behët fjalë për ligjin kundër genocideve dhe krimeve kundër njerëzimit. 73 vetë u dënuan dhe që të gjithë u rehabilituan mbrapa nga socialistët. Se njerëzit harrojnë dhe memorja e shkurtër… Por kjo është njëra anë. Ana tjetër ishte a qenë gjyqet e tyre reale? Jo nuk ishin. Ta them haptazi këtë. Por çfarë duhet të them me këtë. Ndofta duhej luftuar më shumë dhe duhej insistuar që gjykata ndërkombëtare të merrej me krimet kundër njerëzimit dhe kundër genocidit komunist se sa gjykatat e vendit, të cilat për hir të së vërtetës nuk kishin shkallën e përgatitjes për të bindur njerëzit se ata janë procese vërtet siç duhet, transparente siç e meritojnë. Mora njërën nga këto pra që e kam merak. Megjithatë kur pashë se e liruan Sheshelin nga Haga ishte një shok për mua.

Pyetje: Nëse do të bëheshe ajo lista e vendimeve të cilave ju do ti riktheheshit ndryshe do të kërkonit ndonjëherë ndjesë për ndonjë veprim që vertët do t’ju rëndojë?

Berisha: Unë në mënyrë të vazhdueshme kërkoj ndjesë. Kam hyrë në politikë duke kërkuar falje dhe vazhdoj. Ky është ligji im, i të gjithë jetës sime. Tjetër punë se ka njerëz që tek unë nuk janë të prirur të shohin gjërat e pëlqyeshme por të shohin gjëra të tjera. Kjo është zgjedhja e tyre unë gjithnjë kërkoj ndjesë.

Pyetje: Njerëzit shpesh herë e shohin politikën nga ekranet, nuk I njohin konjukturat politike, nuk e njohin politikën që bëhet pas dyerve dhe ajo që në fund të një debati apo kronike televizive thonë se pse është kaq e ashpër gjuha politike, pse është me një gjuhë që shpesh herë na bën të ndjehemi jo mirë. Është ky standarti ynë, është standarti që ne kërkojmë vërtetë apo duhet të ndryshojmë diçka?

Berisha: Ajo që thoni ju, ajo është thjesht aparenca. Aparenca e një realiteti që nuk ekziston në asnjë mënyrë. Nuk ka vend tjetër që të ketë futur në Parlament vrasës, trafikant, dhe unë po e them haptaz këtu se nuk ka gjë më të papranueshme. Nuk ka vend tjetër, në të cilin, siç ndodh këtu, të inkurajohet korrupsioni. Për çfarë është opozita? Opozita është për të bërë kontrollin e qeverisë dhe për të denoncuar aktet. Por çfarë mund të flitet për korrupsion kur Kryeministri deklaron para Forumit, me të gjithë trupin diplomatik ku OSBE po i dorëzonte strategjinë, se po ndërton shtetin, pra “vidhni ju o zyrtarë deri sa unë të ndërtojë shtetin, sepse korrupsioni është çështje personash se po të na vijnë 50 gjermanë edhe ata do bëhen si ne”, në fakt mori shembull më të pastërtit se pot ë thoshte 50 italianë natyrisht do zbriste pak më afër nesh. Pra, realiteti, jo gjuha, është absolutisht i neveritshëm, e them me keqardhjen më të madhe këtë. Po pse u dashka rekrutuar për deputet njërëz që s’kanë qënjë një ditë të vetme në partinë tënde dhe kur vjen puna për t’i mbrojtur u nxjerr Paulinin. Po Paulini të paktën ka qenë kolonel policie, dhe nuk di të jetë i implikuar në vrasje, dhe për të mbrojtur të tjerët thotë se Paulini u nxjerr patenta qytetareve, pra ndihmon elektoratin. Po pse biseda janë këto? Pra është krijuar një realitet kupole biznesi në PS. Nëse ju kujtohet një ambasador që ka patur shumë miqësi me Ramën, Uidhers, në Uikiliks del se i thotë qeverisë së tij se këta s’janë parti, këta janë si sipërmarrje ku ky (Rama) i plotëson të gjithë krerët e PS me leje ndërtimi, me kantiere ndërtimi etj. Pra ky është realiteti i hidhur. Nga të gjitha këto pastaj buron terminologjia, buron fjalori. Është e vështirë, çfarëdo që ti thuash ky është realiteti.

Pyetje: Mendoni se PD mund të vijë në pushtet pas 4 vitesh si një alternativë vërtet e mirë dhe jo sepse lodhen nga Rama për ti dhënë votën.

Berisha: Shumë pyetje interesante. Tani, çfarë ishte protesta e 22 nëntorit?! E para ishte dështim i Edi Ramës në strategjinë e frikës, njeriu që mendon se nëpërmjet burgjeve, hekurave dhe frikës do t’i nënshtrojë shqiptarët mori përgjigjen e merituar. E dyta, kjo masë e paparë njerëzish që nga viti 91 u drejtua drejt Partisë Demokratike. Nëse shkojmë dhe shohim rastin e Sllovenisë aty qeveris një parti, kryetari, kryeministri i të cilës e ka krijuar 5 muaj para zgjedhjeve. Pra, zgjedhësit ia kthyen plotësisht besimin asaj force politike që 1 vit më parë nuk ia patën dhënë në atë shkallë. Pse ia kthyen? Ia kthyen për shkak të proceseve që ajo ndoqi dhe avokatisë që ajo iu bëri qytetarëve. Nuk shtrohet problem këtu se këta (qytetarët) janë të pakënaqur dhe …. Këta po të jenë të pakënaqur s’vijnë me PD nëse duan, s’lëvis kush nga kafeneja pot ë duan, por gufuan nga toka dhe ku ishin e ku nuk ishin dhe mbushën sheshet në besim të madh ndaj PD. PD, sigurisht pas 4 vitesh do vijë në pushtet por unë uroj që të vijë edhe më shpejt. Dhe nuk e përjashtoj këtë, e them me sinqeritet. Ky është “scandal based government, kjo është qeveri e bazuar në skandale dhe e bukura është se ky nuk ka as koncepte skandali. Se ky i thotë ministrave të tij se po bënë skandale do i heqë ndërkohë që Ministri i tij i jep të gjitha tenderat vëllait të vet. Po a mund të ketë skandal më të madh se ky? Ministri të ndajë paratë e ministrisë me të vëllanë, apo ministrja apo tjetri e tjetri me rradhë? Për të nuk janë skandale këto sepse mëkëmbësi i Ramës, Ergysi, është i fotografuar që shkon me makinë pa targa duke prerë gjoba me Inspektoriatin e Ndërtimit e duke dhënë urdhëra për të çuar fadromat. Fillimisht ishte Rama që e bëri këtë që shkonte me fadromë përpara dhe i vinte gishtin ndërtesës, pas Ramës doli ky. Dhe çfarë thonë inspektoriatet për të? Mëkëmbësi i Jakomonit e quajnë, se atij (Ramës)i pëlqen duçeizmi.

Pyetje: Mendoni se këto do t’i shkurtojnë kohën qeverisë Rama dhe se mund të ketë zgjedhje të parakohshme?

Berisha: Absolutisht po. Rama është rrezik kombëtar. Edi Rama është në mënyrë absolute rrezik kombëtar çdo ditë, çdo javë, çdo muaj që qeveris. Më vjen keq që e them këtë, dhe e them këtë një një kohë kur një vit më parë unë, në një bisedë me kryetarin actual të PD, i kam thënë se detyra jonë është të bëjmë opozitë konstruktive , se kemi përcaktimet kushtetuese, kemi të gjitha që ne i nderojmë dhe i respektojmë, por Edi Rama përbën rrezik të vërtëtë kombëtar dhe shqiptar.

Mirela Milori: Zoti Berisha ju falenderoj për intervistën.

Berisha: Edhe unë ju falenderoj dhe ju uroj gëzuar Krishtlindjen edhe Vitin e Ri

(marre nga lapsi.al)