Brisida Shehaj: PS nuk ekziston, ka vetëm një rilindje dhe ajo është e MJAFT. LSI, zgjedhje edhe për socialistët e ndershëm

Brisida Shehaj, nënkryetare e LSI-së për Tiranën

Taksa progresive u ideua për të ndihmuar shtresën e varfër dhe të mesme për të stimuluar konsumin, pra gjallërimin e ekonomisë, por penalizoi klasën e mesme, atë klasë që ndërton e mban ekonominë dhe mirëqënien e një shoqërie

Rilindja socialiste nuk ekziston. Ka vetëm një Rilindje dhe ajo është e MJAFT-it

Brisida Shehaj, nënkryetare e LSI-së për Tiranën në intervistën për gazetën “Telegraf” pohon se nuk ka Rilindje Socialiste, por ka rilindje të MJAF-it, prandaj e braktisi PS dhe iu bashkua LSI, si zgjidhje të problemit politik. Si eksperte, zonja Shehaj thotë se taksat qendrore janë në shërbim të oligarkëve, shkatërruan shtresën e mesme, ndërsa në taksat lokale, abuzimi është i dukshëm. Zonja Shehaj argumenton pse PPP-të janë jo vetëm dështim ekonomik, nuk kanë sjellë të ardhura, por janë korruptive. Në sirtarët e Ministrisë së Financave, që nga viti 2016 gjendet një projektligj i hartuar me asistencën më të mirë ndërkombëtare, aty vendoset politikë taksimi e drejtë për individët

Për sa i takon taksave qendrore, paqartësia është e madhe prej ndryshimeve të shpeshta të legjislacionit, pa një strategji fiskale, duke ia lënë interesave të momentit tolerimet e shtrëngimet, për të favorizuar grupe të caktuara interesi, në shërbim të oligarkëve

– Zonja Shehaj, me taksën progresive që qeveria e Rilindjes zbaton në 8 vitet e qeverisjes, a kemi një taksim të ndershëm, siç pretendoi kryeministri Rama?

– Taksa progresive u ideua për të ndihmuar shtresën e varfër dhe të mesme për të stimuluar konsumin, pra gjallërimin e ekonomisë dhe për të siguruar ndershmëri në kontributin e secilit në të ardhurat kombëtare. Por produkti i këtij taksimi vetëm pjesërisht arriti të realizonte synimet e tij fillestare, tek shtresa e varfër, sepse në një analizë të plotë pas 8 vitesh mund pohoj pa drojë se penalizoi klasën e mesme, atë klasë që ndërton e mban ekonominë dhe mirëqënien e një shoqërie.

– A janë të shumta taksat ndaj biznesit?

– Për sa i takon taksave qendrore, paqartësia është e madhe prej ndryshimeve të shpeshta të legjislacionit, pa një strategji fiskale, por duke ia lënë interesave të momentit tolerimet e shtrëngimet, diku për arsye elektorale, diku për të favorizuar grupe të caktuara interesi, në shërbim të të ashtuquajturve “oligarkë”, që janë majmur me para publike. Ndërkohë, sa i takon atyre lokale, abuzimi është i dukshëm, duke nisur me taksa, që deklarohen të përkohshme, por zgjasin me vite deri tek vlerat e tyre për biznese të vogla e të mesme, që në total, tejkalojnë edhe ato qendrore.

– Sipas jush, pse qeveria nxori ligjin e dividentit me veprim prapaveprues?

– Ligji në vetvete ishte abuziv, që nga fuqia e tij prapavepruese e deri tek favorizimi i grupeve rë caktuara, duke dekurajuar taksapaguesit e rregullt. Kjo e shndërroi misionin e ligjit nga rregullator në mekanizëm diskriminues. Një nismë me efekt momental, për të mbushur fiktivisht arkën e shtetit, për të favorizuar “oligarkët” e për t’i destinuar në PPP korruptive.

– A i mirëpërdor qeveria taksat? Taksapaguesit e rregullt, a marrin ndihmën nga shteti, kur janë në nevojë?

– Taksapaguesit e rregullt siç e pohova edhe më parë përballen me arrogancën e pushtetit dhe diskriminimin e pabarazinë përballë ligjit. Po marr vetëm një shembull konkret e aktual, pandemia e covid-19 zbuloi se sa shteti i vjen në ndihmë taksapaguesit të vet. Për krahasim, qeveria shqiptare alokoi 363 milionë euro fonde në dispozicion të biznesit dhe individit, ku shumica janë kredi. Ndërkohë Kosova dha ndihmë të drejtpërdrejtë 385 milionë euro, Maqedonia e Veriut 470 milionë euro dhe Mali i Zi 1,5 miliardë euro. E ndërkohë në vitin 2020, pagesat për PPP abuzive arrijnë qindra miliona euro. Si me tërmetin e nëntorit të vitit 2019, si me pandeminë, pushteti nuk ka treguar as humanizëm për taksapaguesin e vet.

Në taksat lokale, abuzimi është i dukshëm, duke nisur me taksa, që deklarohen të përkohshme, por zgjasin me vite deri tek vlerat e tyre për biznese të vogla e të mesme, që në total, tejkalojnë edhe ato qendrore

–Ekonomia jonë vuan krizën globale, apo është viktimë e keqqeverisjes së Rilindjes Socialiste?

– Këtu gjërave u duhet vënë emri që kanë dhe fshehja pas alibive si kriza botërore, fatkeqësia natyrore, apo pandemia janë justifikime tipike të një makinerie propagande rilindase. Patjetër marr parasysh ndikimin e pandemisë në ekonomi, por nuk kam parë qeverinë të ulet e të ndërtojë një strategji transparente për si e sa do minimizojë pasojat e saj në vitin 2021. Le të qëndrojmë këtu, po të shohësh të ardhurat e planifikuara për TVSH-në për buxhetin e vitit 2021 dallon qartë se jemi kthyer në nivelet e vitit 2018. Ndërkohë niveli faktik i buxhetit të vitit 2020 për të ardhurat nga TVSH na kthen në vitin 2016. Por po të bësh një analizë edhe më të thelluar zëri i TVSH-s ka 200 milionë dollarë më pak se viti 2018. Dhe kjo do të thotë, që investimet e privatit dhe ato të PPP-ve në miliarda nuk kanë prodhuar efektivitetin dhe të ardhurat e duhura në buxhetin e shtetit. E paimagjinueshme në një vit të vështirë, me pandemi, korruspsion të vërtetuar nga KLSH e ku shpresa e vetme janë 280 milionë dollarët e Rindërtimit, vlera e shtuar të sigurojë 200 milionë dollarë TVSH.

– Cili është impakti i mijëra koncesioneve që ka dhënë qeveria e Rilindjes në të ardhurat e buxhetit të shtetit, në rritjen e vendeve të punës, në progresin e ekonomisë?

– Në vijim të përgjigjes së mësipërme, qindra miliona euro në koncesione e PPP në këto vite, rreth 500 milionë euro leje ndërtimi të dhëna në Tiranë vitet e fundit kanë prodhuar 200 milionë dollarë më pak në zërin e TVSH-së. Le të analizojmë pak këtu, po të shihni të ardhurat e sigurineve shoqërore, dallojmë rritje vit pas viti, por kjo sigurohet më së shumti prej punësimit sezonal të turizmit dhe rritjes së pagës minimale për efekt taksimi. Pa e bërë shumë teknike bisedën, mjaftojnë këto indikatorë për të kuptuar se si kanë ndikuar këto koncesione në prodhim, punësim dhe ekonomi.

– Zonja Shehaj, pse socialistët janë zhgënjyer nga Rilindja Socialiste?

– E para, të biem dakord për termat. Rilindja socialiste nuk ekziston. Ka vetëm një Rilindje dhe ajo është e Mjaftit. Sot drejtimin e Partisë Socialiste e ka kapur një grupim, që pasi dështoi me një krijesë anemike si G99, përdorën PS-në si mjetin për të arritur qëllimin e tyre. Makiavelistë të thekur, që politikën e ndanë nga morali, qëllimin e shfaqën hapur, shkatërrimi, varfërimi dhe shpopullimi i Shqipërisë. Në këtë kapje frymëmpakëse të partisë, socialistëve nuk u mbetet as zë, as oksigjen e as forcë vendim-marrëse brenda forumeve drejtuese.

-Ju, pse ikët nga PS dhe iu bashkuat LSI?

– Për çdo arsye të thënë më sipër, duke njohur problemin i jap rëndësi zgjidhjes.

– Në kushtet aktuale, çfarë politikë fiskale duhet të ndjekë opozita, nëse vjen në qeverisje në 25 prill për të ndihmuar biznesin, por edhe të rritë të ardhurat e buxhetit të shtetit?

– Zgjidhja është një, të gjithë të barabartë para ligjit, pa asnjë privilegj prej afërsisë me pushtetin, politika fiskale të qarta e transparente, lehtësim për biznesin e vogël e të mesëm. Dhe një bindje imja personale, taksimi i të ardhurave personale duhet të jetë i drejtë, duke njohur një pjesë të shpenzimeve dhe jo i aplikuar mbi të ardhurat bruto. Në sirtarët e Ministrisë së Financave, që nga viti 2016 gjendet një projektligj i hartuar me asistencën më të mirë ndërkombëtare, aty vendoset politikë taksimi e drejtë për individët, të cilëve iu njihen shpenzime të zbritshme para tatimit, duke siguruar edhe rimbursimin e tyre në rast të tatimit të llogaritur mbi vlerën faktike. Kjo gjë do të stimulonte kësisoj konsumin e një ekonomie të drobitur.

Gazeta Telegraf