FRAN FRROKAJ: NJË LEZHË E INTEGRUAR QË ZHVILLOHET ME RITME TË LARTA

Intervistë me Z. Fran   Frrokaj,  Kryetar i Bashkisë Lezhë

Pyetje:Viti 2015 po mbyllet me një tranzicion  të  zgjatur të transferimit të pushtetit lokal,  hartimit të  projekteve, prioriteteve dhe buxhetit për vitin 2016.

Si e gjykoni  këtë vit në përmbyllje të tij.

          ♦Viti 2015, për pushtetin vendor ishte  i rëndësishëm  për shkak se ishte vit zgjedhor dhe organet e qeverisjes vendore dhe drejtuesit  që dolën nga këto zgjedhje,  marrin përgjegjësi  për një popullsi më të madhe dhe një territor  më të gjerë se më parë.

Ato përballen me një problematikë të gjithanshme dhe vështirësi  të konsiderueshme për  trajtimin e barabartë të të gjithë qytetarëve, për përmirësimin e shërbimeve ndaj  komunitetit,  administrimin  territorit dhe probleme të tjera që burojnë nga  vartësia  e interesave të njerzve tek pushteti lokal.

Njësite e reja vendore,  përbëjne  standart të ri përfaqësimi dhe kërkojnë mentalitet të ri drejtimi. 

          Për ne,  në radhë të parë ka rëndësi njohja e problemeve të komunitetit, caktimi i detyrave  dhe ndarja e përgjegjësive me Administratorët  e Njësive Administrative dhe administratën  në njësi,  me qëllim përcaktimin e saktë të  prioriteteve dhe hartimin e projekteve  që do të zbatohen në kuadër të  programit me të cilin kemi fituar bindshëm besimin e qytetarëve lezhjanë për t’i qeverisur në katër vitet e ardhshme.

          Faza e njohjes, tashmë ka përfunduar dhe  disa ndërhyrje imediate  në ato drejtime që përbëjnë emergjencë për qytetarët  ose që kanë qenë premtime  parësore po përmbyllen brënda këtij viti. Gjithashtu,  investimet e planifikuara për t’u kryer këtë vit, po realizohen.  Njëkohësisht  jemi në  fazën e  përcaktimit të përparësive e dhe hartimit të projekteve konkrete që kemi premtuar të realizojmë në të gjithë hapësirën e Bashkisë.

Pyetje: Cilat janë prioritetet për vitin 2016, në sektorët e ekonomisë, turizmit dhe  kulturës. 

          ♦Bashkia Lezhë, është në proces të hartimit të buxhetit dhe projekteve që do të zbatohen në vitin 2016.

          Se pari, po pergatitet paketa fiskale  që po diskutohet me grupet e interesit.

Unë kam  dhënë një premtim  në fushaten elektorale  se do të ul  në masen 30 %  taksat dhe tarifat  vendore, të cilat janë në kompetencë ligjore të Administratës së Bashkisë, për ti dhënë një frymëmarrje më të madhe biznesit, për t’i krijuar atij mundësi  zhvillimi, investimi dhe punësimi për qytetarët e Lezhës.

          Problemi themelor në këtë aspekt do të jetë  që taksat duhet t’i paguajnë të gjithë. Kjo do të jetë moto e punës së  sektorit të tatim-taksave. Dhe kjo do të realizohet medeomos. Asnjëhere nuk do të ketë amnisti taksash të tregëtarëve  në kurriz të qytetarëve dhe të investimeve në shërbim të tyre.

          Në fillim te vitit  te ardhshem do të miratojmë buxhetin, i cili do të jetë  i konsiderueshem, ku edhe granti  nga buxheti i Shtetit vjen më i përmirësuar,  gjë që na krijon disa mundesi, megjithëse të kufizuara, të bëjmë  investimet më të domosdoshme.

Reduktimi i taksave të biznesit të vogël nga qeveria, që shkonin në favor të Njësive Vendore, përbën një problem që e rëndon poziten financiare të pushtetit vendor.

          Punësimi do të jetë përparësi, ku përveç fabrikave të peshkut,  do të kërkohen dhe gjenden edhe mundësi të tjera punësimi për qytetarët e Lezhës.

          Në kuadër të thellimit të reformes administrative, territoriale dhe kalimit të disa  sektorëve  prioritarë të ekonomisë në vartësi të pushtetit vendor, po përcaktojmë përparësitë tona në ato drejtime që përbëjnë shqetësim dhe  që më parë kanë sjellë  rrjedhoja negative në zhvillimin e bujqësisë, frutikultures e blektorisë, të cilat janë prioritare dhe   ku mundësitë janë më të mëdha për një zhvillim të qendrueshem dhe perspektiv të ekonomive familjare dhe ku është investuar më shumë deri tani. 

          Në një kohë të shkurtër, do të hartohet një plan i integruar për sistemimin e të gjithë përrejve të zonës së Bregut të Matës me qëllim disiplinimin e tyre  dhe parandalimin e përmbytjeve përmes një investimi  të studjuar dhe efektiv.

          Po në këtë kuader, perveç masave kundër përmbytjeve do të  punohet për kullimin,  vaditjen dhe mirëmbajtjen  gjithëvjetore të kanaleve  në të dy fushat e mëdha të Lezhës, në Breg të Matës dhe në Zadrimë.  

          Pas  përfundimit të  projekteve që janë në zbatim, si  shetitorja e Bregut të Drinit,  rrugët në  disa lagje të qytetit,  u realizua  rikonceptimi i dhe rikonstruksioni i lulishtes  përballe 11 janarit,  dhe po punohet për rikonstruksionin e lulishtes së Bregut të Drinit,  për ta kthyer ate  në shërbim të qytetareve dhe jo  parkim makinash si ishte më parë. Këtë premtim e kam bërë përpara qytetarëve të kësaj lagjeje dhe do ta realizoj brënda muajit janar 2016.

          Një ndër prioritetet strategjike  të Bashkisë Lezhë  do të jetë sigurimi dhe   administrimi  në favor të qytetarëve i ujit të pijshëm. Megjithëse statusi juridik i Ujësjellësit ende nuk është përcaktuar përfundimisht, besoj se me fillimin e vitit 2016,  ujësjellësi i Lezhës, ashtu  dhe  të gjithë ujësjellësit e  Njësive Administrative  do të kalojnë në administrim të Bashkisë. Për  këtë problem madhor, do të  punohet  dhe investohet  që brënda këtij mandati  mbi 80 % e qytetarëve të Bashkisë Lezhë të kenë ujë të pijshëm të bollshëm, të pastër,  të sigurtë e të kontrolluar.   

           Në fushë të infrastrukturtes  përparësi  për vitin 2016 do te jenë; ndërtimi i rrugës

së Torovices,  perfundimi i superstrades nga rrotondja   deri ne rrugen e perfunduar te Shengjinit, ( Knalle), loti i dytë i rrugës së Ungrejit, dhe disa rrugë të tjera lidhëse me rrugët kryesore që kalojnë nëpër Lezhë.   

          Prioritet  madhor do të jetë Shëngjini, i cili në pikpamje të turizmit nuk do të jetë vetëm  për turizëm në shërbim të kosovarëve dhe të huajve gjatë verës, por Shengjini do të jetë i bukur, i jetueshem dhe  me shërbime cilësore në dispozicion të qytetarëve të Shengjinit, Lezhës  dhe të gjithë shqiptarëve që zgjedhin këtë qytet për të kaluar pushimet dhe për ta frekuentuar në të gjithë muajit e vitit.

          Shengjini sot është në të gjitha drejtimet në një situatë pothuajse katastrofike, për ujësjellës –kanalizimet, ndërtimet pa kriter për shërbimet në qytet etj.

          Pas përfundimit të rruges së Kunes, të tjera investime të konsiderueshme  do të bëhën në këtë qytet, i cili do të jetë në konsideraten time më të lartë  dhe do të përbëjë përparesi të gjithanshme  në projekte, investime dhe shërbime.

           Fabrikat e peshkut nuk do të lejohen të ndotin me tej këtë qytet.

Të ardhurat që gjenerohen nga Shëngjini do të përdorën  për Shëngjinin, sepse Shkollat e këtij qyteti dhe gjithë Njësisë Administrative, janë në gjendje te mjerueshme  dhe kanë nevojë më shumë se kushdo për rikonstruksion, pasi janë lënë krejtësisht pas dore nga ish drejtuesi i asaj komune, megjithëse të ardhurat financiare në këtë qytet kanë qene të konsiderueshme. Brenda një periudhe sa më të afërt, keto shkolla, do të kenë vemendjen time dhe do të marrin investimet e duhura për të justifikuar emrin e tyre si qëndra  të shkollimit të një prej zonave më të rendesishme të Lezhës dhe veriut ne pergjithesi.

 Në shkollë  çdo familje ka një pjesë të rëndësishme të jetës, ndaj kërkohët  dhe do të  bëhët më e mira për to, gjë që do ta bëjmë  me përkushtim. Kushtet e mësimdhenjës do të kenë përparësinë  absolute në të gjithë veprimtarinë  e administratës së Bashkisë .

Shërbimi shendetësor  do të ketë përparësi  sistemin arsimor dhe kujdesi primar do të shkojë tek femijët e shkollave dhe moshën shkollore. Ky do të jetë objektivi dhe sfida jonë e madhe dhe do t’ja dalim. Që në këtë sezon dimëror kemi shpërndarë soba në të gjitha shkollat 9- vjeçare  dhe do të sigurojmë ngrohje  në të gjithë territorin.

          Kujdes do të marrë edhe arsimi parashkollor  në të gjithë aksesorët.  Kopështi i gurrave  do të vihet krejtesisht ne dispozicion të  funksionit fillestar.  Kopështi i nisur afër katedrales, do të  përfundojë së ndërtuari si kopësht femijësh me standarte të larta dhe do të jetë një destinacion atraktiv për qytetarët e lagjes dhe krejt qytetit , i cili është mbajtur  peng  në mënyrë të pajustifikueshme  për një kohë kaq të gjatë.  Në një periudhë shumë të shkurtër kohe, në kopështet dhe çerdhet e qytetit, do të ketë vende bosh të gatshëm për të pritur fëmijët e qytetarëve lezhjanë me një cilësi akomodimi bashkohore.

          Megjithëse në kushtet e një buxheti të kushtëzuar dhe me mundësi financiare të limituara, do të bëjmë  investime në infrastrukturë , ku këtë vit do të realizojmë sistemimin e ujrave të bardha në qytet.

          Pyetje:  Si po punohet për përgatitjen e  kushteve  dhe krijimin e mundësive për tërheqjen e investimeve të huaja  dhe atyre vendase për Lezhën.

          ♦Lezha,  gjithmonë është konsideruar  një zonë preferenciale për investime. Ajo ka

 kushte natyrore të favorshme, pozitë gjeografike të lakmueshme, vlera  kulturore e historike të pakrahasueshme, një popullsi të konsiderueshme  me kualifikim dhe traditë pune , pra të gjitha kushtet për të tërhequr  investime  vendase dhe të huaja në shërbim të punësimit dhe rritjes së mirëqenjës.  Puna  për terheqjen e investimeve  me objekt punësimin e njerzve është e përditshme dhe njëkohësisht e lidhur me  kerkesat e investitorëve. Kjo është përparësi e përhershme dhe nuk mund të kufizohet në kohë me objektivat dhe  programet tona. Kjo do të mbetet  angazhim i përhershëm i të gjithë aktoreve dhe faktoreve, të interesuar në  trevën e Lezhës dhe më gjërë.

Pyetje: A ka projekte zhvillimi  për turizmin, si evidentimin e vlerave kulturore, historike, arkeologjike,  dhe evidentimin e monumenteve natyrore  që posedon  Lezha dhe si do të vihen ato në  shërbim te zhvillimit të turizmit.

          ♦Zhvillimi i turizmit në Lezhë  ka nevojë  më shumë për promovim dhe këtë e bëjnë shumë mirë shoqatat dhe agjensite turistike. Zhvillimi i turizmit  ecen paralel me zhvillimin ekonomik dhe përmirësimin e infrastrukturës së qytetit.

          Lezha është një qytet i bukur  dhe i tillë do të mbetet. Ky qytet, që dallohet për harmoni fetare dhe kulturore, me gjithë diversitetin që mbart në kushtet e levizjeve të  mëdha demografike,  gjithmonë  do të rritet e zhvillohet  me ritme të larta. Prandaj, do të jenë në rendin e përparësive,  zhvillimi i kulturës e turizmit, ruajtja dhe mirëmbajtja e  monumenteve të kulturës dhe natyrës, për t’i vënë ato në sherbim të zhvillimit të turizmit me qëllim që Lezha  turistike të mos kufizohet vetem me Memorialin e Skenderbeut dhe kalanë mesjetare, por të zgjerohet  e zhvillohët në të gjithë territorin dhe të gjitha drejtimet. Përveç turizmit bulnear, do të përqendrohemi edhe në turizmin malor dhe ate  kulinar, pasi tashmë është krijuar  një tradite në këtë fushë me lokale si Mrizi i Zanave me emer në të gjithë vendin, së fundi Ylli i drites etj , që krahas lokaleve të Lagunes së Kune Vainit kanë ecur në rrugen e krijimit të një tradite të re në këtë fushë.

          Ne do të punojmë që, pjesë e guides turistike të Bashkisë së Lezhës të jenë edhe monumente të tjera historike e religjioze si dhe monumentet e natyres që janë me shumicë në treven e Lezhës. Do punojmë që të vemë në shërbim të vizitoreve  vendas dhe të huaj,  duke i bërë pjesë të guides sonë edhe  objekte si kisha e  Kuvendit të Arbërit, Kisha e Kallmetit, Pllanës, shtëpinë e At Gjergj Fishtes, etj me qëllim krijimin e guides së plotë turistike të  Lezhës këtij vendi të bekuar të historisë dhe djepi të kulturës.

 Përparësi do te kenë zhvillimi i veprimtarive kulturore , cilësia e tyre, veprimtaritë për librin dhe promovimi i autoreve të rinj. Lezha është trevë  kulture dhe truall i autorëve  e poetëve të shquar, ndaj  do të ketë vemendjen më të madhe  të bibliotekes publike dhe institucioneve te tjera te kultures.

Pallati i kulturës do të kthehet në identitet. Pas  përfundimit të investimeve në sallen moderne që po ngrihet në Q.K. te Femijëve, në pallatin e kultures  do të bëhën investime për  modernizimin e plotë të sallës dhe të të gjithë interiereve të tij. 

          Pyetje: Në punën tuaj  udhëhiqeni nga parimi : për qytetarin dhe përmirësimin e vazhdueshëm të jetës së tij. Si do ta realizoni këtë në veprimtarinë tuaj?

          ♦Moto e punës  sime është  ngritja e cilësisë së shërbimeve për qytetaret. Përmirësimi i gjërave që disa i konsiderojnë të vogla  është në praktiken time si drejtues. Çdo ditë  shkoj në punë në këmbë dhe  marr takim me dhjetra qytetarë në nevojë ose jo, të cilët bëjnë kërkesa dhe sugjerime  sipas mendimit të tyre. Këto janë një bazë  për përmirësimin e shërbimeve në favor të qytetarëve. Komunikimi i vazhdueshem  dhe dëgjimi i zërit dhe opinionionit  qytetar  na ndihmon shumë për përcaktimin e përparësive në punën tonë. Këtë praktikë  e kam patur gjithnjë dhe më ka rezultuar e suksesëshme ndaj do të vazhdoj të praktikoj çdo ditë  komunikimin  tim me qytetarët e Lezhës.

Pyetje: Si e vlerësoni bashkëpunimin me Qeverinë Qendrore dhe donatorët e mundshëm  për investimet në Lezhë?

          ♦Ne, jemi votuar dhe kemi marrë një mandat qeverisës në shërbim  të zgjedhësve , ndaj në këto kushte jemi të dy palët përballë  tyre  dhe në provë për plotësimin e pritmërive të qytetarëve. Unë, respektoj  pushtetin qëndror aq kohë sa ai u sherben qytetarëve të tij,  pasi ato janë  vlerësuesit  objektivë të punës së Qeverisë qëndrore dhe vendore. Ato  dijnë më mirë të ndajnë përgjegjëtë dhe të japin vlerësimin e tyre me votë

          Reformat e Qeverisë  janë të egra dhe me e keqja është se ato kanë filluar  nga shtresa më vunerabël e shoqërisë, nga  populli i thjeshtë. Gjendja ekonomike e popullit  është përkeqësuar nga goditja e menjëhershme e reformave.  Unë jetoj si të gjithë qytetarët e tjerë të Lezhës, me të njëjtat kushte dhe si qytetar nuk mund të mos e ndjej ndikimin e masave deri  represive të qeverisë me reformat drastike që ajo ka ndërmarrë,të cilat, me shumë se në favor të qytetarëve, kanë shkuar në  kundërshtim me interesat e përgjithshme të popullsisë, prandaj qeveria sot nuk e gëzon mbështetjen e shumicës së qytetarëve të këtij vendi dhe të votuesve shqiptarë.

          Une politikisht uroj që  gjysma e dytë e mandatit të kësaj qeverie të jetë edhe gjysma e fundit  e qeverisjes së saj.  Pa u ndalur tek emrat e ministrave apo mënyra e drejtimit të dikastereve, mund të themi se  mënyra e qeverisjes nuk ka qënë   në përputhje me pritmëritë e qytetareve, por në kundërshtim  me interesat e tyre.

Pyetje:Çfare do t’u thoni qytetareve Lezhjane në  mbyllje te vitit 2015 dhe një urim per vitin 2016.

♦Në këtë fund viti do të uroja të gjithë qytetarët e Lezhës   dhe veçanërisht shtresat në nevojë:   Gezuar vitin e ri 2016 , dhe le të jetë viti që vjen një vit i plotësimit të  dëshirave të tyre, një vit i mbushur me punë dhe realizime, një vit që të ngjallë shpresë  për një jetë më të mirë dhe më të begatë në këtë vend.

Të gjithë ne e kuptojmë se, ashtu si brezat që kaluan , shkruan nga një faqe  nderi dhe lavdie, bujarie dhe trimërie  në ditarin e madh  të qytetit tonë edhe brezi  ynë do të shkruajë  pjesën e tij të historisë së Lezhes duke e  pasuruar ate  me mundësitë dhe kushtët që kemi  në dispozicion.