Ilir Meta tek “Te Paekspozuarit ” te Ylli Rakipit

Z. Meta, Kaluat një proces të vështirë në përzgjedhjen e kandidatëve, një kohë intensive dhe e mbushur. Ndërkohë, kandidatin më të rëndësishëm të metropolit, le ta quajmë kështu, të Tiranës, ju e hodhët në treg vetëm dy orë e gjysmë më parë. Kur ju po dilnit nga PS-ja, në fund lëshuat një frazë që krijoi një dyshim te njerëzit, thatë se kandidati do të jetë gjithëpërfshirës. Në çfarë konteksti e thatë këtë gjë, sepse gjithëpërfshirje për Erion Veliajn është diçka e pakuptueshme?

Ilir Meta – Atëherë, mund të shpjegohem ose të ekspozohem më shumë, duke iu përshtatur edhe titullit të emisionit tuaj. Nuk kam pasur parasysh zotin Erion Veliaj, por kam pasur parasysh që po dilnim pas një takimi me gati 40 parti, ku kemi firmosur për aleancën për zgjedhjet lokale. Mesazhi ishte që ky është një koalicion gjithëpërfshirës.

Së dyti, kur jam pyetur për kandidatin e Tiranës, kam thënë gjithëpërfshirës, sepse cilido që të ishte, si zoti Veliaj, apo zoti Klosi, por edhe figura të tjera, të cilat kanë qenë të përmendura, pa dyshim që do të kishin një rrezatim shumë më të gjerë sesa të vetë PS-së. Çdo kandidaturë gëzonte…

Ylli Rakipi – Pra, ka pasur edhe mbështetjen e…

Ilir Meta – Në atë moment nuk kemi diskutuar për kandidatin e Tiranës…

Ylli Rakipi – Është rezultat i partive që ishin mbledhur.

Ilir Meta – Patjetër.

Megjithatë, tani që kemi një kandidat konkret, mendoj se është një figurë gjithëpërfshirëse, duke pasur parasysh se është zhvilluar një testim; ka pasur debatet e tij në publik; ka pasur debatet brenda partisë së tij dhe njëkohësisht është një kandidat që vjen në politikë nga shoqëria civile.

Ylli Rakipi – Natyrisht, pjesa më e rëndësishme e njerëzve që sjell kryetari i PS-së, zoti Rama, vijnë nga shoqëria civile, por vështirë nga PS-ja. Gjithsesi, do të flasim më vonë për këtë.

Zoti Meta, nuk ju duket që për 1 milion vota që ju morët, janë shumë pak emra që vërtiten te qeverisja juaj, por edhe më tej, konkretisht për bashkinë? Domethënë, merrni një njeri që punon mirë, ka ndërtuar një ministri, ai është një djalë vërtet punëtor, por merreni këtu dhe çojeni në një vend tjetër. Duket sikur ky vend është një fshat fare i vogël dhe nuk ka fare njerëz. Ju keni marrë shumë vota. A nuk ka njerëz ky vend?

Ilir Meta – Unë nuk e shoh në këtë mënyrë, sepse varet sesi e sheh një proces apo një fenomen. Përzgjedhja e kandidaturës për Tiranën ka qenë e vështirë, sepse ka pasur jo pak kandidatë.

Së dyti, ka qenë e vështirë, duke pasur në konsideratë që Bashkia e Tiranës, edhe ashtu siç ishte deri tani, ishte një përgjegjësi e madhe. Ndërsa me reformën e re kjo përgjegjësi pothuajse është dyfishuar, në kuptimin jo vetëm të hapësirës së re të bashkisë, por edhe të problemeve të kompleksitetit në rritje e të tjerë me radhë, prandaj këtë përzgjedhje do ta shihnim si një përpjekje për të qëlluar plotësisht në shenjë në këtë moment të ri, ku do të kemi një Bashki të re të Tiranës. Pa dyshim një punë që është ndërtuar mirë nuk ka pse të dëmtohet, në rastin konkret te Ministria e Mirëqenies Sociale.  Ju e thatë vetë që është një figurë që ka punuar dhe ndërtuar një ministri. Atëherë, pse të mos e kishte edhe këtë mundësi, ashtu sikurse këtë mundësi mund ta kishte zoti Klosi dhe shumë të tjerë.

Ylli Rakipi – Gjithsesi, zoti Meta, emisioni im ndahet në dy pjesë: pjesa e parë është një material filmik, të cilin ne e kemi pjesë të formatit tonë. Së bashku, besoj se nuk do të mërziteni, do të ndjekim raportin filmik, ku është një këndvështrim, sigurisht aty janë edhe tri opinionistë, të cilët kanë mendimet e tyre, dhe do të rikthehemi për të vijuar bisedën tonë.

Ylli Rakipi – Ky ishte raporti filmik, zoti Meta, që ne kishim përgatitur për mbrëmjen e sotme.

Keni një mendim? Është një këndvështrim.

Ilir Meta – Po të kishin hequr dritat aty, m’u duk vetja si në kinema, komplet.

Ylli Rakipi – Por ky është formati i emisionit.

Ilir Meta – Jo, dakord. Unë e respektoj.

Ylli Rakipi – Është një këndvështrim. Ne u përpoqëm, domethënë…

Ilir Meta – Ishin tre këndvështrime.

Ylli Rakipi – Jo, opinionistët atë punë kanë.

Ilir Meta – Po.

Ylli Rakipi – Ne, si qëndrim editorial, kishim një përshkrim të qartë të ngjarjeve.

Ilir Meta – Po, dakord.

Ylli Rakipi – Atëherë, unë them të hyjmë në bisedën tonë.

Ka kaluar një kohë jo e shkurtër, domethënë në raport me zhvillimet që shohim shpesh në Shqipëri, nga video-skandali Tom Doshi. Në fakt, gjërat tani duket se janë ftohur.

Dy deputetë të maxhorancës, njëri i maxhorancës dhe njëri i partisë tjetër, por në maxhorancë, janë të ndaluar nga ligji. Keni ju një mendim të qartë, ç’ishte kjo ngjarje dhe pse pikërisht ju? Ne u përpoqëm të thoshim ç’mendonim në filmin tonë, por ju, jeni i qartë çfarë është kjo ngjarje për ju? Dhe pse ju?

Ilir Meta – Mendoj se kjo ngjarje është bërë publike, madje është bërë shumë publike. Për gati më shumë se sa një muaj ka qenë në qendër të vëmendjes së opinionit publik, jo më shumë për ngjarjen dhe për protagonistët që u investuan në këtë ngjarje të drejtpërdrejtë, por për atë investim të jashtëzakonshëm dhe të paparë që bëri opozita për ta shfrytëzuar politikisht, siç thotë doktori, si skandalin më të madh në këta 25 vjet, si akuzën më të rëndë në këta 25 vjet, e kështu me radhë. Dhe, në fakt, ishte një investim krejt absurd i opozitës, e cila edhe sot vazhdon të thotë se është skandal i madh që deputeti i maxhorancës akuzoi kreun e parlamentit, Kryeministrin dhe ministrin për këtë dhe për atë. Ndërkohë që fare thjesht, në rast se i kthehemi ngjarjes, kjo akuzë është hedhur në publik pasi deputeti është përjashtuar nga Grupi Parlamentar i Partisë Socialiste, nuk është hedhur asnjë ditë para dhe as një javë para. Pra, kur deputeti praktikisht ka kaluar në…

Ylli Rakipi – Ai ka pasur dhe nisma të tjera.

Ilir Meta – Jo, nuk ka rëndësi, ato i kishte për drejtoreshat një javë para, por, për rastin konkret, pra bëhet një akuzë kur dikush përjashtohet nga Partia Socialiste, kuptohet edhe nga maxhoranca, dhe këtë e përmend thjesht për të theksuar hipokrizinë e opozitës, me gjithë këtë investim, që unë jam i bindur, është kthyer në dëmin e saj.

Natyrisht që nuk është një gjë pozitive kur bëhen lojëra të tilla politike, të cilat, në fund të fundit, nuk janë të mira edhe për imazhin e vendit dhe të politikës. Por gjithmonë në këto raste më duhet të nënvizoj edhe një herë tjetër largpamësinë e shokut Mao Ce Dun, “Turbullo që të kthjellohet”, pra…

Ilir Meta – …kanë nevojë ndonjëherë dhe për turbullirën, në kuptimin e mirë, që gjërat të kthjellohen  dhe kjo është një çështje që i takon drejtësisë.

Ylli Rakipi – Zoti Meta, jashtë asaj që i takon drejtësisë. Ky është një problem i lindur që në verë të vitit të kaluar.

Ilir Meta  – Cili problem?

Ylli Rakipi – Pretendimet e Tom Doshit që ka shkuar te njerëzit e shtetit. Duket si një lojë…

Ilir Meta – Unë po flas për akuzën publike dhe që historitë…

Ylli Rakipi – Ju jeni pjesë e rëndësishme e kësaj maxhorance. Domethënë ne jetojmë në një shtet ku tani nuk mund të qarkullojnë gjetje. Është si një lojë fëmijësh. Që të qarkullojë një gjë e tillë për muaj me radhë, mund të jetë një gjë totalisht qesharake, por ndërkohë nuk mund të merret nga shteti, mendoj unë, në mënyrë kaq qesharake. Ajo është një gjë që në momentet që lindi.

Ilir Meta – Nuk dua të kthehem pas dhe të jap ato shpjegime që ka bërë ministri Tahiri, që kanë dhënë autoritetet të tjera për këtë gjë. Unë personalisht, në pozicionin tim si Kryetar Kuvendi, sapo jam vënë në dijeni për këtë ngjarje, përveç takimeve të karakterit shoqëror dhe njerëzor, kam kryer takime të karakterit institucional me ministrin e Brendshëm në zyrën e Kryetarit të Kuvendit, me prokurorin e Përgjithshëm në zyrën e Kryetarit të Kuvendit, si dhe me prezencën e kryetarit të Komisionit të Sigurisë Kombëtare, zotit Braho, dhe kam kërkuar që të merren të gjitha masat jo vetëm për të siguruar jetën e dy deputetëve, që pretendohej se rrezikohej, por edhe për të hetuar gjithçka që ishte e mundur. I mbetem qëndrimit tim që pengesë kryesore për zbardhjen e kësaj çështjeje ka qenë vetë deputeti, pasi ai nuk ka bërë asnjë akt juridik që do t’i shërbente kësaj çështjeje.

Ylli Rakipi – E drejtë. Gjithsesi, unë pata në studio Mark Frrokun për gati dy orë. Siç rezulton tani në prokurori, ai edhe në studion time, sipas prokurorisë, nuk ka folur drejt. Domethënë ai ka dalë jashtë asaj ngjarjeje. Unë nuk e di nëse e keni parë atë bisedë, por ishte një dalje shumë e vështirë.

Ilir Meta – Nuk e kam parë, por thuaj pyetjen. 

Ylli Rakipi – Pyetja është shumë e thjeshtë: Cili është roli i Mark Frrokut në këtë histori, se kjo mbetet mjaft e errët?

Ilir Meta – Kjo nuk është pyetje për mua dhe konstatoj se i është dhënë një rëndësi sikur kjo është diçka e rëndësishme.

Ylli Rakipi – Ai është një deputet.

 Ilir Meta – Deputetë ka plot. Ka pasur dhe kongresmenë në Amerikë si Xhejms Trafikanti. Nuk është se ka vetëm në Shqipëri probleme të tilla me deputetë ose me të zgjedhurit. Ka dhe në vende të tjera. Por po të them që ky është një fenomen që nuk ndodh vetëm në Shqipëri. Natyrisht ngjarjet që po ndodhin janë një tregues i asaj që ne të gjithë duhet të jemi më të vëmendshëm për të ardhmen për të vendosur disa standarde, disa filtra që zgjedhin përfaqësues më me integritet në parlament dhe kudo në jetën publike.

Kthehemi te rasti i zotit Frroku. Nuk e kam ndjekur intervistën e tij me ju, por mund t’ju them, për mendimin tim, se nuk ka asnjë rëndësi se çfarë mund të ketë thënë Mark Frroku para 6 muajsh me zotërinë, që mund t’ia ketë treguar ose jo, siç thotë njëri, apo siç nuk  thotë tjetri dhe çfarë thotë sot. Kjo është një çështje e tij dhe e drejtësisë, nuk është çështje imja. Mund të mblidhen sot 10 veta, 20 veta bashkë dhe të përpiqen të dëmtojnë dikë politikisht. T’u premtojë dikush disa biznese, disa aksione, t’u premtojë disa gjëra, po, mund ta bëjnë këtë gjë. Kjo është çështje e tyre. Këtu kemi të bëjmë me një situatë dhe me një histori krejt të paqenë. Jo vetëm kaq, por dhe të ndryshuar dhe të falsifikuar hap pas hapi me qëllime të caktuara politike. Cili  është qëllimi? Destabilizimi i vendit ishte qëllimi kryesor dhe kuptohet premtimi i Berishës që do të kishim zgjedhje të parakohshme para 4-5 muajsh, ku me sa duket ai ishte vënë në dijeni që ekzistonte një skenar dhe një komplot i tillë. Dhe mënyra se si u soll opozita dhe si u përpoq ta administronte ajo këtë çështje, kur dihen shumë mirë raportet e saj se si kanë qenë me deputetin në fjalë para 21 janarit, më 21 janar dhe pas 21 janarit, të gjitha këto po tregojnë qartë se këtu ishte një qëllim, destabilizimi politik i vendit, i cili nuk ndodhi për arsye se kishim të bënim me një farsë, me një sajesë, por njëkohësisht sepse dhe opinioni publik u distancua, në radhë të parë edhe demokratët.

Ylli Rakipi – Gjithsesi, zoti Meta a ka kjo ngjarje një kosto për maxhorancën e sotme?

Ilir Meta – Atëherë po jap një përgjigje shumë të sinqertë dhe shumë të sigurt. Nuk ka asnjë kosto elektorale për maxhorancën e sotme. A ka krijuar një shqetësim dhe një problem në shoqërinë tonë? Po, por kjo maxhorancë unë mendoj se ka treguar vendosmëri për t’i çuar shumë gjëra në vendin e tyre. Do të kishte pasur një kosto shumë më të madhe, mendoj unë, në rast se maxhoranca do të kishte pranuar presionin dhe shantazhin që iu bë asaj. Sepse kemi parasysh deklaratat që iu bënë një javë para se të…

Ylli Rakipi – Ky është një këndvështrim juaji. Dy deputetë të maxhorancës tani janë në burg, të arrestuar.

Ilir Meta – Maxhoranca nuk ka asnjë përgjegjësi për atë gjë që ka ndodhur. Përkundrazi, maxhoranca ka përgjegjësi në qoftë se përpiqet të fshehë diçka që ka ndodhur. Nuk ka përgjegjësi në rast se i hap rrugë drejtësisë për cilindo individ që ka qenë, që është, apo që mund të jetë edhe nesër pjesë e saj.

Ylli Rakipi – Kjo është shumë e drejtë, shumë normale.

Ilir Meta – Por, në aspektin elektoral, të jeni të sigurt që maxhoranca nuk ka humbur asgjë.

Ylli Rakipi – Nuk po flasim në këtë rast për aspektin elektoral. Dy deputetë janë në burg, ka një akuzë të opozitës për dekriminalizimin…

Ilir Meta – Deputetët do të ndjekin çështjen gjyqësore. Kjo është një çështje e tyre. Maxhoranca u ballafaqua me problemin, erdhën kërkesat. Maxhoranca i votoi, i hapi rrugën procesit. Opozita nuk i votoi herën e parë, sikurse e keni vënë re ju, kishte arsyet e saj.  Maxhoranca është shprehur që çdo kërkesë e prokurorisë do ta mbështesë, do t’i hapë rrugë drejtësisë. Qytetarët e gjykojnë këtë dhe e shohin si një vullnet pozitiv që kjo maxhorancë të ecë përpara me rrugën e forcimit të ligjit. Te ligji jemi…

… për të gjithë, nuk ka rëndësi je apo nuk je pjesë e kësaj maxhorance.

                Ylli Rakipi – Zoti Meta, nuk e kam fjalën tani te kjo ngjarje që ka shumë elemente qesharake brenda. Pjesa e fundit që ne ndoqëm, ka vërtet elemente shumë qesharake, por unë insistoj edhe një herë te fakti që dy deputetë janë ndaluar. Ky është një mekanizëm i ndërtuar nga njerëz të kësaj kategorie, fillon 4 vjet më parë, siç e ndoqët në post produksionin tonë me përpjekjet e Dritan Priftit etj., dhe vijon me një video tjetër.

                Ilir Meta – Historitë me video janë histori me shantazhe, janë histori që nuk mund të kenë sukses dhe nuk mund të miratohen kurrë nga opinioni publik me ndonjë ngjarje sot, pse bën ngjarje. Bën ngjarje, sepse ato i paraqet, po themi, një ish-ministër, i paraqet një deputet, i paraqet një politikan dhe për momentin krijohen pikëpyetje nëse keni thënë diçka të vërtetë apo të pavërtetë, por kemi një pyetje tjetër. Përse një video në rastin e parë dorëzohet një vit e gjysmë pasi dikujt i preket një interes, apo jo, sepse, në qoftë se ka diçka komprometuese për dikë, kjo gjë çohet menjëherë te drejtësia, te prokuroria. Pra, kërkohet të bëhet shantazh nëpërmjet formave të tilla dhe vetëm të paligjshme, por pa asnjë diskutim edhe mjaft të ndyra, pa u lodhur për të gjetur fjalën më të përshtatshme.

                Edhe në rastin tjetër kemi një video që del dikush dhe thotë se më kanë thënë kështu e më kanë ashtu, që unë e quajta video e Tomës me Tomën, sepse pyetjet ishin të bëra dhe përgjigjet, me sa duket, ishin gjithashtu të përgatitura. Po pse kjo nuk ka vajtur te policia? A ka vajtur kjo video te Policia e Shtetit dhe policia nuk e ka pranuar? A ka vajtur kjo video te prokurori…

                Ylli Rakipi – Me sa di unë ka shkuar.

                Ilir Meta – Më fal pra, a ka vajtur kjo te prokurori i Përgjithshëm dhe prokurori nuk e ka pranuar, apo jo? Atëherë, përse kjo duhet të dalë, pasi ndodh një proces, i bëhet një presion një maxhorance, pasi deputeti në fjalë përjashtohet për shkak të këtij shantazhi? Pra, këtu nuk kemi të bëjmë me përpjekjen për të denoncuar një fenomen të caktuar, por kemi të bëjmë me lojëra nga më të ndryshmet, të cilat synojnë të shantazhojnë dikë apo disa, por edhe politikën në përgjithësi për interesa, të cilat le t’i zbardhë drejtësia.

                Ylli Rakipi – Zoti Meta, prej dy vjetësh ju jeni Kryetar i parlamentit shqiptar. Ç’mendim keni për përbërjen e këtij parlamenti? Përbërja e nxjerr nga populli, në fakt, nga populli jo, por ju i keni zgjedhur, kryetarët.

                Ilir Meta – Nga populli dhe nga partitë. Dakord, unë thashë edhe nga partitë. Ju e dini që unë kam qenë kundër kësaj reforme elektorale dhe, në rast se kemi qenë të gatshëm të pranojmë sistemin rajonal proporcional, kemi qenë gjithmonë për lista të hapura si Lëvizje Socialiste për Integrim. Rregullat e lojës nuk mund t’i imponojmë ne, janë këto, kemi disa ngjarje, kemi disa zhvillime, kemi disa kontestime për figurën e disa deputetëve, gjë që vë një pikëpyetje për të gjithë parlamentin, në mënyrë jo të padrejtë do të thosha, sepse shumica e deputetëve të parlamentit janë njerëz me vlera, janë njerëz me një background të rëndësishëm intelektual, shoqëror, madje edhe me eksperiencë politike, por shpesh, për shkak të stimulimit të konfliktit politik prekin…