Meta: Berisha nje pervers

 

Eni Vasili– Mirëmbrëma dhe mirë se erdhët edhe sonte në “Studio e hapur”!

            Pas një bashkëqeverisjeje gati 2-vjeçare dhe në prag të zgjedhjeve lokale me mua në studio është kryetari i LSI-së dhe Kryetari i Kuvendit, Ilir Meta.

            Mirëmbrëma dhe mirë se erdhët!

            Ilir Meta – Mirëmbrëma!

            Eni Vasili – Faleminderit që e pranuat ftesën e “Studios së hapur”, edhe pse jam e bindur që jeni shumë i ngarkuar, sepse është një periudhë takimesh edhe elektorale.

            Ilir Meta – Kënaqësia ime, gjithashtu!

            Eni Vasili – Faleminderit që jeni me mua!

            Zoti Meta, do të fillojmë menjëherë me pyetjet për të moshumbur asnjë minutë nga koha jonë e transmetimit, pasi pyetjet janë të shumta.

            Dua ta filloj me një çështje të aktualitetit. Në fakt, pak minuta më parë ish-kryeministri Berisha, njëkohësisht deputet i Kuvendit të Shqipërisë, ka publikuar në faqen e tij të facebook-ut një regjistrim audio, ku dëgjohet Kryeministri Rama në një mbledhje, ndoshta me drejtues të administratës, ku jep urdhra elektoralë.

Ju ftoj juve dhe teleshikuesit që për disa sekonda ta dëgjojmë këtë regjistrim dhe të kemi mundësi ta komentojmë. Është një regjistrim audio, i cili tashmë është publikuar në të gjitha portalet dhe site-t online dhe dua që ta komentojmë.

Ilir Meta– Me kënaqësi të madhe!

Eni Vasili– Faleminderit!

Regjia, ju lutem, më ndihmoni me minutazhin audio që është publikuar nga ish-kryeministri i vendit, zoti Berisha, deputet i PD-së në faqen e tij të facebook-ut!

(Regjistrim.)   

Zoti Meta, a keni një koment?

            Ilir Meta – Koment për çfarë? Për kaq, apo keni diçka tjetër? 

            Eni Vasili – Fillimisht kaq. Flitet që keni qenë edhe ju në këtë takim, por është pjesa e dytë e pyetjes. A mund të kemi një koment nga ju për këtë regjistrim dhe atë çfarë ka thënë Kryeministri në këtë takim?   

            Ilir Meta– Pa hyrë në pervesitetet e Berishës, nuk do të merrem, sepse absolutisht kemi të bëjmë me një banalitet, kemi të bëjmë me një montazh. Berisha në këtë rast nuk ka dhënë pjesën, ku Kryeministri Rama ka bërë të qartë që nuk duhet bërë asnjë aktivitet politik dhe propagandistik në shkolla, me mësuesit etj., por ai e ka përzier sipas interesit të tij. Kjo është çështja e tij. Nëse këtu ka shkelje apo problem, Berisha duhet ta çojë në prokurori.

            Eni Vasili – Zoti Meta, problemi supozohet të jetë këtu: Kryeministri u drejtohet drejtorëve dhe nëndrejtorëve, shefave të administratës, administrata është e politizuar. Janë vite impenjimi të BE-së për këtë çështje…

            Ilir Meta – Unë prandaj e thashë që kemi të bëjmë me një banalitet, perversitet, sepse nuk ka qenë një takim me drejtorë, por me strukturat e partisë. Natyrisht, në strukturat e partisë, një pjesë e tyre, ka edhe njerëz, të cilët janë vlerësuar, janë edhe drejtorë, por kanë edhe funksione të tjera etj. Nuk ka qenë drejtori i Policisë së Shkodrës, nuk ka qenë drejtori i SHIK-ut të Shkodrës, nuk kanë qenë drejtues, të cilët e kanë të ndaluar të marrin pjesë në aktivitete politike dhe partiake. 

Kur është ngritur shqetësimi për angazhimin e drejtorëve, pra që një pjesë e tyre nuk shërbejmë me përgjegjshmërinë që duhet, nuk kanë atë angazhim që duhet për të qenë të angazhuar edhe me punët e partisë, qoftë edhe me fushatën, pa dëmtuar punën e tyre si drejtues, natyrisht që është dhënë një mesazh. Këtu nuk shoh ndonjë gjë të keqe.

            Eni Vasili – Megjithatë, bëhet fjalë për drejtorët e administratës. A është normale kjo gjë në një shtab elektoral, apo jo?

            Ilir Meta – Është shumë normale që në një takim me strukturat e partisë të jepen disa porosi. Çfarë ka këtu diçka të paligjshme?

            Eni Vasili – Implikimi i administratës në fushatë elektorale.

            Ilir Meta – Nuk ka asnjë implikim të administratës. Nuk mund ta ndaloni dikë që është drejtor, i cili është anëtar i një partie, është në strukturën e një partie, të angazhohet dhe të punojë në fushatë për këtë parti.

            Eni Vasili – Me detyra konkrete.

            Ilir Meta – Me detyra konkrete, sepse zona është konkrete, ka qendra votimi.

            Eni Vasili – Sa kuti do të kenë drejtorët e administratës në përgjegjësinë e tyre personale. Këtu nuk ka asgjë për të komentuar?!

            Ilir Meta – Kjo është një histori banale. Po të donte Berisha, aty ishte edhe pjesa ku Kryeministri foli për çështjen e arsimit, por ajo nuk i intereson, sepse aty del shumë qartë një pozicion shumë luajal dhe etik, i cili bën të qartë se nuk duhet të politizohet sistemi arsimor. Por mësuesit që janë anëtarë apo simpatizantë të LSI-së ose PS-së askush nuk mund t’i ndalojë që jashtë orarit të mësimit të punojnë, të takohen me njerëzit e komunitetit, me qendrën e votimit dhe kudo. Kështu që është një histori Berishe. Është historia e njeriut që asnjëherë nuk e ka angazhuar administratën në fushata zgjedhore!

            Eni Vasili – Megjithatë, drejtorëve u kërkohet përgjegjësi për votat?

            Ilir Meta – Ata që janë anëtarë të strukturave të partisë, patjetër që kanë detyrat e tyre, siç kanë edhe të tjerë që nuk janë drejtorë.

            Eni Vasili – Pse u kërkohet patjetër drejtorëve dhe nëndrejtorëve përgjegjësi dhe jo aktivistëve?

            Ilir Meta – Sepse këtu është përzgjedhur vetëm një pjesë. Pra, këtu bëhet fjalë për një takim me strukturat e partive, ku të gjithë kanë detyrat e tyre, edhe ai që është i papunë, edhe ai që është në punë, edhe dikush që është në aktivitet privat, i cili është anëtar partie.

            Eni Vasili – Ju keni qenë këtë takim?

            Ilir Meta – Po, kam qenë.

            Eni Vasili – Keni kontribuar në këtë takim me fjalën tuaj, pra keni folur?

            Ilir Meta – Patjetër.

            Eni Vasili – Udhëzimet tuaja kanë qenë të njëjta me këto të Kryeministrit?

            Ilir Meta – Udhëzimet tona kanë qenë gjithmonë në respekt me ligjin. Pastaj në angazhimin e partisë, patjetër, ne kemi mënyrën tonë të komunikimit të organizimit. Berisha në qoftë se e shikon që ka ndonjë problem të paligjshëm, ta çojë në prokurori.

Eni Vasili– Pra, nëse nesër ish-Kryeministri Berisha publikon një regjistrim audio tuajin…

Ilir Meta  – Të publikojë çfarë të dojë Berisha, jam mësuar me këto punë, nuk më shqetësojnë fare.

Eni Vasili– Të publikojë çfarë të dojë? Ju nuk keni frikë që mund të dalë diçka e ngjashme, apo diçka që mund t’ju implikojë?

            Ilir Meta – Absolutisht unë nuk kam asnjë shqetësim.

            Eni Vasili – Vazhdojmë me zgjedhjet dhe të shohim nëse do të kemi zhvillime përgjatë emisionit, zoti Meta, në qoftë se do të kem pyetje të tjera rreth kësaj çështjeje, pasi nuk e di nëse do të publikohet diçka tjetër.

            Ilir Meta – Nuk ka për të pasur asnjë zhvillim tronditës, të jeni e qetë, asnjë ngjarje tronditëse.

            Eni Vasili – Vazhdojmë me zgjedhjet ku jeni impenjuar fuqishëm. A mund të më thoni, zoti Meta, si kryetar i LSI-së, gjithashtu, por dhe si Kryetari i Kuvendit të Shqipërisë: Si e parashikoni këtë fushatë?  Kanë ndodhur disa incidente dhe ndoshta njëri ka lidhje me zgjedhjet.

            Ilir Meta – Çfarë incidenti ka ndodhur?

            Eni Vasili – Për shembull incidenti i Durrësit.

            Ilir Meta – Si ka ndodhur?

            Eni Vasili – Ka pasur një përplasje. E dimë se si është përshkruar, e dimë që zoti Dako ka mbajtur qëndrimin që ka mbajtur.

            Ilir Meta – Ka mbajtur një qëndrim shumë të qartë.  Të dënohen autorët.

Eni Vasili– Ju parashikoni që të ketë tensione?

Ilir Meta– Nuk ka arsye për të pasur tension.

Eni Vasili– Është ky një moment i cili mund të paralajmërojë fushatë, apo jo?

Ilir Meta– Nuk ka asnjë arsye për të pasur tension dhe nuk ka asnjë interes nga ana e maxhorancës për të provokuar tension. Përkundrazi, është interesi maksimal për të garantuar standardet më të larta në zgjedhje. Po të ishte që maxhoranca kërkonte patjetër të fitonte në këto zgjedhje, gjëja e parë që do të bënte, ka dhe raportin e ODIHR-it për heqjen e paligjshme dhe antikushtetuese të anëtarit të KQZ-së që bëri Berisha përpara zgjedhjeve të 23 qershorit, gjëja e parë pra, do të kishte ndryshuar balancën në Komisionin Qendror të Zgjedhjeve. Maxhoranca u tregua mjaft tolerante, sepse e di që votat nuk varen nga KQZ-ja, por nga qytetarët shqiptarë, varen nga ato kutitë atje te qendrat e votimit.

Eni Vasili– Në fakt fushata zyrtarisht fillon më 22 maj, por ajo ka filluar. Ka dhe një debat për këtë çështje, por pyetja për ju sigurisht nuk është kjo. Pyetja është se cilat janë pritshmëritë tuaja nga kjo fushatë elektorale dhe nga këto zgjedhje?

Ilir Meta  – Pritshmëritë e mia janë më të mëdha nga produkti që do të sjellë reforma në administratën territoriale sesa nga, po themi, rezultati i zgjedhjeve, sepse unë jam tepër i bindur në rezultatin pozitiv në tërësi të Aleancës për Shqipërinë Europiane. Por kjo nuk është çështja më e rëndësishme, sepse këto nuk janë zgjedhje politike. Zgjedhjet politike janë në vitin 2017. Ajo që ne presim është të shohim projekte konkrete nga kandidatët se si do ta shfrytëzojnë këtë hapësirë të re që fitojnë këto bashki, me këto resurse të reja të shtuara, për të bërë disa politika të reja që nuk janë bërë deri tani nga drejtuesit e bashkive, sidomos për sa i takon zhvillimit strategjik të bashkisë, sidomos në drejtim të rritjes së punësimit, ku bashkitë duhet të kenë një rol aktiv dhe jo çdo gjë si deri tani të pritet nga qeveria.

Eni Vasili– Ju thoni në fakt që është një votë për administrimin, por opozita thotë se kjo do të jetë një votë që do të gjykojë 2-vjeçarin e qeverisjes Rama-Meta.

Ilir Meta– Është e drejtë e opozitës.

Eni Vasili– Do të kemi një votë të orientuar politikisht, apo një votë administruese sipas jush?

Ilir Meta– Sipas mendimit tim këto duhet të jenë votime për zgjedhje vendore dhe për zgjidhje vendore, problemet kryesore që ka komuniteti. Opozita kërkon ta trajtojë politikisht, kjo është e drejtë e saj.

Eni Vasili– Zoti Meta, në fakt janë…

Ilir Meta– Në fakt ky është dhe gabimi, mendoj unë, që bën opozita, sepse praktikisht kërkon politikisht të shqyrtojë bashkitë duke i parë ato jo në funksion të zgjidhjeve të problemit të komunitetit, kompetenca që ka pushteti vendor, por të konfrontimit me qeverinë, ndërkohë që qytetarët nuk janë shumë të interesuar për këtë gjë. Ata janë të interesuar që në Shkodër, Sarandë, Lezhë, Gjirokastër, bashkitë të bashkëpunojnë edhe me qeverinë për të zgjidhur problemet që ka bashkia, që kanë qytetarët.

Eni Vasili– Janë 61 njësi vendore. Keni propozuar kandidatë në 15 prej tyre dhe në disa bashki kryesore të rëndësishme duke krijuar dhe hatërmbetje, në mënyrë të veçantë brenda socialistëve,  edhe pse hatërmbetje në hije.

Ilir Meta– Nuk ka hatërmbetje brenda socialistëve për këtë shkak, përkundrazi. Pra, është një dëshpërim nga ata që donin të prodhonin konflikte, sepse hatërmbetje ka dhe brenda socialistëve, atje ku nuk ka propozuar LSI-ja, sepse kanë pretenduar 5 veta, 7 veta. Kjo është normale. Ka dhe te LSI-ja, aty ku propozohet dikush nga LSI-ja, se kanë qenë dhe 4 të tjerë që kanë menduar se ata janë më të mirë. Pra, këto janë  procese normale, por mund të them që raportet PS-LSI janë raporte të shkëlqyera.

Eni Vasili– Megjithatë a mund ta quajmë për shembull një socialist të hatërmbetur Blushin kur flet për hasanizimin dhe i referohet kryetarit të bashkisë së Kukësit?  Është një kandidat juaji. Besoj mund ta keni ndjekur.

Ilir Meta– Unë nuk kam dëshirë të komentoj mendimet e lira të një deputeti, siç është dhe zoti Blushi, sepse është e drejtë e çdo deputeti të japë mendimet e tij, të jetë edhe kritik. Por në rastin konkret kemi të bëjmë me një absurditet skandaloz për arsye sepse kam vënë re dhe intensifikimin e sulmeve nga zoti Basha për zotin Halili, duke dashur të denigrojë figurën e tij për shkak të kandidimit të tij në këto zgjedhje, kur e vërteta si për zotin Basha, si për zotin Blushi është një dhe vetëm një, që Hasan Halili ka treguar që është një njeri me shumë karakter, me shumë dinjitet, i cili nuk ka ardhur me LSI-në sepse LSI-ja ishte në pushtet, përkundrazi. Ai ka  ikur nga Partia Demokratike. Partia Demokratike ishte në pushtet dhe ai ka ikur 2 muaj para zgjedhjeve kur nuk dihej se cili do të ishte fati i këtyre zgjedhjeve. Dhe ka ikur për një arsye që të gjithë qytetarët e Kukësit dhe jashtë Kukësit e dinë shumë mirë, sepse nuk pranoi presionet që i bënte Berisha, deputeti i Kukësit…

Eni Vasili– Dakord. Ka të bëjë…

Ilir Meta– Të lutem, këtu do të më presësh, sepse është e drejta juaj të shkoni nga një pyetje në tjetrën. Por unë këtu do të ndaloj shumë, sepse e quaj të pamoralshme që një njeri që bën veten shumë të moralshëm, që rrallë politikanë të caktuar e bëjnë. Pra, e theksoj dhe një herë: 2 muaj përpara se të bëheshin zgjedhjet, kur iu kërkua të merrte pjesë në inaugurimin e ujësjellësit të Kukësit, një investim prej disa miliona eurosh,  një investim i cili nuk sillte ujë për Kukësin, por ishin vetëm para të shkuara dëm dhe për të cilat ai kishte ngritur disa herë shqetësime edhe te Berisha, edhe tek të gjithë ministrat e asaj kohe, sepse ai projekt ishte i dështuar, ishte një projekt korruptiv, për të cilin Kontrolli i Lartë i Shtetit ka çuar tërë ata përgjegjës në prokurori, dhe nuk pranoi të merrte pjesë në një ceremoni mashtrimi, ku gjoja do të inaugurohej ky ujësjellës si sukses i madh i Partisë Demokratike dhe u tha: “Unë për këtë gjë ndahem me Partinë Demokratike për qytetarët e Kukësit”, dhe këtë gjë e ka bërë dy muaj përpara zgjedhjeve të 23 qershorit, kur Partia Demokratike ishte në pushtet, kur Sali Berisha ishte Kryeministër, kur deputeti që orkestronte gjithë këtë presion ishte ministri i Brendshëm, që ishte zoti Noka, i cili tani orkestron edhe këto sulme kundër zotit Halili. Do ta marrin përgjigjen në 21 qershor; të jenë të qetë.

            Eni Vasili – Zoti Meta, a është normal kalimi i këtyre personazheve që, në fakt, edhe me ndarjen e re territoriale kthehen pothuajse në guvernatorë të qyteteve tona dhe të rajoneve tona…?

            Ilir Meta – Unë nuk jam këtu për t’ju thënë a është normale kjo apo është normale ajo.

            Eni Vasili –…apo edhe e deputetëve?

Edhe deputeti Shehu, Ylli Shehu…

            Ilir Meta – Shikoni, ju lutem, nuk jam duke u marrë as me deputetë. Më folët për një çështje konkrete, ju thashë një argument…

            Eni Vasili – Qëndrojmë tek e njëjta çështje.

            Ilir Meta – Jo, ju lutem!

            Ju thashë një argument konkret që ka rëndësi, që e dëgjojnë qytetarët e Kukësit tani që po e them unë dhe e dinë ata më mirë, dhe do t’ia japin përgjigjen edhe zotit Dasho, edhe cilitdo tjetër në datën 21 qershor, sepse nuk ka pranuar si shumë të tjerë që, kur janë në pushtet, konformohen për hir të ruajtjes së privilegjeve, përkundrazi, ka dalë kundër Kryeministrit të asaj kohe, Sali Berishës dhe, të dalësh në Kukës, sidomos në atë kohë, nuk ishte gjë e lehtë. Ka dalë kundër ministrit të Brendshëm të asaj kohe…

            Eni Vasili – Dakord. Ka akuza dhe…

            Ilir Meta – Ju lutem!

            Eni Vasili – Nuk e vazhdojmë dot. Ka akuza që thonë se ka qenë një çështje interesash…

            Ilir Meta – Të lutem!

            Eni Vasili – …dhe jo çështje parimore.

            Ilir Meta – Jo, çështje interesi është kjo që donin të inauguronin një ujësjellës që nuk çonte ujë në Kukës, sepse ishte një projekt i gabuar, të cilin ai e kishte kundërshtuar që në fillim dhe përfundimisht tani është miratuar projekti, i cili do të zgjidhë problemin e ujit të pijshëm për Kukësin, ndërkohë që për këtë shpërdorim që është bërë, Kontrolli i Lartë i Shtetit ka çuar dosjen në prokurori dhe ka filluar çështjen. Pra, kjo është çështja.

            Eni Vasili – Po. Megjithatë, fenomeni në vetvete është fenomeni i kalimit të personazheve tipikë të partive të caktuara në parti të kampit tjetër.

            Ilir Meta – Personazhet janë të lira. Kemi personazhe që bënin si të majtët më të thekur, tani bëjnë çdo gjë që të humbasë e majta. Kjo është një liri, të cilën duhet ta pranojmë, jemi në demokraci. Pastaj, rastet konkrete do t’i gjykojmë konkretisht.

            Eni Vasili – Për shembull, po flisja edhe për zotin Ylli Shehu. A është normale kjo? Kanë vdekur ideologjitë? Kanë vdekur besimet? Ajo që akuzojmë është: në emër të çfarë gjëje kërkojmë vota?

            Ilir Meta – Po, më falni!

            Së pari, një herë këtë çështje shqiptarët e zgjidhin me votë për çdo individ, e zgjidhin edhe për çdo forcë politike që bën një zgjedhje të caktuar.

            A është morale që zoti Mediu të dalë në televizor dhe të thotë: “Në qoftë se nuk kandidohet Agron Duka, ne do të dalim në 61 bashki me kandidatë të pavarur”? A e keni dëgjuar, apo jo, këtë gjë? Kështu ka thënë: “Sepse na ka premtuar Lulzim Basha dhe na ka mashtruar. Na ka thënë se Agron Duka do të jetë kandidat për kryetar bashkie në Durrës”.

            Kur mbledh partinë kryetari, në rastin konkret zoti Mediu, dhe u thotë të gjithëve: “Bëhuni gati, sepse, në rast se ne nuk do të kandidojmë në Durrës, sepse na ka prerë në besë Lulzim Basha, na ka premtuar, na ka mashtruar dhe na ka thënë se në sondazhe del fitues Agron Duka…”, madje u thotë edhe gjëra të tjera, por “kjo gjë nuk ndodh, sepse kandidatët e tjerë kanë bërë këto gjëra e të tjera”, se unë nuk mund të merrem me këto histori, se nuk më takon, dhe kur këta të gjithë bëhen gati për t’i qëndruar kësaj linje, një ditë papritur, pa u dhënë asnjë sqarim, merr një pozicion tjetër. Çdo deputet ka të drejtën e tij të bëjë zgjedhjen e tij. Kështu që të mos i hyjmë kësaj gjëje.

            Eni Vasili – Dakord.

Megjithatë, zoti Meta, Ylli Shehu është bërë deputet duke kërkuar vota kundër jush, kurse sot është me ju. A ka një moral qeverisja, politika? Pyetja që ngre publiku sot është pikërisht kjo.

            Ilir Meta – Unë mendoj se këtë përgjigje e japin qytetarët me votën e tyre. Përgjigjen edhe për këtë rast besoj se mund ta merrni më 21 qershor.

            Eni Vasili – Në rregull. Kemi kohë.

            Ilir Meta – Përgjigjen më të mirë do ta merrni në vitin 2017, sepse unë mendoj që përpjekjet për të kaluar në moralizime absurde janë të dështuara. Në politikë çdo veprim që i shërben së ardhmes është i moralshëm. Çdo veprim që i shërben së ardhmes dhe u shërben qytetarëve.

            Eni Vasili – E qartë.

            Meqenëse jemi te Kukësi dhe të përqendruar edhe për disa sekonda te Kukësi, ka pasur një incident gjatë ditës së djeshme, një përplasje mes disa banorëve protestues dhe policisë. Ju përmendët banorët e Kukësit dhe m’u duk sikur po u drejtoheshit në mënyrë të veçantë. A keni koment për atë ngjarje?

Ilir Meta – Komenti im është që sjellja duhet të ishte më e përmbajtur. Sigurisht, Kukësi ka probleme të rëndësishme sociale. Janë probleme absolutisht të krijuara prej një kohe të gjatë dhe Partia Demokratike nuk ka bërë ndonjë gjë për të zgjidhur problemet e Kukësit, pavarësisht se në të kaluarën i merrte votat me një shumicë të jashtëzakonshme, por absolutisht edhe sjellja e një përfaqësuesi të forcave të rendit ka qenë e papranueshme.

Eni Vasili –Po, e shefit të Krimeve.

Ilir Meta – Edhe ministri i Brendshëm, zoti Tahiri, ka marrë një masë mjaft korrekte. Problemet zgjidhen me dialog dhe me bashkëpunim.

Eni Vasili –“Më shumë shërbim dhe punësim” është slogani juaj në këtë zgjedhje, zoti Meta.

Pra, ju jeni i qartë se në këto dy vjet punësimi dhe shërbimi ndaj qytetarëve nuk ka qenë aty ku duhet?

Ilir Meta – Absolutisht, nuk mund të themi se shërbimi dhe punësimi janë atje ku duhet, përkundrazi, duhet një standard më i lartë në shërbimin ndaj qytetarëve dhe një përkushtim më i madh ndaj tyre. Pa dyshim që duhet bërë shumë më tepër për punësimin dhe, për herë të parë, me reformën e re administrativo-territoriale bashkitë marrin një mundësi të rëndësishme për të kontribuar dhe për të bërë politika edhe për punësim, sepse krijohet një hapësirë shumë e madhe dhe do të kenë shumë më tepër resurse sesa deri tani, ku fragmentimi e bënte të pamundur të bëhej një politikë punësimi, një nxitje investimi në një zonë të caktuar.

Eni Vasili –Dakord. Ndoshta do të flasim sërish pastaj për punësimin si një nga tezat kryesore të qeverisjes “Rama” dhe nëse ju jeni të kënaqur me të do të thellohemi pak më tej, por qëndrojmë te zgjedhjet.

Keni bërë një koalicion të gjerë me 38 parti, qëishte i nevojshëm, pasi shifrat e zgjedhjeve të fundit janë favorizuese për koalicione të mëdha, pra, është një lloj frike kjo. Të  paktën, analistët, komentatorët, thonë se një koalicion kaq i madh i duhet për të maksimizuar çdo votë.

Ilir Meta– Nuk ekziston asnjë lloj frike. Absolutisht! Të jeni e sigurt që koalicioni ynë nuk është i shtuar,  për shkak të faktit se jemi në një garë mjaft rivalizuese, ku çdo votë ka rëndësinë e vet. Por në demokraci, edhe kur ndihesh shumë  më i fortë se rivali, gjithmonë është vlerë kur tregon respekt maksimal edhe ndaj një vote të vetme, aq më tepër ndaj forcave të ndryshme politike, të cilat shpeshherë,  nuk kanë edhe ndonjë vlerëshumë të madhe elektorale, por kanë një  domethënie shumë të madhe. Janë parti, që përfaqësojnë shtresa të caktuara, që  përfaqësojnë minoritete dhe grupime të  caktuara dhe, do të thosha, se është shprehje e një filozofie gjithëpërfshirëse shumë  më tepër sesa e një  nevoje jetike për të  fituar zgjedhjet.  Absolutisht, ne  jemi shumë të qetë në këtë drejtim.

Eni Vasili– Bamir Topi, Nard Ndoka brenda  këtij koalicioni, që duken aleanca jo natyrale…

Ilir Meta –Është një gjë shumë pozitive. Pastaj të mos harrojmë këto janë zgjedhje vendore, janë zgjedhje lokale. Kudo  bashkëpunohet në  nivel vendor, pa kufij ideologjik. Problemet e komunitetit nuk janë probleme kaq politike, sa i politizojnë.

Eni Vasili– Shpeshherë, zoti Rama ka bërë shaka komike për zotin Ndoka apo “shaka të tjera politike”, çka do të thotë akuza për Bamir Topin dhe kjo aleancë si duket po hap një aleancë jo natyrale dhe rikthehemi gjithmonë tek i njëjti diskutim.

Ilir Meta– Çdo aleancë në zgjedhjet e pushtetit vendor është më se natyrale, do të thosha.

Eni Vasili– Pse dhatë pëlqimin tuaj për Erion Veliajn në Tiranë, zoti Meta? A kishte emra të tjerë që  mbështeste bazën socialiste?

Ilir Meta– Unë  nuk mund të flas në emër të bazës socialiste. Ky është një proces i Partisë Socialiste. Ne kemi qenë të hapur për çdo kandidat me vlera  të Partisë Socialiste.

Zoti Veliaj ishte një prej tyre. Ka qenë një ministër shumë i suksesshëm, në vlerësimin tim,  në shumë drejtime. Ka hedhur  themele të rëndësishme për herë të parë të një  politike, e cila synon të orientojë të rinjtë drejt tregut të punës,  ndryshe nga deri tani, duke sjellë mjaft elemente të reja, që kanë të bëjnë me  edukimin në formimin profesional. Absolutisht, ka bërë përpjekje të mëdha për të rritur fondin për punësimin, që është shumëfishuar në motivim të sipërmarrjeve, të cilat hapin vende të reja pune, sepse  biznesi duhet nxitur, jo thjesht  të fitojmë shumë, por ajo që  është më e rëndësishme të investojmë shumë dhe të  hapen shumë vende të reja pune. Ky është një interes i gjithë shoqërisë dhe i qeverisë,  në mënyrë të veçantë, dhe absolutisht është njeri me energji dhe i përkushtuar…

Eni Vasili– Çfarë mendoni për  garën e Tiranës, midis Veliajt dhe doktorit Kosova?

Ilir Meta– Tirana është një garë e hapur. Janë shumë kandidatë në garë. Pa dyshim, që është zoti Veliaj, është zoti Kosova, më pas kemi kandidatë të pavarur, zotin Bojaxhi, zotin Arben Tafaj, zotin  Sazan Guri…

Eni Vasili– Tirana është  bërë superqendër, tashmë, apo jo? Me këtë ndarje territoriale është bërë pothuajse gjysma e vendit.

Ilir Meta– Ndoshta mund të ketë edhe të tjera. Ky zgjerim ka qenë i  domosdoshëm, sepse Tirana si  bashki e vjetër i kishte venat tërësisht të ngushtuara. Kishte nevojë për tjetër  hapësirë, për tjetër frymëmarrje.

Eni Vasili– A jeni gati për menaxhimin e këtyre supersipërfaqeve, zoti Meta?

Ilir Meta– Po, patjetër.

Eni Vasili– A janë gati menaxherët e kandiduar?

Ilir Meta– Unë them që edhe zgjedhja që është bërë është  bërë në funksion të kësaj supersfide, le ta quajmë, dhe besoj se zoti Veliaj është njeriu i duhur në kohën e duhur për ta përballuar këtë sfidë. Natyrisht, jo i vetëm, sepse askush nuk mund ta përballojë një sfidë të tillë i vetëm, por me filozofinë që përfaqëson koalicioni ynë, jam i sigurt që ai do ta arrijë këtë gjë.

Eni Vasili– Ju kemi parë shpesh në Shkodër. Pse ky interes për Shkodrën, ndërsa kandidatja vjen  nga Partia Socialiste?

Ilir Meta–  Ka qenë  insistimi im që marrëveshja Aleanca për Shqipërinë Europiane të firmosë në Shkodër, sepse ne mund ta firmosnim në Tiranë. Ishte shumë e thjeshtë  edhe përpara datës kur e kemi firmosur, por unë  insistova që ta  firmosnim në Shkodër për të dhënë një mesazh të rëndësishëm jo thjesht për Shkodrën, por për të gjithë Shqipërinë, sepse gjithmonë ka pasur një politikë të zotit Berisha për të stimuluar një ndarje krahinore në Shqipëri, dhe, kjo ka qenë e dëmshme dhe mbetet e dëmshme çdo nxitje e tillë dhe  ushqim i çdo paragjykimi të tillë. Kështu që kjo përputhet me vlerat që ka Shkodra,  sipas meje, në  historinë e vendit tonë dhe me  traditat e veçanta që ka  Shkodra, për sa i takon edhe të majtës. Nuk e kam  fjalën këtu për periudhën e sistemit komunist…

Eni Vasili– Pra, ka të bëjë me qytetin, jo me kandidaten?

Ilir Meta– Ka të bëjë  me të gjithë historinë e Shkodrës dhe  jo vetëm me qytetin, se bashkia nuk përfshin vetëm qytetin, dhe natyrisht ka të bëjë edhe me kandidaten, sepse mendoj se është gjetur kandidatja më përfaqësuese jo e të majtës, në këtë rast, do të  thosha, e Aleancës për  Shqipërinë Europiane, për  bashkinë e re të Shkodrës; është një kandidate e jashtëzakonshme, me vlera të  jashtëzakonshme. Është  mjaft energjike, mjaft e re,  por edhe shumë e suksesshme në jetën e saj. Në mos gaboj ka rreth 800 të punësuar në aktivitetin e saj. Ka më shumë të punësuar në aktivitetet  e saj sesa ka punonjës Bashkia e Shkodrës. Nuk  është një kandidate që synon të marrë një vend pune dhe të bëjë  disa tenderë, siç mund të jetë perceptim i rëndomtë ndonjëherë për këto detyra, por e cila e do qytetin e  saj, e  do vendin e  saj dhe beson që mund të bëjë shumë për të ndryshuar  jetën e këtyre qytetarëve dhe për t’u krijuar mundësi të tjera.

Eni Vasili – Në fakt një garë  e veçantë ajo e  Shkodrës mes dy zonjave.

Ilir Meta– Për mendimin tim është gara më e bukur në Shqipëri. Për këtë gjë përsëri meritën e  ka Keti, sepse jam i sigurt që në rast se nuk do të ishte Keti kandidate, absolutisht nuk do t’i kishte  ardhur kurrë radha Voltana Ademit për të qenë kandidate e Partisë Demokratike. Atë e kanë vënë me shumë vështirësi, duhet të kishin vënë ndonjë kandidat tjetër.

Eni Vasili – Por, ju të paktën e njihni Voltanën Ademin, se Kryeministri tha se nuk e njeh.

Ilir Meta –  Pa dyshim që unë e njoh, kam konsideratë, por absolutisht, e them me bindje të plotë, merita për këtë garë të bukur është e Keti Bazhdarit. Kurrë nuk do t’i kishte ardhur radha Voltana Ademit në Partinë Demokratike të Shkodrës për të qenë kandidate për kryebashkiake. Kam shumë respekt për të si deputete.

Eni Vasili– Pse e thoni këtë? E konsideroni një kandidate të dobët? Pra, për këtë arsye?

Ilir Meta –Jo!

Eni Vasili –Apo thjesht një gruaje i duhej vënë një grua përpara dhe ky ishte rasti i Voltanës?

Ilir Meta–  Mendoj që është edhe kjo arsye.

Eni Vasili –Pra, thjesht gjinore.

Ilir Meta –  Jo vetëm kaq.

Eni Vasili– Gjinore dhe seksiste, do të thosha unë edhe  si femër.

Ilir Meta– Unë nuk do ta thosha këtë gjë. Është një garë interesante, një garë e bukur dhe gara më interesante e këtyre zgjedhjeve, mendoj unë.

Eni Vasili – Do presim dhe do të shikojmë. Kemi dy pyetje,  më pas kemi një hapësirë publicitare.

Zoti Meta, qëndrojmë te zgjedhjet, te rikandidimi i disa personazheve. Partia Socialiste kandidon disa emra, të cilët garojnë për herë të dytë apo edhe të tretë. Po ju lexoj disa emra: Dako, Sejdini, Fatos Tushe në Lushnjë, Tushaj në Lezhë. A janë ata  shembull për  qeverisjen vendore? Pse ishte i nevojshëm ky kandidim për herë të dytë, të tretë?

Ilir Meta – Besoj se nuk kemi të bëjmë me një fenomen të përgjithshëm. Kemi disa raste të veçanta. Këtë gjë do ta gjykojnë qytetarët. Meqenëse ju përmendët Viktor Tushën, absolutisht është modeli i një kryebashkiaku me shumë nivel, personalitet dhe jam i bindur se eksperienca që ka ai me këtë sfidë të madhe të menaxhimit të bashkisë së rrethit të Lezhës, e  cila është gati 3-4 herë më shumë se bashkia e   deritanishme, ka nevojë për  këtë eksperiencë. Jam i bindur se zoti Tushe do të kishte mundur të bënte shumë më tepër për Lezhën dhe do ta tregojë këtë gjë në të ardhmen, pas rikonfirmimit të padiskutueshëm në 21 qershor, sepse Lezha, për shembull, është një qytet mjaft i ngushtë, aktualisht, një qytet ku nuk ke mundësi të bësh asnjë lloj investimi, i cili mund ta ndryshojë jetën e qytetit, si  në drejtim të terreneve sportive, si në drejtim të një parku industrial. Prej kohësh është folur dhe është punuar  për të bërë një park industrial, por ai nuk mund të bëhet kurrsesi në territorin e bashkisë ekzistuese, sepse ajo është mjaft e ngushtë dhe për të realizuar këtë park duhet të bashkëpunohet me komunat e  tjera, që është një histori më vete, një dramë e  paparë. Kemi pasur raste të tilla, kur kryetari i komunës pengonte, për shembull investitorin në një nga komunat në Veri të Shqipërisë që të sillte teknologjinë, e cila ishte suedeze, do të fuste njerëz në punë, sepse ai thjesht nuk i jepte  investitorit një letër. Mendoj se  evitimi i këtij fragmentarizmi skandaloz që ka qenë, do t’i japë një frymëmarrje tjetër, jo vetëm  Lezhës, por të gjitha bashkive të reja të Shqipërisë. Kanë shumë më tepër resurse dhe mundësi për të bërë politika…

Eni Vasili – Ju nuk keni frikë nga konsumimi i mandateve, nga fakti që shumë gjatë në të njëjtin post, mund të konsumohet  edhe kreativiteti në fund fare, përpos të tjerave, lidhjeve me interesat që gjithmonë e më tepër forcohen…

Ilir Meta – Ju lutem, konsumimi është një problem kur ezaurohen mundësitë  e dikujt për të dhënë më shumë. Në rastin konkret kemi të bëjmë me një eksperiencë të konsoliduar, e cila do të rezultojë mjaft e suksesshme për të menaxhuar këtë bashki të re.

Eni Vasili – Zgjedhjet e fundit në vend ishin ato të pjesshme për bashkinë e Korçës. Nëse ju kujtohet, u evidentua në atë kohë fenomeni i blerjes së votës me 2 mijë lekë. Opozita e ka kthyer në një kauzë. Zoti Meta, mendoni se mund të kemi elemente të tilla ende në zgjedhjet tona, apo e  kemi mbyllur këtë çështje të blerjes  së votës qoftë me para apo qoftë me thesin e miellit?

Ilir Meta– Ajo që unë mund t’ju them është se duhet të veprohet me forcën më të madhe të ligjit. Në çdo rast të tillë. Ne i kemi paralajmëruar të gjithë kandidatët, të cilët duhet të jenë jo vetëm mjaft korrektë në raport me votuesit, por njëkohësisht duhet të jenë edhe mjaft të kujdesshëm nga çdo përpjekje për inskenim për të dëmtuar imazhin e zgjedhjeve.

Eni Vasili – Zoti Meta, në fakt kryetarja e KQZ-së, siç e  thashë dhe në fillim të emisionit, ka bërë një thirrje drejtuar partive për të ndalur një fushatë elektorale  të filluar tashmë, pasi sipas ligjit ajo  fillon në datën 22. Ju keni një koment? Jeni dakord me këtë gjë?

Ilir Meta –  Më duhet të flas me juristët, sepse ka interpretime të ndryshme, për kohën zyrtare të fushatës, e cila lidhet me datën 22 maj, mund të them se në atë kohë… kemi interpretime të ndryshme. Derisa  janë regjistruar kandidatët, nuk mund të themi se ata do të rrinë në shtëpi tani dhe nuk   do të dalin nga shtëpia sepse po shkelin ligjin. Do të shkojnë të takohen e kështu me radhë, se po të ishte ndryshe, në Amerikë kandidatët nuk do të dilnin dy vjet para në zgjedhjet presidenciale, në zgjedhjet brenda partisë.

Eni Vasili– Kjo gjë varet nga ligji.

Ilir Meta– Patjetër. Në rastin konkret ka rëndësi vlerësimi juridik i asaj që  thotë dhe kupton ligji. Ne do ta respektojmë me rigorozitetin maksimal.

Eni Vasili –Apo do ta ndryshoni? Ju votat i keni?

Ilir Meta –Ta diskutojmë një herë me Doktorin. Nëse ka konsensus, pse jo?

Eni Vasili– Zoti Meta, dakord. Kjo ishte pyetja e fundit për sa u  përket zgjedhjeve. Do të doja shumë të vazhdoja më pas më dekriminalizimin, qeverisjen, parlamentin, me eksodin.

Kthehemi menjëherë në pjesën e dytë pas një hapësire publicitare. 

Rikthehemi në Studion e Hapur.

Jemi live me kryetarin e LSI-së dhe kryetarin e parlamentit, zotin Ilir Meta.

Jemi në pjesën e dytë, dhe në fakt folëm deri tani për zgjedhjet lokale, zoti Meta! Do të doja të kalonim në çështje të tjera shumë të rëndësishme, por që gjithmonë kanë në një farë mënyre lidhje me zgjedhjet dhe parlamentin. Ka një shqetësim edhe të partnerëve ndërkombëtarë për kandidatët me të shkuar kriminale. Kemi të bëjmë  me një paradoks që nga njëra anë qeverisja shfaq vullnet për dekriminalizimin dhe nga ana tjetër kemi një dëshmi të fundit nëse mund ta themi, me disa personazhe të akuzuar edhe nga ndërkombëtarët për të  kaluar kriminale?

Ilir Meta –E kaluara kriminale është me fakte dhe nuk është me fjalë. Për fat të keq, duket që Partia Demokratike nuk ka vullnetin për të bërë gjëra serioze në këtë drejtim. Pati një iniciativë përpara seancës së fundit. Një  iniciativë, të cilës grupi parlamentar i maxhorancës iu përgjigj me vullnet  pozitiv, pavarësisht se nga ana procedurale kishte mjaft probleme apo qoftë  edhe nga ana e interpretimit të Kushtetutës mund të krijoheshin disa përkufizime jo kushtetuese, por u tregua vullnet politik  meqenëse jemi në prag të zgjedhjeve, në prag të afatit të fundit të regjistrimit të kandidatëve: të vendosim disa kritere të forta dhe të qarta  ligjore. Kjo gjë nuk u  pranua nga Grupi Parlamentar i Partisë Demokratike dhe nuk u finalizua.

Eni Vasili – A mund të themi që kemi sidoqoftë një listë kandidatësh të cunguar, për sa kohë nuk kemi ende një paketë ligjore që na e garanton këtë? Kisha këtu një javë më parë zotin Dule, i cili tha: “Dëshmitë e penalitetit janë  e vetmja dëshmi ligjore që unë kam dhe nuk di më tej”. Duke mos krijuar këtë paketën ligjore. A kemi një listë të rrezikuar nga kriminalizimi?

Ilir Meta –Siç e kuptojmë ne kriminalizimin, por në dijeninë time  deputetët, kandidatët e regjistruar deri tani në përgjithësi nga forcat kryesore nuk kemi asnjë, i cili të jetë dënuar me një vendim gjykate të formës së prerë.

Eni Vasili – PD-ja zgjedh një listë, PS-ja zgjedh një listë të vetën, ku të  dyja palët akuzojnë njëra-tjetrën. A po bëhet politikë me këtë apo ka realisht probleme me këtë çështje, zoti Meta?

Ilir Meta – Unë besoj se ne kishim një mundësi të artë me konsensus të  miratonim disa kritere të qarta për kandidatët e 21 qershorit.

Partia Demokratike insistonte në një variant të saj, i cili ishte deri diku hartim. Maxhoranca ra dakord që të gjitha veprat, të cilat duhet të ishin të sanksionuara qartë, pra për të cilat kandidatët mund të ishin dënuar dhe të mos kishin të drejtë që të  kandidonin, u  kthye në një kapriço të opozitës, e cila nuk u finalizua.

Eni Vasili – Ju vetë i keni verifikuar CV-të e kandidatëve?

Ilir Meta – Do t’ua lëmë qytetarëve që të japin vlerësimin e tyre.

Eni Vasili – Qytetarët si do ta dinë se si e ka të shkuarën një kandidat apo një tjetër?

Ilir Meta – Se mos e ka ndaluar njeri PD-në të thotë një të vërtetë apo edhe të shpifi për dikë. Në fund fare qytetarët e njohin mirë cilindo në bashkinë ku janë dhe e dinë  shumë mirë që nëse ka nga ata të propozuar nga njëra apo nga tjetra palë, kanë apo nuk kanë një të kaluar kriminale apo lidhje kriminale.

Eni Vasili –  Kemi opozitën, e cila duhet të bëjë edhe në këtë rast denoncuesin e të gjithë listës së kandidatëve tuaj, por nga ana tjetër…

Ilir Meta– Ta bëjë opozita apo ta bëjë maxhoranca, derisa nuk patën vullnetin për ta arritur me konsensus miratimin disa kritereve ligjore..

Eni Vasili –  Mund të thuhet se dështuat në këtë gjë, zoti Meta, se ka qenë një impenjim i marrë në Bruksel?

Ilir Meta –  Nuk ka qenë një impenjim i marrë në Bruksel. Ky ka qenë një impenjim i marrë këtu dhe ka qenë tërësisht në vullnetin më të mirë për të bërë gjera  sa më serioze dhe sa më ligjore, meqenëse kjo gjë shikohet politikisht dhe shikohet thjesht me idenë për të dëmtuar dikë dhe të  përjashtohet dikush tjetër për arsye sepse është i opozitës dhe po themi se njerëzit e kuptojnë më mirë se kushdo tjetër.

Eni Vasili – Ju keni verifikuar secilin prej kandidatëve tuaj. Si ka  mundësi që nuk pati asnjë ndryshim të listës edhe pse ambasadori amerikan ngriti këtë shqetësim, publikoi disa emra sipas tij?

Ilir Meta– Unë nuk e di ketë çështje. Në fund e gjykoj nga ato që thotë shtypi, por unë jam i  bindur që për të gjithë emrat që ne kemi propozuar është kërkuar garanci dhe janë bërë verifikime për aq sa kemi pasur mundësi. Ata janë figura të pastra dhe dinjitoze.

Eni Vasili– A është dekriminalizimi një proces i dështuar apo kemi mundësi për një produkt nga komisioni?

Ilir Meta–  Pa dyshim që kemi një mundësi dhe të ardhmen e kemi përpara, por duhet seriozitet dhe nuk duhet  politizuar që kur dënohet dikush, që është kandidati im, nga gjykata, themi që ky ishte një proces politik, i montuar nga Edi Rama e ku di unë Rama-Meta, për një gjë tjetër pastaj themi të kundërtën. Kjo gjë nuk shkon, është një lojë midis dy standardeve, gjithkush  e kupton që është lojë.

Eni Vasili – A keni ndër mend që në fund fare ta ndërmerrni vetë ju si nismë dhe të krijoni një paketë ligjore lidhur me këtë çështje, apo gjithçka  pritet nga ky komision?

Ilir Meta– Qëllimi është për të bërë gjithçka me konsensus pastaj në fund fare do ta gjykojmë.

Eni Vasili-Partia Demokratike dhe Partia Socialiste kanë depozituar disa  ndryshime në Kodin Zgjedhor për këtë proces. Çfarë  po ndodh me këto? Ju në fund do t’i pranoni, apo jo?

Ilir Meta– Në kohën e duhur do të jepet edhe gjykimi i duhur, por unë jam i bindur se gjithçka, që është në respekt të Kushtetutës, e ndihmon këtë proces, pra nuk do  të ishte proces dekriminalizimi, se kjo mendoj se është një fjalë mjaft e tepërt, por e garantimit të një standardi të lartë të figurës publike, të zyrtarëve të zgjedhur. Padyshim gjithçka tjetër duhet mirëpritur dhe duhet mbështetur.

Eni Vasili –  Zoti Meta, a mendoni se ka krijuar një kosto për LSI-në ndikimi juaj në atë që u quajt “skenari i vrasjes” së dy deputetëve?

Ilir Meta– Nuk ka asnjë  implikim nga ana ime, ka qenë një lojë e të tjerëve për të më implikuar mua. Cila është kostoja, do ta tregojë 21 qershori. Qytetarët shqiptarë janë mësuar me sulme të tilla ndaj Ilir Metës në prag të zgjedhjeve, dhe këto bëhen për shkak se unë përfaqësoj, një forcë gjithmonë në rritje.

Eni Vasili– Çfarë mendoni për këtë histori? Çfarë ju ka lënë? Cili ka qenë momenti më i vështirë?

Ilir Meta– S’kam kohë fare të mendoj për të dhe s’kam pasur asnjë moment të vështirë në këtë histori, absolutisht.

Eni Vasili– Doni të thoni se e keni harruar? Është e tejkaluar për ju, tashmë? Është e mbyllur?

Ilir Meta–  Nuk ka ekzistuar asnjëherë si histori për mua. Më vjen keq për ata që janë përfshirë në këtë histori me idenë se do të përmbysin raportet politike në Shqipëri, duke u bazuar në skenarë kaq të neveritshëm.

Eni Vasili– Qëndrojmë të flasim për qeverinë. Qeveria ka nisur një operacion tjetër kombëtar, zoti Meta. Në fakt, në një sektor me një impakt të drejtpërdrejt në ekonominë e vendit, edhe në ekonominë personale të njerëzve, që ka të bëjë pikërisht me naftën. Pse pikërisht tani, pas gati dy vjet qeverisjeje? Është një çështje taktike kjo, apo thjesht tani u poqën kushtet? Çfarë ndodhi? Pse tani? Pse në këtë moment? Pse para zgjedhjeve?

Ilir Meta– Tani, qeveria ka tetëmbëdhjetë muaj që ndërmerr reforma të njëpasnjëshme, dhe në të njëjtin moment është e vështirë të ketë njësoj të rëndësishme gjashtë, shtatë apo tetë prioritete. Mendoj se është momenti i duhur për të stabilizuar tregun e karburanteve në të gjitha drejtimet, që nga standardi që garantohet për konsumatorin, standard i cili ka qenë mjaft i cenuar, e deri tek formalizimi i këtij sektori, që është shumë i rëndësishëm për të rritur të ardhurat e për të goditur korrupsionin në këtë sektor.

Eni Vasili– Zoti Meta, shteti i ka të gjithë instrumentet ligjore dhe strukturat për të ndaluar vjedhjen, grabitjen, abuzimin. Pse është e nevojshme që kjo të bëhet me operacion? Cila është nevoja e një operacioni të tillë? Pse nuk bëhet kjo çdo ditë? Sepse, në fund fare, strukturat këtë detyrë kanë.

Ilir Meta– Po, patjetër që kjo do të bëhet çdo ditë, derisa situata të vihet në kontroll dhe të standardizohet ky lloj shërbimi.

Eni Vasili– Pra, dy vjet jashtë kontrollit, i gjithë sektori, dy vjet jashtë kontrollit të energjisë?

Ilir Meta– Mund të themi se ka pasur më shumë. Energjia kishte shumë e shumë vite që ishte jashtë kontrollit, por një ditë duhej të vihej nën kontroll, përndryshe përfundojmë si rasti i Greqisë. Këtë nuk e dëshiron asnjë qytetar shqiptar.

Eni Vasili– Jo, sigurisht, por në këtë dy vjet çfarë është bërë me këtë sektor, dhe çfarë janë këto operacione? Do të kemi të tjera të tilla? Kemi sektorë që, deri në këto momente, janë jofunksionalë?

Ilir Meta– Unë mendoj se do të ketë vazhdimisht reforma, derisa kërkojmë standardet evropiane. Ato i kemi edhe tek tregu i karburantit, sepse nuk mundet të pranojmë më që, për shkak të mungesës së cilësisë, të dëmtohen makinat e qytetarëve shqiptarë –  ky është një problem serioz, përveç gjithë çështjeve të tjera –  apo të lejojmë që të devijojnë fonde të konsiderueshme, për shkak të korrupsionit që mund të ndodhë në këtë sektor.

E njëjta gjë edhe në fushën e energjisë elektrike. Nuk mund të pranojmë që ky sistem të shkojë drejt kolapsit – ose më saktë ishte në kolaps të plotë – po përkundrazi duhet të ringrihet e të stabilizohet, në mënyrë që garantojmë jo vetëm një shërbim më të mirë për qytetarët, por përmes këtyre reformave do të garantojmë edhe një shërbim me një kosto shumë më të përballueshme për qytetarët në të ardhmen.

Eni Vasili– Toleranca do të jetë zero, thotë Kryeministri. Do të presim të kemi arrestime apo burgosje të abuzuesve, ndërkohë që kemi edhe një ngjarje, nga e cila nuk kemi një përgjegjës konkret – të paktën publikisht nuk e kemi – siç ishte ngjarja e Marinzës?

Ilir Meta– Prokuroria po heton. Shpresojmë që të merren masa ndëshkimore ndaj autorëve të Marinzës.

Eni Vasili– “Toleranca do të jetë zero” çdo të thotë? Për sektorin e naftës, ka deklaruar Kryeministri.

Ilir Meta– Do të zbatohet ligji. Ata të cilët deri tani kanë shkelur ligjin, e që mund ta shkelin, do të ndëshkohen.

Eni Vasili– Zoti Meta, shtatë muaj më parë, në këtë studio, e cilësuat punën e qeverisë në këtë mënyrë, po jua citoj, e krahasuat atë me një bujk që mbjell arën, e që produktin e merr disa muaj më vonë. A keni filluar ta merrni produktin e arës, apo jemi akoma në kohën e mbjelljes?

Ilir Meta– Kaluat tek ara; po vazhdoj tek ara, realisht. Para disa muajve, ndoshta, isha në Grabian të Lushnjës, për të inauguruar fillimin e një investimi të rëndësishëm për serrat e luleshtrydheve. Pata kënaqësinë të isha përsëri para pak ditësh, për të inauguruar përfundimin e fazës së parë eksperimentale, me pesë ose shtatë hektarë, ku i gjithë prodhimi doli mjaft i suksesshëm, dhe i gjithi ishte i garantuar për eksport. Por nuk është kjo ajo që dua të theksoj. Ajo që dua të theksoj është se në një kohë të shkurtër, pesëdhjetë veta nga zona, nga komuniteti, hynë në punë. Pas një viti do të hyjnë dyqind, ndërsa për dy-tre vjet pritet që dy mijë veta në këtë zonë të jenë të punësuar në këtë drejtim, që është një drejtim i ri, dhe ku Shqipëria mund të jetë mjaft konkurruese në tregun ndërkombëtar.

Pra, po mbolle sot, do të korrësh nesër. Kjo është e padiskutueshme.

Eni Vasili– Pra, jeni duke korrur.

Ilir Meta–  Unë besoj shumë te projekte të tilla. Nuk besoj shumë te projektet që: do të vijë një investitor e do të investojë një miliard euro a pesë miliardë euro këtu. Po dëgjova shifra të tilla, nuk jam më i interesuar për të vazhduar bisedën, por unë besoj shumë në projekte të tilla realiste, konkrete, që bazohen te resurset tona, të cilat fusin pesë veta në punë, të cilat fusin pesëdhjetë, dyqind e kështu me radhë. Kështu do të rritet ekonomia jonë, kështu do të punësohen edhe njerëzit tanë.

Eni Vasili– E di që nuk do t’ju pëlqejë sërish, të citoj një deputet të Kuvendit të Shqipërisë apo një ish-koleg si zoti Blushi…

Ilir Meta –Nuk kam asnjë shqetësim unë. Po, patjetër. Citojeni.

Eni Vasili– Por çështja nuk është Blushi, çështja është çfarë thotë Blushi, dhe a janë të vërteta ato që thotë, që po qeveriset shumë keq, që papunësia është rritur, borxhi është rritur, mungojnë investimet publike, çmimi i energjisë nuk u ul, shëndetësia nuk u bë fala, e kështu me radhë. A nuk janë të vërteta këto?

Ilir Meta– Unë i dhashë një përgjigje për rastin e Kukësit, zotit Blushi. Ia dhashë me shumë bindje. Kështu që, jo çdo gjë që thotë zoti Blushi është e saktë, sipas mendimit tim, por edhe jo çdo shqetësim që ngre zoti Blushi duhet nënvleftësuar.

Eni Vasili– A kanë rilindur qytetet tona? A ka rilindur Shqipëria? A jemi në rilindje?

            Ilir Meta – Rilindje, kjo varet sesi e koncepton secili prej nesh Rilindjen, por që Shqipëria është në rrugën e duhur, në drejtimin e duhur kjo është e padiskutueshme. Shqipëria ishte në prag të kolapsit, nuk kishte paga për të paguar administratën, kur kjo qeveri erdhi në pushtet, sepse të gjithë e dimë si u zbraz arka e shtetit, largqoftë të ndodhte një tragjedi qeveria nuk kishte asnjë lek rezervë për të përballuar një situatë të tillë, dhe arriti në një kohë të shkurtër të normalizoheshin financat publike dhe vendi është drejt një ngritje të pakthyeshme, pra është në rrugën dhe në drejtimin e duhur. Tani sfida ka të bëjë me ritmin dhe me shpejtësinë e ringritjes së ekonomisë sonë. Këtu ka mjaft çështje për të diskutuar, ka mjaft prioritete ku duhet të përqendrohemi më shumë, në mënyrë që rezultatet të jenë sa më të shpejta dhe sa më të prekshme.

            Eni Vasili – Një nga aleatët tuaj, Vangjel Dule, por edhe një nga njohësit e politikës, një njeri që tashmë është në politikë prej shumë vitesh ndan një mendim. Ai thotë që qeveria aktualisht ka ministra amatorë. Ju e ndani të njëjtin mendim me të?

            Ilir Meta – Duhet të sqarojmë edhe këtu vërtet sesi e kuptojnë fjalën amator, në rast se ka kuptimin  e pasionit, pa dyshim që janë pasionantë, sepse shumë prej tyre janë edhe të rinj, por nuk do ta quaja amatorizëm këtë gjë. Megjithatë, absolutisht që çdo mendim është i drejtpërdrejtë. Nuk jemi këtu për të komentuar mendimet e deputetëve, deputetët kanë të drejtën e tyre të shprehin mendimin.

            Eni Vasili – Cili është mendimi juaj për ministrat e qeverisë Rama?

            Ilir Meta – Mendimi im nuk ka të bëjë me ministra të caktuar e kështu me radhë, sepse nuk kam unë të drejtë të gjykoj ministrat…

            Eni Vasili – A ka ardhur koha, për shembull, për një rifreskim të qeverisë pas dy vjet qeverisjeje?

            Ilir Meta – Më fal, ministrat i gjykon Kryeministri, ne gjykojmë qeverinë. Absolutisht, qeveria po punon me angazhim, me përkushtim, nuk ka qeveri perfekte jo në Shqipëri, por as në vendet më të zhvilluara dhe më të stabilizuara. Ajo ndeshet vazhdimisht me realitetin, ndeshet me vetveten dhe përmirësohet vazhdimisht.

            Eni Vasili – A duhet të ketë ndryshime….

            Ilir Meta – Kur flasim për mendime apo kritika nga deputetë të maxhorancës, absolutisht mendoj që ato gjithmonë duhet të kenë sensin e përmirësimit të qeverisjes jo të denigrimit të qeverisjes. Kjo gjë kuptohet kur e bën opozita, e cila gjithmonë synon të dëmtojë reputacionin qeverisës, por një deputet i maxhorancës, përfshi edhe kolegun tim të dashur Dule, duhet të ketë sensin e përmirësimit të qeverisjes.

            Eni Vasili – Dakord. Ju keni qenë edhe vetë një zë ndryshe,  kështu që nuk besoj se frymën kritike ndonjëherë mund ta…

            Ilir Meta – Të jeni të sigurt se unë…

            Eni Vasili – Brenda partisë suaj ju keni qenë  një fraksion, keni qenë një…

            Ilir Meta – Patjetër, unë nuk është se mendoj se çdo gjë po ecën perfekt, por kam mundësinë për të shprehur mendimet e mia si një përfaqësues i maxhorancës dhe këtë mundësi besoj se e kanë të gjithë të tjerët.

Eni Vasili –A do të ketë ndryshime në kabinetin qeveritar pas zgjedhjeve? A duhet të ketë rifreskim? Do të jeni i pranishëm aty me ministrat tuaj?

Ilir Meta – Për mua, më e rëndësishme është të ketë një ritëm edhe më të shpejtë të ballafaqimit me disa nga autoritetet më të rëndësishme, ndërsa për sa u takon emrave të ministrave, kjo nuk është shumë e rëndësishme as për mua, as për shqiptarët.

Zgjedhje më të shpejta, zgjedhje më të mira, shërbim më të mirë, më shumë punësim. Kjo është ajo që kërkojnë të gjithë.

Eni Vasili –Si aleati kryesor në qeverisje, në cilët sektor nuk ka funksionuar mirë? Cili është sektori më problematik deri tani? Ku duhet ndërhyrë më shpejt?

Ilir Meta –Këtu nuk mund të ndahen sektorët me thikë, sepse kemi të bëjmë me qeverisjen në përgjithësi. Unë mendoj që qeveria po ecën në rrugën e duhur.

Eni Vasili –Dakord.

Kalojmë në hapësirën e fundit publicitare. Rikthehemi për minutat e fundit. Do të flasim shumë shkurt për një temë të rëndësishme dhe sensitive për shqiptarët, për eksodin.

Do të doja të ndalesha në një çështje shumë të ndjeshme për gjithë shqiptarët: çfarë po ndodh me ne? Kanë ikur 6000 vetë nga Shqipëria vetëm në tremujorin e parë të vitit.

            Ilir Meta – Unë besoj se kemi të bëjmë me një fenomen shqetësues. Padyshim që është një fenomen i nxitur nga grupime kriminale. Kanë shfrytëzuar edhe situatën sociale e ekonomike të mjaft qytetarëve, të cilët kanë rënë viktimë e mashtrimeve për një jetë më të mirë në Gjermani apo ndonjë vend tjetër të zhvilluar të BE-së. Për fat të mirë, pas reagimeve publike nga ana e autoriteteve tona dhe nga ana e autoriteteve gjermane, që ndërprenë çdo lloj iluzioni se mund të përfitohej qëndrimi në Gjermani përmes këtyre ikjeve, besoj se ky fenomen është duke u stabilizuar.

            Eni Vasili – Në fakt, pala gjermane ka thënë se do të kthehen 99% e shqiptarëve. Njerëzit kanë ngelur me një iluzion shumë të madh për atë 1%. Pse ka një hezitim kaq të madh nga ana e koalicionit dhe e qeverisjes për t’u thënë shqiptarëve që të mos ikin? Për të mos mbetur te një retorikë e përsëritur që janë pre e mashtrimit apo skemë e një grupi kriminal etj.

            Ilir Meta – Është e vërtetë kjo gjë.

            Eni Vasili – Deri tani nuk ka pasur asnjë deklaratë për t’u thënë shqiptarëve që të mos ikin, që të mos e lënë Shqipërinë, që të mos e lënë “Rilindjen”…

            Ilir Meta – Më fal! Që të mos e lënë “Rilindjen”, mund ta thoni ju, ne nuk mund ta themi këtë.

            Eni Vasili – Ju premtoni një rilindje, një ripërtëritje, apo jo?

            Ilir Meta – Thashë që të flasim seriozisht. Seriozisht do të thotë që mesazhi është bërë shumë i qartë. Sikurse mund të them edhe tjetrën që, nëse Gjermania thotë se i mirëpret qytetarët shqiptarë në vende komode pune, ata do të preferonin të iknin në Gjermani. Para disa javësh, isha në Kalabri, duke vizituar disa komuna arbëreshe, dhe pashë se këtë fenomen e përjetonte edhe Kalabria. Nuk është fenomen thjesht shqiptar. Është situatë e vështirë për Shqipërinë, sepse e kemi filluar me një bazë mjaft skandaloze ekonomike dhe sociale, por është situatë mjaft e rëndë edhe për Greqinë, që dikur ishte një frymëzim për jetë më të mirë për shqiptarët…

            Eni Vasili –  Atje ka krizë. Ne nuk po themi se të ne ka krizë, se jemi në prag të falimentit, do të shesim ishullin…

            Ilir Meta – Më fal! Është një situatë e vështirë në përgjithësi në Europë. Natyrisht, edhe në Shqipëri nuk është një situatë e lehtë. Ikja nuk është zgjidhje. Përkundrazi, ajo është një përkeqësim i situatës ekonomiko-sociale e atyre që ikin, sepse ata shesin diçka këtu, paguajnë këto rrjete kriminale, të cilat përfitojnë, dhe më pas, përsëri do të kthehen, por do të kthehen më të varfër sesa ikën. Jam totalisht dakord me ju, që duhen mesazhe më të forta nga ana e qeverisë, nga ana e opozitës, sepse edhe përpjekja për të nxirë çdo gjë, pa dyshim nuk i ndihmon këto njerëz të kenë më shumë shpresë në vendin e tyre, nuk i ndihmon as një klime më të mirë për zhvillimin e biznesit.  Po edhe vetë debati politik që ne bëjmë, lë shumë pak mundësi dhe kohë që ky debat të përqendrohet se si të hapen vende të reja në Kukës. A mund të thuhet, meqenëse Kukësi ishte një nga qytetet që u prek më shumë, ashtu si para pak kohësh u prek Vlora, se këto grupe e kryen funksionin edhe në Vlorë,  por atje shkoi ambasadori gjerman  bashkë me ministrin e Brendshëm, bënë një apel dhe u frenua ky largim nga Vlora.

Po për Kukësin për 8 vjet, a u hap ndonjë vend i ri pune? Nuk u hap. Kjo nuk do të thotë që të mos vazhdojmë  e të  hapim vende pune atje. Tani duhet vrarë mendja dhe duhet të debatojmë e të bashkëpunojmë edhe me zoti Noka që është deputet i Kukësit, edhe me të gjithë deputetët e tjerë, me të gjithë drejtuesit vendorë, që të shikojmë mundësinë që, bazuar në resurset e Kukësit, si do  të hapim vende të reja pune që njerëzit të vazhdojnë e të punojnë në Kukës, të punojnë në Tropojë, në Shqipëri.

 Eni Vasili– Zoti Meta, po u referohem deklaratave dhe qëndrimeve politike apo zërit të njerëzve, në kronikat e medies, shkrimeve në gazeta apo dëshmive të të ikurve dhe të të rikthyerve ku flitet për një mungesë shprese nga ana e njerëzve se në këtë vend do të bëhet më mirë, se varfëria do të ndreqet, se papunësia do të bjerë, se do të ketë mundësi që të jetojnë në këtë vend, a mendoni ju që kjo frymë pesimizmi është ndikuar edhe nga masat shtrënguese që ka marrë qeveria  gjatë këtyre dy viteve sidomos, për shembull, operacioni  ndaj energjisë?

Ilir Meta– Operacioni ndaj energjisë, të jeni të sigurt që në përgjithësi gëzon një mbështetje të gjerë, pavarësisht se janë prekur interesat e mjaft qytetarëve,  të cilët nuk e paguanin energjinë elektrike dhe mendonin se në këtë mënyrë përfitonin diçka të cilën e humbnin në shumë drejtime të tjera.

Ndaj unë jam i bindur që është shumë e rëndësishme të vijojmë për të mbyllur njëherë e përgjithmonë këtë plagë të madhe: problemin e energjisë elektrike në vend. Në këtë mënyrë do të kemi mundësi që të arrijmë, duke mbyllur edhe shumë plagë të tjera, si energjia, që të gjitha këto resurse që do të përfitojnë, që deri tani i  kemi shpërdoruar, t’i investojmë në shumë drejtime të tjera ku qytetarët tanë do të kenë një përfitim të shumëfishtë.

Eni Vasili– Dakord, po prishja e ndërtimeve me leje, pa leje, çështja e energjisë, disa operacione dhe masa…

Ilir Meta  –  Ndërtimet me leje nuk janë prishur, ndërkohë që legalizimet janë bërë.

Eni Vasili– Ka pasur dhe ka akuza nga opozita edhe për prishjen e ndërtimeve me leje apo mosprishje të disa ndërtimeve, pra prishje selektive?

            Ilir Meta – Opozita, aq më tepër opozita aktuale, është e prirur të akuzojë aq shumë sa edhe kur thotë ndonjë të vërtetë të gjithë e marrin me rezerva, për fat të keq, sepse besueshmëria e saj duhet të ishte shumë e lartë. Opozita i ka vënë qëllim vetes thjesht vetëm të nxijë dhe të mos japë asnjë alternative.

            Eni Vasili – Deri tani nuk ka pasur një përgjigje, për shembull, nga ana e Kryeministrit apo maxhorancës për një mosprishje selektive, le ta quajmë kështu, në zonën e Jugut, që është diçka që lidhet me një deputet të Jugut.

            Ilir Meta – Unë besoj se këto mesazhe janë dhënë në mënyrën më të qartë. Opozita nëse ka ndonjë fakt konkret, le ta dërgojë në prokurori.

             Eni Vasili – Zoti Meta, megjithatë i rikthehem pyetjes, pasi është edhe e fundit, si do t’u rikthehet shpresa atyre njerëzve, të cilët gjithë largohen sot për një jetë më të mirë, pasi nuk e gjejnë shpresën te “Rilindja”? Kur them “Rilindja jo vetëm nga pikëpamja politike, por, në fakt, koalicioni juaj dhe qeverisja e premtuan diçka të tillë për të gjithë shqiptarët.

            Ilir Meta – Besoj se konceptimi juaj është mjaft relativ. Natyrisht që ka njerëz, të cilët kërkojnë një zgjidhje sa më të shpejtë dhe sa më të mirë, e  mirëkuptojmë këtë gjë. Detyra jonë është të krijojmë shumë më tepër mundësi se sa deri tani dhe jam i bindur që do ta bëjmë këtë gjë. Edhe zgjedhjet e 21 qershorit do të ndihmojnë në këtë drejtim. Kjo nuk është një sfidë vetëm e maxhorancës, por mendoj se është edhe e opozitës. Dakord që këta qytetarë nuk kanë shpresë te qeveria, te maxhoranca, po si shpjegohet që kanë shpresë as tek opozita? Pra, edhe në raport me shpresën, përgjegjësia mendoj se është e përbashkët. 

            Eni Vasili – Dakord.

            I njëjti deputet, zoti Blushi, në një deklaratë tjetër thoshte: “Po të ishte për qytetarët, do t’i hidhnin të gjithë politikanë në det”. Unë personalisht nuk jam shumë dakord, nuk e  di çfarë mendimi keni ju.

            Ilir Meta – Unë e thashë edhe një herë, jo çdo gjë që zoti Blushi thotë është e saktë dhe jo çdo gjë që zoti Blushi thotë është apriori e pavlefshme.

            Eni Vasili – Zoti Meta, sa bashki do të fitojë LSI-ja, nga 15 ku ka kandiduar?

            Ilir Meta – Aleanca për Shqipërinë Europiane synon të fitojë në 61 bashkitë që ka Shqipëria, por, natyrisht, që kjo gjë nuk besoj se është shumë e mundur dhe nuk mendoj se kjo është më e rëndësishme se sa do të fitojmë. E rëndësishme është që qytetarët të marrin pjesë në këto zgjedhje dhe të votojnë për kandidatët më të mirë, për projektet më të mira dhe të votojnë për të zgjidhur problemet e tyre, të mos votojnë që bashkitë të përdoren politikisht për të luftuar me qeverinë.

Unë e kam thënë, kandidatët e opozitës kanë të drejtën e tyre patjetër, të kërkojnë drejtimin e bashkive, por duhet të kërkojnë drejtimin e bashkive për të zgjidhur problemet e komunitetit të bashkisë, jo për t’i kthyer ato në instrumente të luftës politike të opozitës me qeverinë. Opozita ka parlamentin, në parlament hapësirat i ka të pasura dhe i ka pa fund. Asnjë opozitë në Shqipëri nuk ka pasur këto hapësira dhe këto mundësi për të bërë luftën politike në parlament dhe do të vazhdojë ta bëjë aty.

Eni Vasili –Ndiheni mirë në parlament?

Ilir Meta –Me gjithë ato fjalë që thatë ju për parlamentin, për dekriminalizimin, nuk ndihem edhe aq mirë, por është detyra jonë që të punojmë për t’u ndjerë më mirë në parlament të gjithë së bashku.

Eni Vasili –Nuk i kemi shpikur ne, zoti Meta. Nuk besoj se jeni dakord me Kryeministrin, që të gjitha fajet në këtë vend i ka media.

Ilir Meta –Nuk e kam dëgjuar këtë gjë dhe nuk keni pse të ndiheni të akuzuar për këtë gjë, në rast se jeni të bindur që vërtet jeni objektiv dhe profesional.

Eni Vasili –Unë personalisht po, por pastaj, çdo njeri e bën gjyqin me vetveten, dhe ka një gjyq akoma më të rëndësishëm, që është gjyqi i publikut. Në fund fare, ne nuk jemi politikanë, por në një farë mënyre votohemi.

Ilir Meta –Edhe për politikanët është e njëjta gjë.

Eni Vasili –Votohemi çdo natë nga një mjet, nga telekomanda dhe pas çdo dite transmetimi, ne jemi, në fund fare, produkte të sondazheve tona, njësoj si ju.

Zoti Meta, unë ju falënderoj shumë që ishit sonte me mua në studio!

Ilir Meta –Ishte kënaqësia ime.

Eni Vasili –Ju uroj suksese në këtë fushatë elektorale!

Ilir Meta –Faleminderit!

Eni Vasili –Ju riftoj sërish, kur fushata të ketë filluar ligjërisht, ju dhe kandidatët e LSI-së për të bërë këtu ballafaqimet ezonave të tyre për qytetet tona dhe bashkitë.

Ilir Meta –Faleminderit, juve dhe teleshikuesve që patën durimin të na dëgjonin!

Eni Vasili –Faleminderit, që ishit me mua!

Faleminderit, ju që na ndoqët!

Të nderuar teleshikues, takimi me Studion e Hapur është për të martën që vjen.

Natën e mirë!