Z.Ndoka, pak kohë më parë, PDK-ja doli me një deklaratë zyrtare ku siguruat se tre votat e demokristianëve, e juaja, z. Ndocaj dhe znj.Ferracaku ishte kundër reformës së drejtësisë në mënyrë të njëanshme. Ai i qëndroni këtij vendimi dhe a ka të drejtë Basha kur thotë se ka edhe votat e juaja për të mos e votuar këtë reformë? (Sa garantë dilni ju edhe për dy votat e tjera, ku së fundmi z.Ndocaj ka folur edhe për një parti të re)
Partia Demokristiane tashmë ka një qëndrim zyrtar për reformën në tërësi, inkurajojmë konsensusin pozitë-opozitë, si e vetmja garanci që të kemi një reformë të besueshme për palët, për opinionin në tërësi dhe institucionet. Qëndrimi ynë si demokristian është i unifikuar edhe për faktin, se jemi në një proçes të rëndësishëm të bashkimit demokristian, ku znj.Ferracaku ka një rol në këtë proces si përfaqësuese e Partisë Kristiandemokrate në Kuvend, ndërsa z.Ndocaj drejton grupin negociator për bashkimin demokristian në cilësinë e N/Kryetarit të PDK-së. Jemi në një linjë politike, të pa influencuar e diktuar, as nga PS-ja, as nga PD-ja.
A keni ndonjë koment për mesazhin e fundit drejtuar të rinjve nga Ambasadori amerikan Donald Lu ku krahas të tjerave, duke folur për rëndësinë e miratimit të reformës në drejtësi, ai u bën thirrje deputetëve që në mënyrë individuale të votojnë reformën…Nëse një thirrje do të ishte edhe për ju, Ju do ta merrnit në konsideratë dhe për cilat arsye?
E vlerësojmë rolin e ambasadorit Lu në këtë proçes, pavarësisht se nuk e kemi kuptuar tërësish në këtë proces! Reforma është atribut i klasës politike shqiptare, bashkëpunimi me institucionet ndërkombëtare është i rëndësishëm, por kur ato bëhen palë në proçes, apo me njërën palë, humbasin të drejtën e lidershipit apo udhërrëfyesit edhe për ne. Ambasadori Lu është përpjekur të ndjekë rrugën e shkurtër, që sipas gjasave po i del më e gjatë, sa e kishte menduar. Z.Lu po vazhdon tu bëjë thirrje deputetëve që të votojnë reformën, por kryetarët e këtyre partive që aludohen si të “korruptuar” janë një pengesë serioze. Investimi i SHBA-ve në thyerjen e vendimeve politike të grupeve dhe partive parlamentare, apo “rruga e shkurtër”, nuk do funksionojë! Ambasadori Lu duhej të investohej si diplomat, në inkurajimin e demokratizimit të partive politike, në mbështetjen e zërave ndryshe, në lëvizjet për reformim, tek alternativat e reja politike, tek shoqëria civile, investime në individë të veçantë me një suport të SHBA-ve. Ky do të jetë një investim afatgjatë dhe i dobishëm për proçesin, demokracinë, institucionet, pluralizmin dhe popullin shqiptar, kjo është rruga që duket e gjatë, por që është e duhura. Z.Lu ka vendosur të mbështesë një palë, që kryetarët e koalicionit qeverisës kanë akuzuar për ’vdekje’ njëri-tjetrin, me zë dhe figurë, dhe fjala vjen nuk e di se çfarë mendimi ka për Blushin dhe Hafizin, për Dulen, Dukën për Ndocajn, për Ferracakun e të tjerë faktorë në Kuvend? Z.Lu u bën thirrje deputetëve që të votojnë me vullnetin e tyre, të painfluencuar nga partitë e tyre, por do jenë vetëm deputetët e LSI-së që do të votojnë kundër partisë, por edhe kundër reformës, surpriza të tjera nuk besoj se do të ketë!
Ju keni qenë në koalicion zgjedhor me PS-në për zgjedhjet lokale. Si janë raportet aktuale të PDK-së me PS-në? Dhe a keni ju një qëndrim të qartë e paraprak se me cilën prej forcave kryesore në vend do të shkonit në zgjedhjet ardhshme parlamentare? (Pra, në ç’raport jeni me dy partitë e mëdha)
Ne kemi dy mandate radhazi që bashkëpunojmë me PS-në për zgjedhjet lokale, ku raportet tona kanë qënë normale dhe i konsiderojmë të pranueshme në raport të kontributit tonë. Është ende herët të flasim për zgjedhjet e ardhshme parlamentare, por dëshira jonë mbetet krijimi i polit të qëndrës në politikën shqiptare, si një domosdoshmëri për thyerjen e bipolarizimit të tejskajshëm dhe të rrezikshëm që është krijuar nga partitë e vjetra politike.
Pak ditë më parë ju mbështetët nismën e z.Blushi dhe znj. Hafizi ku përfshihet edhe zgjedhja e Presidentit nga populli. A qëndron diçka më shumë përtej kësaj nisme?
Së pari, jemi shumë të vendosur për zgjedhjen e një Presidenti nga populli, i kemi hequr qytetarëve përfaqësimin direkt me deputet, i larguam kryetarin e bashkisë, të paktën t’i kthejmë Presidentin popullit, Kushtetutës dhe institucioneve garancinë dhe pavarësinë e tyre. Unë personalisht i inkurajoj deputetët Blushi dhe Hafizi apo të tjerë në lëvizjet e tyre demokratizuese për partitë dhe për realitetin politik. Ata kanë vendosur, që të paguajnë një kosto në raport me kryetarin e tyre dhe militantët e partisë, duke tentuar lirinë e tyre, duke respektuar mendimin dhe veten e tyre! Të bësh karrierë duke bërë servilin para kryetarit është rruga më e shkurtër dhe më e sigurtë, të cilën kanë zgjedhur ta bëjnë shumica e deputetëve, ndërsa Blushi, Hafizi, Dulja, Shehi, Duka, Ndocaj apo edhe të tjerë kanë zgjedhur të sakrifikojnë e rrezikojnë karrierën e tyre në shkëmbim të lirisë. Unë i admiroj për kurajën e tyre politike dhe qytetare dhe ndjehem i rreshtuar përkrah tyre. Servilizmi, “bythëlëpirja”, pragmatizmi ekstrem janë njolla turpi që të shoqërojnë gjithë jetën, ndërsa aspirata për të qënë i lirë dhe i drejtpërdrejtë është një standard, që është i lumtur kushdo politikan që tenton ta prekë dhe ta kthejë në kauzë për veten dhe për të gjithë ato që i besojnë.