Platforma “Liria ka Emër” ka mobilizuar qytetarët për një protestë masive që do të mbahet të enjten, më 1 tetor, në sheshin “Skënderbeu” në Prishtinë, në shenjë kundërshtimi ndaj vendimit të Gjykatës Speciale për ish-krerët e UÇK-së. Protesta e cila nis në orën 16:00, do të zhvillohet nën moton “Jo në emrin tim”. Organizatorët u kanë bërë thirrje qytetarëve nga të gjitha trevat e Kosovës, si dhe shqiptarëve në diasporë, që t’i bashkohen tubimit.
Në një konferencë për media, përfaqësuesi i platformës, Ismail Tasholli, e cilësoi aktgjykimin ndaj Hashim Thaçit, Kadri Veselit, Rexhep Selimit dhe Jakup Krasniqit si të padrejtë dhe të papranueshëm. Sipas Tashollit, vendimi i shpallur më 16 shtator nuk mund të konsiderohet si vendim në emër të popullit të Kosovës. Ai theksoi gjithashtu se institucionet e Kosovës duhet të ndërmarrin hapa lidhur me projektligjin për plotësimin dhe ndryshimin e Ligjit për Dhomat e Specializuara.
“Qytetarët, me të drejtë, po kërkojnë nga Qeveria dhe Kuvendi që të procedojnë me ndryshimin e ligjit për Gjykatën Speciale”, deklaroi Tasholli, duke kërkuar që institucionet të përdorin mjetet juridike dhe institucionale në dispozicion për mbrojtjen e të drejtave të të dënuarve. Ai u bëri thirrje qytetarëve që më 1 tetor të dalin në shesh për të shprehur kundërshtimin e tyre ndaj vendimit.
Në anën tjetër, Arbnora Zogiani ftoi qytetarët që në protestë të marrin pjesë së bashku me familjarët, miqtë dhe kolegët. Ajo bëri të ditur se është organizuar transport nga qytete të ndryshme të Kosovës dhe se oraret dhe pikat e nisjes janë publikuar nga organizatorët. Zogiani veçoi edhe angazhimin e diasporës shqiptare, duke thënë se bashkatdhetarët në Evropë, Shtetet e Bashkuara dhe vende të tjera kanë organizuar protesta dhe tubime pas zhvillimeve në Hagë.