Bedri Hamza viziton familjet e Thaçit, Veselit dhe Krasniqit pas vendimit në Hagë

Kryetari i Partisë Demokratike të Kosovës, Bedri Hamza, ka vizituar familjet e Hashim Thaçit, Kadri Veselit dhe Jakup Krasniqit, pas aktgjykimit të Dhomave të Specializuara në Hagë.

Përmes një reagimi në rrjetet sociale, Hamza tha se gjatë takimeve u ka shprehur familjarëve mbështetjen e tij, duke theksuar se ata nuk janë dhe nuk do të jenë vetëm. Ai e përshkroi dhimbjen e familjeve si dhimbje të popullit të Kosovës dhe shprehu mbështetje për ish-drejtuesit e UÇK-së.

“Jemi krenarë për ta, për luftën tonë për liri dhe për gjithçka që ata përfaqësojnë në historinë dhe shtetin tonë”, shkroi Hamza, duke shtuar se do të vazhdojë angazhimin për drejtësi dhe liri.

Më 16 shtator 2026, Trupi Gjykues i Dhomave të Specializuara shpalli fajtorë Hashim Thaçin, Kadri Veselin, Rexhep Selimin dhe Jakup Krasniqin për krime lufte, përfshirë ndalimin e paligjshëm ose arbitrar, trajtimin mizor, torturën dhe vrasjen. Thaçi dhe Krasniqi u dënuan me nga 25 vite burgim, Veseli me 18 vite dhe Selimi me 13 vite.

Vendimi është i shkallës së parë të gjykimit dhe çështja vijon në kuadër të procedurave të parashikuara nga sistemi gjyqësor i Dhomave të Specializuara.