Demokracia në Veprim flet mbi parregullsitë e deritanishme në zgjedhje

Vështirësitë për të gjetur emrin në listën e votuesve, votimi me asistencë dhe fshirja e lehtë e ngjyrës materikuluese nga gishti janë disa nga parregullsitë që Demokracia në Veprim (DnV) ka hasur deri në mesditë të zgjedhjeve të sotme.

Megjithatë, sipas rrjetit të organizatave joqeveritare në Kosovë, këto parregullsi nuk e cenojnë integritetin e procesit zgjedhor në Kosovë.

Në një konferencë për media, Eugen Cakolli nga DnV tha se qytetarët në rreth 50 për qind të vendvotimeve në nivel vendi kanë pasur vështirësi për të gjetur emrin në listën e votuesve. Krahas kësaj, ai shtoi se deri tani ka qenë i shprehur edhe votimi me asistencë.
Po ashtu, Cakolli tha se problem tjetër që është evidentuar është edhe çështja e fshirjes së lehtë të ngjyrës materikuluese të votuesve. Sipas tij, kjo mund të ndikojë në votimin e dyfishtë dhe mund ta minojë besimin e publikut dhe integritetin zgjedhor.
KosovaPress