Kryeministri Albin Kurti, thotë se zgjedhjet e reja janë të panevojshme, teksa bëri thirrje që Kuvendi ta zgjedh presidentin. Kurti tha se qytetarët kanë përcaktuar përgjegjësinë e secilit subjekt në kuvend, ku askujt nuk i kanë dhënë përgjegjësi absolute, e rrjedhimisht, sipas tij, secili subjekt ka përgjegjësi sipas peshës së votës së qytetarëve.
“Sipas njoftimit të pardjeshëm të Gjykatës Kushtetuese, afati për zgjedhjen e presidentit është deri më 6 tetor. Nëse nuk do të arrijmë të zgjedhim president të ri, do të shkojmë sërish në zgjedhje, që do të jenë zgjedhjet e katërta brenda dy viteve. Zgjedhjet e reja janë të panevojshme. Ne tashmë kemi kryetar të Kuvendit dhe kemi qeveri të zgjedhur, dhe ky Kuvend mund t’i japë vendit president apo presidente. Duhet ta kuptojmë që në Kosovë nuk kemi zgjedhje presidenciale”, tha Kurti.
Ai u shpreh se zgjedhjet e reja do të jenë sërish për kuvend e për qeveri, dhe jo për president, gjë që sipas tij nuk duhet shkuar vazhdimisht në zgjedhje vetëm “për të konstatuar rezultate të njëjta”.
“Zgjedhjet e reja do të jenë sërish për Kuvend e për qeveri dhe jo për president, pasi zgjedhja e presidentit bëhet nga Kuvendi. Pse të shkojmë sërish në zgjedhje për të konstituuar sërish Kuvendin, i cili nuk arrin të zgjedhë president? Nuk duhet të shkojmë vazhdimisht në zgjedhje vetëm për të konstatuar rezultate të njëjta”, tha Kurti.
