Pas rreth dy orësh diskutime për zgjidhjen e ngërçit institucional, kryeministri në detyrë Albin Kurti dhe kreu i LDK-së, Lumir Abdixhiku, dhanë sinjale pozitive për mundësinë e arritjes së një marrëveshjeje për presidentin e ardhshëm. Pas takimit, Kurti e vlerësoi bisedën si serioze dhe shprehu optimizëm për një dakordim. Ai bëri të ditur se palët nuk kanë diskutuar ende për kandidatë konkretë, por për kriteret dhe profilin që duhet të ketë presidenti apo presidentja e ardhshme.
Sipas Kurtit, gjatë takimit u diskutuan vlerat, kontributi shoqëror dhe kombëtar që duhet të karakterizojnë figurën e presidentit, ndërsa theksoi se ekziston vullnet dhe mirëbesim për të arritur një marrëveshje. Në anën tjetër, Abdixhiku deklaroi se diskutimet do të vazhdojnë brenda strukturave të partive dhe se në takimin e ardhshëm pritet të shqyrtohen edhe emra konkretë për postin e presidentit.
Kjo qasje vjen pas deklarimeve të mëparshme të Abdixhikut se LDK-ja nuk është e gatshme për një marrëveshje politike me Kurtin për formimin e institucioneve, por se mund të mbështesë një kandidat konsensual dhe jopartiak për president. Kriza institucionale në Kosovë vazhdon. PDK-ja dhe AAK-ja kërkojnë vazhdimin e seancës konstituive të Kuvendit, ndërsa Vetëvendosje insiston se fillimisht duhet të arrihet një marrëveshje politike për tejkalimin e ngërçit.
