Seanca në Hagë. Kadri Veseli: Deklarohem me bindje të plotë se jam i pafajshëm

Ish-kryeparlamentari Kadri Veseli është duke u paraqitur për herë të parë para Dhomave të Specializuara në Hagës, që njihen si Gjykata Speciale. Ai u deklarua i pafajshëm për të gjitha akuzat.
“Faleminderit i nderuar gjykatës. I dëgjova dhe i kam lexuar të gjitha pikat e aktakuzës. Më lejoni të deklarohem me bindje të plotë se jam i pafajshëm në të gjitha pikat e aktakuzës”, tha Veseli. Gjykatësi Nicolas Guillou fillimisht ka treguar procedurat që ndiqen në atë që quhet si “paraqitja e parë e të akuzuarit”, teksa një administratore më pas ia ka lexuar akuzat për krime lufte dhe krime kundër njerëzimit që rëndojnë mbi ish-kryetarin e PDK-së.
Të enjten e javës që shkoi, me një avion ushtarak, ish-kyeparlamentari Kadri Veseli dhe ish-bashkëpunëtorët e tij në luftë, ish-presidenti Hashim Thaç dhe shefi i Grupit Parlamentar të LVV-së, Rexhep Selimi, u nisën për në Hagë, pas konfirmimit të aktakuzës kundër tyre.
Një ditë më herët, ish-kryeparlamentari Jakup Krasniqi u arrestua dhe u dërgua gjithashtu për në paraburgimin e Gjykatës Speciale. Ata akuzohen për krime lufte dhe krime kundër njerëzimit. Aktakuza i bën përgjegjës Thaçin, Veselin, Krasniqin e Selimin për një sërë krimesh që pretendohet se janë kryer në disa qendra ndalimi gjatë viteve 1998-1999. Prokuroria e Specializuar i akuzon krerët e UÇK-së se kanë qenë ose duhej të ishin në dijeni të këtyre krimeve.

Lexoni edhe…

• Fjalimi emocionues i Jakup Krasniqit në Hagë: Po përpiqeni të na ndani mbi baza fetare. Unë s’jam mysliman dhe as katolik, por shqiptar
• Seanca në Hagë. Hashim Thaçi: I dëgjova akuzat dhe i hedh poshtë të gjitha (VIDEO)
• Video editorial i “Koha Jonë”: Gjyqi i turpshëm kundër Kosovës dhe UÇK. Specialja në Hagë flet në emër të Serbisë