Teksa afrohet seanca konstituive e 9 shtatorit, LDK dhe PDK kanë konfirmuar pjesëmarrjen në Kuvend, duke rritur shpresat për zhbllokimin e procesit institucional. LDK, pas mbledhjes së grupit parlamentar, vendosi të marrë pjesë në vazhdimin e seancës me synimin për të kontribuar në formimin e institucioneve.
“Vendosëm që të marrim pjesë në seancë dhe të japim kontributin tonë për t’i dhënë Kosovës institucione”, tha deputetja Jehona Lushaku-Sadriu. Ajo sqaroi se gjatë mbledhjes nuk është diskutuar për zgjedhjen e presidentit të Kosovës dhe mohoi se ka pasur ndryshim të qëndrimit të LDK-së për këtë çështje. “Çështja e presidentit absolutisht nuk është diskutuar sepse nuk është temë. Temë është seanca dhe konstituimi i Kuvendit të Kosovës”, deklaroi Lushaku-Sadriu.
Pjesëmarrjen në seancën e 9 shtatorit e konfirmoi edhe Partia Demokratike e Kosovës. Kryetari i saj, Bedri Hamza, tha se Kuvendi duhet të konstituohet para 16 shtatorit, kur pritet vendimi përfundimtar i Dhomave të Specializuara në Hagë për ish-krerët e Ushtrisë Çlirimtare të Kosovës.
“Ne jemi të bindur që në këtë kohë, Kosova ka nevojë që të ketë Kuvend të konstituuar. Ne presim që të festojmë në Kosovë, presim që ata të kthehen”, tha Hamza. Ai u bëri thirrje deputetëve që në seancën e së mërkurës të shmangin, sipas tij, lojërat politike dhe të mundësojnë konstituimin e Kuvendit.
“PDK do të jetë në Kuvendin e Republikës së Kosovës. Vazhdimisht kemi kërkuar, kemi konstatuar me të drejtë, e kemi faktuar që ka shkelje të Kushtetutës, të Rregullores së Punës së Kuvendit, ka shkelje të vendimit të Gjykatës Supreme”, tha Hamza.