Osmani kritikon BE: Aplikimi ynë në vitin 2022 ndodhet në sirtarë! Kemi bërë reforma, Brukseli nuk na i njeh

Presidentja e Kosovës, Vjosa Osmani në një intervistë ndryshe për “Politico” ka kritikuar Bashkimin Evropian, meqë sipas saj Brukseli zyrtar duket se nuk e sheh dhe nuk e ndjenë progresin që ka bërë Kosova. Ajo tha se rruga integruese e Kosovës mbetet e bllokuar dhe sipas saj, procesi i bazuar në merita, për të cilin BE-ja flet aq shumë, ende s’po shihet në praktikë.

”Në të njëjtën kohë, nuk e ndiejmë që ky qasje pro-evropiane dhe fakti që ne jemi 100% të përafruar me politikën e përbashkët të jashtme dhe të sigurisë së BE-së është parë ose vlerësuar. Përkundrazi, duket sikur merret si e mirëqenë. 97% e njerëzve, sigurisht, janë pro-evropianë. Reformat tona në ekonomi, në sundim të ligjit, sidomos në luftën kundër krimit dhe korrupsionit, kanë qenë thelbësore. Në rrugën tonë të integrimit evropian, jemi të bllokuar. Duket sikur procesi i bazuar në meritë, për të cilin BE-ja flet aq shumë, mbetet diçka që duhet të vijë. Unë ende nuk e shoh të ndodhë”, tha Osmani.

Sa i përket mundësisë që Gjermania të shtyjë përpara procesin integrues të Kosovës, Osmani ka thënë se shpreson që të ndodh një gjë e tillë, meqë Kosova s’po kërkon bamirësi, por shtyrje përpara bazuar në merita. Presidentja Osmani ka përmendur edhe faktin që BE ende s’e ka shqyrtuar aplikacionin e Kosovës për të marrë statusin e vendit kandidat, duke thënë se ai s’është shqyrtuar dhe se ndodhet diku në sirtarët e BE-së.

”Ne nuk po kërkojmë bamirësi. Nuk po kërkojmë rrugë të shkurtër. Po kërkojmë, pikërisht, respekt për punën që bëjmë dhe pranimin e reformave që ne ndërmarrim. Dhe nëse kjo do të merret parasysh, Kosova do të bëhej vendi udhëheqës. Por realiteti është se tani për tani, aplikimi ynë as nuk është shqyrtuar. Ne aplikuan në dhjetor 2022, dhe tani jemi pothuajse në dhjetor 2025”.