Përçahet LDK-ja, Hoti: Nuk e votoj Sejdiun si president

Kandidatura e paraqitur si konsensuale për postin e presidentit të Kosovës, nga Kurti e Abdixhiku, pritet që të krijojë përplasje të forta brenda radhëve të Lidhjes Demokratike të Kosovës. Deputeti i Lidhjes Demokratike të Kosovës, Avdullah Hoti, me anë të një postimi në rrjetet sociale, shprehet se do të votojë kundër Sejdiut për postin e presidentit.

“Presidenti i Republikës duhet të jetë figurë unifikuese, e cila ndërton konsensus përtej interesave partiake dhe përfaqëson interesin e përgjithshëm të qytetarëve. Në vlerësimin tim, kjo kandidaturë nuk e përmbush këtë kriter. Njëkohësisht, kjo kandidaturë nuk pasqyron interesat politike dhe parimore të Lidhjes Demokratike të Kosovës dhe elektoratit të saj”.

Sipas tij, zgjedhja e Sejdiut për këtë post të krijon përshtypjen se propozimi është i imponuar për LDK-në, ka penguar edhe kandidatura të tjera politike, vetëm për t’i hapur rrugë një kandidature që, në thelb, është po ashtu politike.

“LDK duhet të ketë një qëndrim të qartë, të pavarur dhe të përgjegjshëm. Nuk mund të mbështesim një kandidaturë vetëm për hir të një marrëveshjeje politike, nëse ajo nuk përfaqëson parimet, interesat dhe pritjet e elektoratit të LDK-së. Kjo nuk është çështje individësh. Është çështje e parimeve, identitetit politik dhe përgjegjësisë që kemi ndaj votuesve tanë”.

Sejdiu ka qenë gjyqtar raportues në rastin kur Gjykata Kushtetuese e rrëzoi Qeverinë e udhëhequr prej Hotit në vitin 2020. LDK pritet të mbajë të martën mbledhjen e kryesisë dhe më pas të Grupit Parlamentar dhe nuk përjashtohen përplasjet mes lidershipit të kësaj partie për emrin e dakordësuar me Kurtin për postin e presidentit.