Lideri i Lëvizjes Vetëvendosje ka thënë se qeverinë do ta formojë me partitë e komuniteteve jo serbe, duke përjashtuar kështu partitë shqiptare dhe Listën Serbe.
Për formimin e ekzekutivit, Lëvizja Vetëvendosje është më e sigurt por Presidentin nuk mund ta zgjedhë e vetme. Sipas kushtetutës, që një kandidat të zgjidhet president, duhet të sigurojë 2/3 e votave në raundet e para, ose një shumicë prej 61 deputetësh në raundin e tretë, por me pjesëmarrjen e të paktën 80 ligjvënësve në sallë.
Për këtë post, Vetëvendosje ka nominuar Vjosa Osmanin, e cila në zgjedhjet e 14 shkurtit fitoi numrin më të madh të votave, përkatësisht mbi 300 mijë të tilla. Partitë që janë në opozitë, PDK dhe AAK kanë hedhur poshtë mundësinë që të votojnë kandidatën e Lëvizjes Vendvendosje.
Kryetari i Partisë Demokratike të Kosovës, përsëriti qëndrimin e tij të hënën, se Osmani është figurë përçarëse. Lidhja demokratike e Kosovës nuk ka marrë ende një vendim, ndërsa ka paralajmëruar bisedime me Osmanin.