“Zvarritja e krijimit të asociacionit të komunave me shumicë serbe është një gabim strategjik”, tha kryeministri Edi Rama gjatë konferencës për shtyp me presidentin serb, Aleksandër Vuçiç në Beograd, në kuadër të turit Ballkanit për Procesin e Berlinit. Rama kërkoi që nëse mbahen zgjedhjet në veri të garantohet pjesëmarrja.
“Propozimi për asosacionin është një kontribut nga ana ime, por nuk e kam konsultuar me Serbinë dhe Kosovën. I është dorëzuat dy kumbarëve Francës dhe Gjermanisë, i takon palëve ta lexojnë apo jo. Tërheqja zvarrë e asocacionit të komunave serbe është një gabim strategjik. Këmbëngulja për të mbajtur në godina bosh kryetarë të kthyer në pengesë për zgjidhjen është një gabim strategjik. Kur të hapet rruga për zgjedhje duhet të garantohet pjesëmarrja”, tha Rama.
Në lidhje me situatën në veri të Kosovës, Rama u shpreh tensionet e fundit nuk janë shaka, ndërkohë që iu kërkoi palëve t’i rikthehen dialogut.
“Rruga e vetme është jo rritja e tensioneve, por rritja e dialogut mbi marrëveshjen e planit franko-gjerman. Askush nuk duhet ta marrë si shaka tensionet në veri të Kosovës për të mos e çuar këtë zonë në një situatë të rrezikshme. I duhet hapur rruga arsyes dhe më pas të kalohet në rrugën e dialogut”, shtoi kryeministri.