Rreziku i armatimit të Serbisë, Kosova i druhet agresionit në rritje të fqinjëve

Institucioneve kosovare u kërkohet të rrisin investimet në infrastrukturën e mbrojtjes dhe të lobojnë për t’u futur nën ombrellën e NATO-s, për t’i bërë ballë agresionit ushtarak serb.

Në fundin e tetorit, shteti serb njoftoi se ka marrë si donacion nga Rusia 6 aeroplanë luftarakë MiG-29, 30 automjete të blinduara dhe tanke moderne që mund të lëshojnë predha antiblindë deri 5 mijë metra distancë.

Nuredin Ibishi, njohës i rrethanave të sigurisë, mendon se furnizimi me këto armë e bën Serbinë një kërcënim fillimisht për Kosovën por edhe për vendet tjera që nuk i kanë raportet e mira me të.

“E kemi një disbalancë të forcave  në rajon  sidomos me një rritje të madhe më shumë se 1 miliardë  kohët  e fundit që i kanë deklaruar  investime në armatim dhe në pajisje luftarake  që e bëjnë Serbinë të jetë  kërcënues për fqinjët në rend të parë për Kosovën por edhe vendet tjera që nuk kanë raporte të mira. Është një përparësi e jona që ne kemi prezencën ndërkombëtare KFOR-in këtu  dhe normal dhe tendencat tona  apo kërkesat tona që e kemi FSK-në si forcë të armatosur duhet të jemi edhe në aspektin politik dhe funksional  të përshpejtojmë  procedurat që të integrohemi në NATO  dhe kur nën këtë nën ombrellë jemi shumë më komod.  Me gjithë këtë arsenal armatimi rrezikon edhe Kroacinë dhe  vendet tjera që janë në rajon dhe realisht kjo është një shtytje e jona që ne jemi më  të përgatitur edhe politikisht  edhe në aspektin funksional.”

Për ekspertin e sigurisë, Drizan Shala, pajisja e Serbisë me infrastrukturë ushtarake po bëhet me qëllimin që shteti serb të jetë lider në rajon me fuqinë ushtarake.

“Kjo në mënyrë të drejtpërdrejtë e atakon edhe sigurinë e vendit sepse ne me Serbinë kemi shumë çështje për të biseduar sepse shteti serb nuk na njeh si shtet i pavarur  dhe demokratik ka  pretendime territorial mbi Kosovën. Kjo mua më lë të nënkuptoj se shteti serb ka interesa të drejtpërdrejta që ta destabilizojë Kosovën përmes ndonjë intervenimi jo klasik, por  përmes një intervenimi të strukturave paralele që veçse i ka në Kosovë përmes aktivizimi i grupeve paramilitare, ushtarake të cilat  ishin përdorur edhe  në Krime nga ana e Rusisë. Sepse Serbia është duke e marr edhe si model Krimenë  për të bërë ndonjë plan të invazionit klasik sa i përket  intervenimeve në Kosovë“, theksoi ai.

Shala thotë se Kosova krahas rritjes së investimeve në ushtri, duhet të bëjë presion përmes NATO-së dhe shteteve mike që Serbia të mos i përdorë këto armë.

“Në arenën ndërkombëtare në kanalet  diplomatike të kërkoi nga NATO-ja  nga shtetet mike që të bëjë presion të vazhdueshëm që këto armatime të mos përdoren përmes sanksioneve të ndryshme ekonomike dhe të tjera, por në aspektin e brendshëm Kosova duhet t’i ndal investimet në infrastrukturën rrugore. Pra, duhet  të fokusohemi dhe  të kthemi kah  investimi kah mbrojtja kolektive sepse Kosova është duke qaluar në këtë aspekt. E kemi një plan gjithëpërfshirës  10 vjeçar të FSK-së dhe forcave të armatosura por ky plan duhet të modifikohet dhe tu përshtatet zhvillimeve aktuale të rajonit. Duhet të shkurtohet  duhet një buxhet jashtëzakonisht më i madh.”

Serbia mendohet se disponon gati 30 mijë forca ushtarake aktive, edhe pse të dhënat mbeten konfidenciale, ndërsa personeli i Forcës së Sigurisë së Kosovës vlerësohet 6-fish më i vogël.

Donacioni i armatimeve që Beogradi ka marrë nga Rusia është pjesë e një marrëveshjeje që presidenti i Serbisë, Aleksandër Vuçiç, arriti me Ministrinë rus të Mbrojtjes, në vitin 2016.