Ish-presidentja e Kosovës, Vjosa Osmani ka treguar më shumë për dallimet kryesore që u shfaqën gjatë takimeve me kryetarin e LDK, Lumir Abdixhiku dhe kryeministrin në detyrë Albin Kurti, ku u diskutua mundësia e një marrëveshjeje politike. Sipas Osmanit, pika kryesore e mospajtimit ishte mënyra sesi konceptohet posti i Presidentit të Kosovës.
Ajo tha se LDK-ja e sheh Presidentin si një figurë me përvojë dhe qëndrime politike, por jo partiake. Sipas saj, kreu i shtetit duhet të jetë në gjendje të mbrojë Kushtetutën, të përfaqësojë Kosovën jashtë vendit dhe të shërbejë si balancues ndërmjet institucioneve. ”Për ne një President i Republikës duhet të ketë një përvojë, duhet të ketë qëndrime politike, jo partiake”, tha Osmani, e ftuar mbrëmjen e së premtes në Kanal 10.
Në anën tjetër, ajo pretendon se Vetëvendosje kishte një qasje tjetër. Sipas Osmanit, VV-ja e konsideronte Presidentin më shumë si një figurë simbolike, pa një rol të theksuar politik. ”Pala tjetër, pra Vetëvendosja, më shumë e sheh si një figurë totalisht të parëndësishme, që nuk bën asgjë, një figurë simbolike”, është shprehur ajo.
Osmani tha se LDK-ja nuk e kërkon një President që të jetë në konflikt me Qeverinë. Përkundrazi, ajo konsideron se bashkëpunimi ndërmjet Presidentit dhe Qeverisë është normal kur është në interes të vendit. Pas vendimit të LDK-së për të qëndruar në opozitë dhe për të hequr dorë nga kërkesat për poste institucionale, përfshirë atë të Presidentit, Osmani ka thënë se tani diskutimi duhet të fokusohet te emrat konkretë.
Ajo bëri të ditur se LDK-ja është e gatshme të mbështesë një kandidat konsensual për President, por vetëm nëse ai plotëson kriteret e përcaktuara nga kjo parti. ”Ne do të diskutojmë për emra konkretë jashtë partive politike”, tha Osmani, duke theksuar se kandidati duhet të ketë përvojë, gatishmëri dhe guxim për ta mbrojtur Republikën dhe Kushtetutën. Edhe pse LDK-ja tashmë ka hequr dorë nga kërkesat për poste politike, çështja e Presidentit mbetet një prej pikave kryesore ku mund të kërkohet konsensus mes partive politike.