Afro një vit nga aplikimi i tarifave maksimaliste kundrejt Serbisë, bizneset kosovare e mirëpresin arritjen e një marrëveshjeje paqësore, duke besuar se kjo do ndikojë në rritjen e investimeve direkte të huaja në Kosovë, rritjen e eksportit, si dhe shtimin e fokusit të politikës kosovare te bizneset.
Të enjten, më 21 nëntor, mbushet një vit nga vendimi i kryeministrit në detyrë, Ramush Haradinaj, për të rritur nga 10 në 100 për qind tarifat doganore për mallrat serbe dhe boshnjake.
Politika që u bë shkak prej fushatës negative për mosnjohjen e Prishtinës nëpër botë, ka ndikuar politikisht dhe ekonomikisht pajtimin mes fqinjëve.
Kreu i Odës Ekonomike, Berat Rukiqi, tha të hënën se gjatë kësaj periudhe Serbia ka dëmtuar zhvillimin bizneseve kosovare për një numër arsyesh.
Duke prezantuar të hënën opinionet e bizneseve për marrëveshjen Kosovë-Serbi, Rukiqi shtoi se akordi dypalësh mbështetet nga bizneset vendëse.
Lidhur me gjendjen e të bërit biznes, situata në muajt korrik, gusht, shtator, paraqitet e kënaqshme sipas bizneseve në Kosovë dhe ka rritje të besueshmërisë, ndërsa shkalla e papunësisë mbetet stabile.
Barrierat me të cilat hasen bizneset janë kryesisht pagesat jashtë kohës, konkurrenca e padrejtë dhe mungesa e mjeteve financiare.