Thaçi takohet me Macron: Franca mund të luajë rol vendimtar për marrëveshjen Kosovë-Serbi

Presidenti i Kosovës Hashim Thaçi, i cili gjendet në Paris ku do të marrë pjesë në Samitin e Paqes, ka bërë të ditur se do të takohet me presidentin francez Emmanuel Macron për të diskutuar zhvillimet e fundit në rajonin e Ballkanit.

Në një postim në Twitter, Thaçi shkruan se “Do të kem një takim me presidentin Emmanuel Macron për të diskutuar zhvillimet e fundit në rajonin tonë dhe kontinent.

“Franca mund të luajë një rol vendimtar në procesin e ardhshëm të zgjidhjes përfundimtare të paqes të njohjes së ndërsjellë midis Kosovës dhe Serbisë”.

Presidenti francez Macron është vënë prej ditësh në qendër të kritikave për veton e tij bllokuese ndaj hapjes së negociatave mes BE dhe Shqipërisë e Maqedonisë së Veriut.

Macron e ka justifikuar qëndrimin e Francës duke thënë se fillimisht Unioni europian duhet të reformojë politikat e pranimit dhe zgjerimit dhe pastaj të nisin negociatat me vendet aspirtante.