Zjarri në hotelin në Vlorë, reagon Kurti: Po e monitorojmë nga afër gjendjen e qytetarëve tanë

Zjarri që përfshiu një hotel në zonën e Lungomares në Vlorë ka shkaktuar reagimin e kryeministrit të Kosovës, Albin Kurti, i cili ka shprehur shqetësimin për shtetasit kosovarë të lënduar në ngjarje.

Përmes një postimi në rrjetet sociale, Kurti bëri të ditur se autoritetet e Kosovës po e ndjekin nga afër situatën dhe janë në komunikim me institucionet shqiptare për gjendjen shëndetësore të të dëmtuarve.

“Sot, në orët e hershme të mëngjesit, një zjarr përfshiu një hotel në Vlorë, ku si pasojë u lënduan katër shtetas të Republikës së Kosovës, tre prej të cilëve po marrin trajtim spitalor në Tiranë dhe një në Vlorë. Jemi të tronditur nga lajmi dhe po e monitorojmë nga afër gjendjen e qytetarëve tanë, duke qenë në komunikim të vazhdueshëm me autoritetet përkatëse në Shqipëri. Të lënduarve u dëshiroj shërim të shpejtë dhe të plotë”, shkruan Kurti.

Ngjarja ndodhi në orët e para të mëngjesit në hotelin “Brooklyn”, në zonën e Lungomares. Sipas të dhënave paraprake të policisë, zjarri dyshohet se nisi nga djegia e prizës së një frigoriferi në restorantin e hotelit, për t’u përhapur më pas në pjesë të tjera të godinës.

Nga flakët mbetën të lënduar gjashtë persona, pesë prej tyre shtetas të Kosovës dhe një shtetas nga Rrësheni. Pesë të plagosur u transportuan për ndihmë mjekësore në Tiranë, ndërsa një tjetër po merr trajtim në Vlorë.

Mes të dëmtuarve është edhe një vajzë, e cila raportohet se ndodhet në gjendje shumë të rëndë, me djegie në pjesën më të madhe të trupit.

Për t’u shpëtuar flakëve dhe tymit, disa pushues janë detyruar të dalin nga dhomat përmes ballkoneve. Forcat zjarrfikëse ndërhynë për shuarjen e flakëve dhe evakuimin e personave që ndodheshin në hotel.