Arsenali i armëve në ”kështjellën” e Martinajt mbetet jetim

Se ku është Ervis Martinaj, do të mbetet mister, ndoshta edhe përjetë. Në përfundim të 100 ditëshin që kishte drejtori i Policisë së Shtetit, Muhamet Rrumbullaku si kohë për të përmirësuar rendin, ndër to edhe për të dhënë përgjigje se çfarë u bë me Martinajn, sot kemi vetëm një aksion propagandistik.

Armë dhe municione luftarake u zbuluan djetë hënën në Fushë Kuqe, konkretisht në banesat e Ervis Martinajt dhe dy xhaxhallarëve të tij, Faik dhe Rakip Martinajt. Për këtë aksion, nuk ka asnjë të shoqëruar, apo të arrestuar. Armët e municionet u zbuluan të futura në kosheret e bletëve në një ambient të përbashkët të familjes Martinaj. Dy xhaxhallarët e të shumëkërkuarit ndodheshin prezent.

Organi i akuzës në Kurbin shprehen se urdhri është dhënë për kontrolle të befasishme, dhe se është kopetencë e Policisë për të kryer veprime të mëtejshme në lidhje me sendet e jashtëligjshme të gjetura. Por përse u bë në këto momente ky aksion dhe jo më parë, kur përflitet se Martinaj ka vdekur? Dhe më kryesorja, çfarë i shërben pyetjes se çfarë u bë me fatin e Martinajt? Policia është pllakosur nga heshtja.

Për këtë çështje, gazetarët sot e pyetën ministrin e Drejtësisë, Ulsi Manjën por nuk iu përgjigj, duke thënë se ministri përgjegjës për këtë është ai i Brendshëm Bledi Çuçi. “Unë jam ministër i Drejtësisë i Qeverisë Rama dhe besoj fort në ndarjen e pushteteve dhe me këtë çështje po merret policia dhe institucionet përgjegjëse. Edhe për Policinë ka një ministër përgjegjës dhe ai Bledi Çuçi”.