Kanosi me hanxhar një person dhe i dëmtoi makinën, arrestohet 39-vjeçari

Një 39-vjeçar është arrestuar nga policia në Shijak pasi kërcënoi për motive të dobëta me hanxhar një person dhe e goditi fizikisht. Sipas policisë, ngjarja ka ndodhur në lagjen “Popullore”, ku 39-vjeçari akuzohet se ka dëmtuar me hanxhar xhamin e automjetit të një 55-vjeçari, më pas e ka goditur fizikisht dhe e ka kanosur me mjetin prerës për ta vrarë.

Njoftimi i Policisë:

Kanosi për motive të dobëta me mjet prerës një 55-vjeçar, e goditi fizikisht dhe i dëmtoi xhamin e automjetit, ndërhyrja në kohë e shërbimeve të Policisë parandaloi përshkallëzimin e konfliktit.

Shërbimet e Policisë vunë në pranga një 39-vjeçar.

Shërbimet e Komisariatit të Policisë Shijak arrestuan në flagrancë shtetasin I. N., 39 vjeç, banues në Shijak, për veprat penale “Kanosja”, “Shkatërrimi i pronës” dhe “Prodhimi dhe mbajtja pa leje e armëve të ftohta”.

Ky shtetas dyshohet se për motive të dobëta, në lagjen “Popullore”, Shijak, ka dëmtuar me mjet prerës (hanxhar) xhamin e automjetit të shtetasit D.Ç, 55 vjeç dhe më pas e ka goditur fizikisht, si dhe e ka kanosur me mjetin prerës hanxhar për ta vrarë.

Gjatë veprimeve procedurale, në cilësinë e provës materiale, u sekuestruan mjetet prerëse: një thikë dhe një hanxhar.

Materialet procedurale iu referuan Prokurorisë pranë Gjykatës së Juridiksionit të Përgjithshëm Durrës, për veprime të mëtejshme.