Laçi një “qytet funeral”, po varrosen të rinjtë si në ’97-ën

Masakra e fundit në Fushë-Krujë me tre viktima, të rinj, tregon edhe njëherë se autorët nuk kanë frikë nga askush. Laçi është shndërruar në një “qytet funeral”, thotë gazetari i kronikës Artan Hoxha, pasi sipas tij të rinjtë po varrosen si në vitet 1997-1998.

“Laçi është shndërruar në qytetet funeral. Nuk jemi në 97-98 që të varrosësh tre të rinj. Autorët nuk kanë patur frikë nga askush. Janë ca telenovela turke që s’ka askund polici, se kështu e ka vendosur regjisori, njësoj edhe këtu. Në këto raste postblloku i policisë e ka zero shansin të përballet, se mund të humbësh edhe jetën. Stacioni i policisë në Fushë-Krujë është më i sulmuari me lëndë eksplozive”.

Një tjetër pikë e fortë e ngjarjsë, është edhe dëshmija e familjarëve. Ata janë shprehur se kanë folur me të rinjtë përpara se të ndodhte vrasja e trefishtë, dhe se ata e kanë kuptuar që po ndiqeshin nga persona të panjohur. Diklen Vata ka folur me nënën dhe motrën e tij, ku u ka thënë ”po na ndjekin”.

Nga ana tjetër, mësohet se Policia ka kryer një mori kontrollesh në zonën e Niklës, Laçit dhe Mirditës pas atentatit, por kanë zbuluar se personat e dyshuar se mund të kishin marrë pjesë në këtë atentat ishin larguar në mënyrë të rregullt disa ditë më parë jashtë shtetit.