Rama:” Opozita pa vizion, fshihet pas kandidatëve “të pavarur” për të shmangur sfidën”

Kryeministri Edi Rama deklaroi sot se opozita, si forcë politike që pretendon të qeverisë, arratiset nga zgjedhjet sepse nuk ka vizion dhe ide të qarta.

Gjatë takimit me qytetarët e Njësisë Nr.3 në Tiranë, Rama theksoi se askush nuk e di çfarë pune bëhet për të fituar mbështetjen e njerëzve, dhe se ata që flasin se Shqipëria është më e keqe, më e korruptuar ose më e varfër, nuk kuptojnë realitetin e shumicës.

“Shumica nuk na voton sepse jemi më të mirët, por sepse më të mirë se ne nuk ka. Të tjerët janë kashtë e koq* që nuk i duhen dreqit,” tha Rama.

Kryeministri e konsideroi të paprecedentë në historinë e politikës faktin që një parti opozitare që pretendon të jetë alternativë qeverisëse, të fshihet pas disa pseudo të pavarurve.

“Madje për kryeqytetin nxjerrin një aktor që luan rolin e kandidatit të pavarur. Kur ke përballë kundërshtarë që nuk sfidojnë me argumente, vizion apo aftësi, por me sharje dhe dhunë, sfida bëhet më e vështirë. Duhet të gjesh forca brenda vetes,” shtoi Rama.

Ai përmendi gjithashtu rangimin e Shqipërisë për digjitalizimin e shërbimeve publike:

“BE publikoi një dokument mbi vendet e Ballkanit për digjitalizimin e shërbimeve publike. Shqipëria është 121% brenda standardeve të BE-së dhe në pjesën e sipërme të klasifikimit, me shërbim të drejtpërdrejtë, pa dikë në mes – zero korrupsion,” theksoi Kryeministri.